హార్వర్డ్‌కు ట్రంప్ సర్కార్ మరో షాక్.. 1 బిలియన్‌ డాలర్ల నిధులకు కోత!

అమెరికా అధ్యక్షుడు డొనాల్డ్‌ ట్రంప్‌ (Donald Trump) హార్వర్డ్‌ యూనివర్సిటీ (Harvard University) కి షాక్‌ల మీద షాక్‌లు ఇస్తున్నారు. ఇప్పటికే ఆ విశ్వవిద్యాలయానికి అందించే 2.2 బిలియన్‌ డాలర్ల ఫెడరల్‌ నిధులకు కత్తెర వేశారు ట్రంప్. తాజాగా మరో 1 బిలియన్‌ డాలర్ల కోతకు సిద్ధమవుతున్నట్లు సమాచారం. వైద్య పరిశోధనల కోసం యూనివర్సిటీకి ఇచ్చే ఫెడరల్‌ గ్రాంట్లు, కాంట్రాక్టుల నుంచి 1 బిలియన్‌ డాలర్లను తగ్గించాలని ట్రంప్‌ యంత్రాంగం (Trump administration) ప్రణాళికలు రచిస్తున్నట్లు తెలుస్తోంది.

వైట్‌హౌజ్‌ గత శుక్రవారం జారీ చేసిన డిమాండ్లకు ఏ మాత్రం తలొగ్గేది లేదని హార్వర్డ్‌ అధ్యక్షుడు అలాన్‌ గార్బర్‌ స్పష్టంచేశారు. వాటిని బహిరంగంగా తిరస్కరించారు. ఈ నేపథ్యంలోనే ట్రంప్‌ అడ్మినిస్ట్రేషన్‌ నుంచి కొత్త బెదిరింపులు వచ్చినట్లు సమాచారం. గార్బర్‌ చర్యలపై ట్రంప్‌ యంత్రాంగం సీరియస్‌గా ఉన్నట్లు తెలుస్తోంది. తమ డిమాండ్లను రహస్యంగా ఉంచాలని ప్రభుత్వం కోరినప్పటికీ.. హార్వర్డ్‌ యూనివర్సిటీ వ్యవహరించిన తీరుతోనే వైట్‌హౌస్‌ ఈ విషయంలో మరింత దూకుడుగా వెళ్లడానికి ఒక కారణమని వాల్‌స్ట్రీట్‌ జర్నల్‌ తన నివేదికలో పేర్కొంది.

హార్వర్డ్‌ యూనివర్సిటీకి వైట్‌హౌస్‌ పలు నిబంధనలు జారీ చేసిన విషయం తెలిసిందే. విశ్వవిద్యాలయ ప్రాంగణాల్లో యూదు వ్యతిరేక నిరసనల కట్టడికి ఉద్దేశించినవి అవి. అయితే, వాటిని వ్యతిరేకిస్తున్నట్లు విశ్వవిద్యాలయం ప్రెసిడెంట్‌ అలాన్‌ గార్బర్‌ పేర్కొన్నారు. విదేశీ విద్యార్థుల అక్రమ, హింసాత్మక కార్యకలాపాల రికార్డులను సమర్పిస్తేనే కొత్తగా విదేశీయులను చేర్చుకునేందుకు అనుమతిస్తామని హార్వర్డ్‌ విశ్వవిద్యాలయానికి ట్రంప్‌ ప్రభుత్వం స్పష్టంచేసింది. రికార్డులను సమర్పించకపోతే వర్సిటీకున్న ప్రవేశాల అర్హతను రద్దు చేస్తామని హెచ్చరించింది.

విద్యార్థుల రికార్డులను అందించాలని ఆదేశిస్తూ హోంలాండ్‌ సెక్యూరిటీ కార్యదర్శి క్రిస్టీ నోయెమ్‌ బుధవారం వర్సిటీకి లేఖ రాశారు. ఈ నెల 30వ తేదీలోగా సమాధానం ఇవ్వాలని అందులో కోరారు. ఒకవేళ వర్సిటీ స్పందించకపోతే.. విద్యార్థులు, ఎక్స్ఛేంజ్‌ విజిటర్‌ కార్యక్రమం (SEVP) ధ్రువీకరణ రద్దవుతుందని పేర్కొన్నారు. ఈ పరిణామాలపై హార్వర్డ్‌ స్పందించింది. ‘ఆ లేఖ మా దృష్టికీ వచ్చింది. గతంలో మేం చెప్పిన మాటకే కట్టుబడి ఉన్నాం. మా స్వాతంత్య్రం, రాజ్యాంగ హక్కుల విషయంలో మేం రాజీ పడలేం. మేం చట్ట ప్రకారమే నడుచుకుంటాం. ప్రభుత్వ యంత్రాంగం కూడా వాటికి అనుగుణంగానే వ్యవహరించాలని ఆశిస్తున్నాం’ అని వర్సిటీ ప్రతినిధి స్పష్టంచేశారు.

ట్రంప్‌ యంత్రాంగంతో ఘర్షణ వైఖరి కారణంగా హార్వర్డ్‌ యూనివర్సిటీ.. ఫెడరల్‌ నిధుల నుంచి దాదాపుగా 9 బిలియన్‌ డాలర్లను కోల్పేయే అవకాశం ఉన్నట్లు తెలుస్తోంది. అయితే.. ఆ నిధులను కోల్పోవడం వల్ల కలిగే చిక్కులకు మించి.. ఈ ప్రతిష్టంభన ఎంత దూరం వెళ్తుందో అన్న ఆందోళన వ్యక్తమవుతోంది.