TTD: వైకుంఠ ద్వార దర్శనం పై స్పష్టత ఇచ్చిన టీటీడీ పాలకమండలి..

తిరుమలలో (Tirumala) వైకుంఠ ద్వార దర్శనాలపై జరుగుతున్న ప్రచారాలకు చివరికి స్పష్టత వచ్చింది. 10 రోజుల పాటు భక్తులకు కల్పిస్తున్న ఉత్తర ద్వార దర్శనాలను రెండు రోజులకు మాత్రమే పరిమితం చేస్తారన్న వార్తలకు తిరుమల తిరుపతి దేవస్థానం (TTD) సమాధానం ఇచ్చింది. ప్రస్తుతం అమల్లో ఉన్న విధానంలో ఎటువంటి మార్పులు చేయడం లేదని, ఇంతకుముందు మాదిరిగానే 10 రోజుల పాటు వైకుంఠ ద్వార దర్శనాలు కొనసాగుతాయని టీటీడీ పాలకమండలి స్పష్టం చేసింది.

టీటీడీ చైర్మన్ బీఆర్ నాయుడు (B.R. Naidu) తిరుమల అన్నమయ్య భవనంలో కార్యనిర్వాహణాధికారి అనిల్ కుమార్ సింఘాల్‌ (Anil Kumar Singhal) తో కలిసి మీడియా సమావేశంలో ఈ విషయాలను వివరించారు. ఆయన మాట్లాడుతూ పాలకమండలి సమావేశంలో తీసుకున్న ముఖ్య నిర్ణయాలను వెల్లడించారు. ఇటీవల విజయవంతంగా ముగిసిన శ్రీవారి బ్రహ్మోత్సవాలను (Sri Vari Brahmotsavam) ఘనవిజయంగా నిర్వహించడంలో భాగస్వాములైన అన్ని విభాగాల అధికారులకు, పోలీసు సిబ్బందికి, మీడియాకు, భక్తులకు టీటీడీ బోర్డు కృతజ్ఞతలు తెలిపింది.

తిరుమలలో గదుల అద్దె ధరలను (Room Tariffs) సమీక్షించి నివేదిక ఇవ్వడానికి ప్రత్యేక కమిటీని ఏర్పాటు చేయాలని నిర్ణయం తీసుకుంది. కమిటీ సూచనల ఆధారంగా తరువాత చర్యలు తీసుకుంటామని చైర్మన్ తెలిపారు. బ్రహ్మోత్సవాలలో పనిచేసిన ఉద్యోగులకు ప్రత్యేక బహుమతులు ఇవ్వాలని టీటీడీ నిర్ణయించింది. శాశ్వత ఉద్యోగులకు రూ.15,400, కాంట్రాక్ట్ మరియు ఔట్‌సోర్సింగ్ ఉద్యోగులకు రూ.7,535 చెల్లించనున్నారు. అలాగే తిరుమల, తిరుపతిలో పనిచేసిన సిబ్బందికి అదనంగా మరో 10 శాతం ప్రోత్సాహకంగా ఇవ్వాలని నిర్ణయించారు.

గోశాల (Goshala) నిర్వహణపై సమగ్ర అధ్యయనం చేయడానికి నిపుణుల కమిటీని ఏర్పాటు చేయనున్నారు. కమిటీ నివేదిక ఆధారంగా గోశాల అభివృద్ధి చర్యలు తీసుకుంటామని బీఆర్ నాయుడు తెలిపారు. ఒంటిమిట్ట శ్రీ కోదండరామస్వామి ఆలయం (Ontimitta Sri Kodandarama Swamy Temple) వద్ద భక్తుల సౌకర్యార్థం రూ.37 కోట్లతో ఆధునిక సదుపాయాలున్న అతిథి గృహాన్ని నిర్మించేందుకు ఆమోదం తెలిపింది టీటీడీ. అలాగే అక్కడే 1.35 ఎకరాల విస్తీర్ణంలో రూ.2.96 కోట్లతో పవిత్ర వనం (Sacred Grove) ఏర్పాటుకు కూడా ఆమోదం లభించింది.

కాణిపాకం శ్రీ వరసిద్ధి వినాయక స్వామి ఆలయం (Kanipakam Sri Varasiddhi Vinayaka Temple) వద్ద యాత్రికుల వసతి సముదాయం సామూహిక వివాహాల కోసం ప్రత్యేక హాల్స్ నిర్మాణానికి రూ.25 కోట్లు మంజూరు చేశారు. దీనికి ప్రభుత్వ అనుమతులు కోరనున్నట్లు చెప్పారు. చెన్నై టీ.నగర్ (T. Nagar, Chennai) లోని శ్రీ వేంకటేశ్వర స్వామి ఆలయ పరిధిలోని స్థలాన్ని రూ.14 కోట్లతో కొనుగోలు చేసి భక్తులకు సదుపాయాలు కల్పించేందుకు నిర్ణయం తీసుకున్నారు.

కరీంనగర్ (Karimnagar) లో ఉన్న శ్రీ పద్మావతి, శ్రీ ఆండాళ్ సమేత శ్రీ వేంకటేశ్వర స్వామి ఆలయ అభివృద్ధికి ఇప్పటికే ఉన్న రూ.20 కోట్లతో పాటు, దాతల సహకారంతో మరో రూ.10 కోట్లు సేకరించనున్నారు. టీటీడీ కొనుగోలు విభాగంలో వచ్చిన అవకతవకలపై ఏసీబీ (ACB) ద్వారా విచారణ జరపాలని నిర్ణయించారు. ధర్మప్రచారం భాగంగా గ్రామాల్లో భజన మందిరాల నిర్మాణం చేపట్టనున్నారు.