TTD: లడ్డూ ప్రసాదంపై ప్రభావం చూపిన నిర్లక్ష్యం..నిందితుల జాబితాలో టీటీడీ అధికారులు, నిపుణులు

తిరుమల (Tirumala) లో వెలుగుచూసిన కల్తీ నెయ్యి వ్యవహారం కొత్త మలుపు తిరిగింది. ఈ కేసులో దర్యాప్తు చేపట్టిన సీబీఐ (CBI) -సిట్ (CIT) ఇప్పుడు మరింత వేగంగా ముందుకు సాగుతోంది. డిసెంబర్ 15 లోపు సుప్రీంకోర్ట్ (Supreme Court) కు చార్జ్‌షీట్ దాఖలు చేయాలని నిర్ణయించుకున్న నేపథ్యంలో అధికారులు కీలక సాక్ష్యాలు సేకరించే ప్రక్రియను వేగవంతం చేశారు. ఈ క్రమంలో టీటీడీ మాజీ చైర్మన్ వైవీ సుబ్బారెడ్డి (Y.V. Subba Reddy) ని విచారించిన తర్వాత, అప్పటి ప్రొక్యూర్మెంట్ మేనేజర్ సుబ్రహ్మణ్యంను అరెస్ట్ చేశారు. ఇప్పుడు తాజా సమాచారం ప్రకారం టీటీడీకి చెందిన మరో 11 మంది కూడా ఈ వ్యవహారంలో సంబంధం ఉన్నట్లు సిట్ నిర్ధారించింది.

దర్యాప్తులో బయటపడిన అంశాల్లో అత్యంత చర్చనీయాంశం ఏమిటంటే, ఈ కేసులో ఫిర్యాదు చేసిన వ్యక్తి కూడా నిందితుల జాబితాలో ఉండటం. మొత్తం 12 మందిలో ఒకరైన సుబ్రహ్మణ్యం ఇప్పటికే రిమాండ్‌కి వెళ్లగా, మిగిలిన వారిలో ఆరుగురు టీటీడీ అధికారులు, ఐదుగురు డెయిరీ నిపుణులు ఉన్నారు. వీరంతా నెయ్యి సరఫరా చేసే డెయిరీలతో కలిసి తప్పుదారులు పట్టించారని సిట్ అభిప్రాయం.

నిందితుల జాబితాలో తిరుమల గోదాములో పనిచేసిన ఈశ్వరరెడ్డి, ప్రొక్యూర్మెంట్ విభాగం మాజీ సీనియర్ అసిస్టెంట్ అనిల్ కుమార్, తిరుపతి గోదాంను పర్యవేక్షించిన వెంకటనటేశ్ బాబు, పేరూరి జగదీశ్వరరెడ్డి, ఫిర్యాదుదారు మురళీకృష్ణ వంటి పేర్లు ఉన్నాయి. అలాగే టీటీడీ గోశాల మాజీ డైరెక్టర్ హరినాథరెడ్డి, ఇంకా టెక్నికల్ ఇన్స్పెక్షన్ కమిటీకి చెందిన ఐదుగురు డెయిరీ నిపుణులు కూడా నిందితుల జాబితాలో చేరారు.

దర్యాప్తు ప్రకారం టీటీడీకి నెయ్యి సరఫరా చేసే డెయిరీలు నిజంగా అర్హత కలిగిన సంస్థలా, వారి సామర్థ్యం ఎంత అనేది పరిశీలించాల్సిన బాధ్యత టెక్నికల్ టీమ్‌దే. కానీ ఈ టీమ్‌లోని కొందరు అధికారులు డెయిరీలను సందర్శించకుండానే తప్పుడు నివేదికలు సమర్పించినట్లు సిట్ తేల్చింది. ఈ నిర్లక్ష్యం, కాలుష్యానికి కావాలనే అవకాశం కల్పించిందని దర్యాప్తు సంస్థ అభివర్ణిస్తోంది.

మరో కీలక విషయమేమిటంటే, మైసూరు (Mysuru) లోని సీఎఫ్టీఆర్ఐ ల్యాబ్ నెయ్యిలో వెజిటబుల్ ఆయిల్స్ కల్తీ ఉన్నట్లు స్పష్టంగా తెలిపినా, టీటీడీకి నియమించబడిన డెయిరీ నిపుణుడు సురేంద్రనాథ్ ఆ నివేదికను పట్టించుకోకుండా నెయ్యి నాణ్యత సరిగా ఉందని చెప్పడం. దీనితో ప్రసాదాల తయారీలో కల్తీ నెయ్యి వినియోగం కొనసాగింది.

ఈ కేసులో నిందితులంతా తమ తమ స్థాయిలో నిర్లక్ష్యం, సహకారం లేదా ఉద్దేశపూర్వకంగా వ్యవహరించడం వల్ల భక్తులకు ఇచ్చే లడ్డూ ప్రసాదం పైనే ప్రభావం పడిందని సిట్ తన నివేదికలో స్పష్టం చేసినట్లు సమాచారం. ఇప్పుడు వీరిపై తీసుకోబోయే చర్యలు, చార్జ్‌షీట్ వివరాలు ఎలా ఉండబోతున్నాయన్నది రాష్ట్రవ్యాప్తంగా ఆసక్తికరంగా మారింది.