TTD: తిరుమల దేవస్థానంలో భారీ అక్రమాలు.. గోవిందరాజ స్వామి ఆలయంలో బంగారం మాయం..

తిరుమల తిరుపతి దేవస్థానం (Tirumala Tirupati Devasthanams) వంటి అత్యంత పవిత్రమైన సంస్థలో అక్రమాలు చోటు చేసుకుంటే ఎంతటి నష్టం జరుగుతుందో గత ప్రభుత్వ కాలంలో జరిగిన పరిణామాలు స్పష్టంగా చూపించాయి. లడ్డు తయారీలో ఉపయోగించే నెయ్యిలో కల్తీ ఆరోపణల నుంచి మొదలుకుని, ఆలయ వ్యవహారాల్లో అన్యమత వ్యక్తులకు ప్రాధాన్యం ఇవ్వడం వరకు అనేక అంశాలు అప్పట్లో తీవ్ర విమర్శలకు దారి తీశాయి. ఈ నేపథ్యంలో కూటమి ప్రభుత్వం అధికారంలోకి వచ్చిన తర్వాత అప్పటి అవకతవకలను ఒక్కొక్కటిగా వెలుగులోకి తీసుకువస్తోంది.

శ్రీవారి లడ్డు (Srivari Laddu) నెయ్యి కల్తీ వ్యవహారం ఇప్పటికే పెద్ద సంచలనం సృష్టించగా, తాజాగా దానిని మించిన మరో ఘటన తిరుపతిలో (Tirupati) బయటపడింది. పరకామణి వ్యవహారాల్లో జరిగిన చోరీలు, నెయ్యి కొనుగోళ్లలో అక్రమాలు, వస్త్రాల కొనుగోళ్లలో అవినీతి ఆరోపణలు ఇప్పటికే దేవస్థాన ప్రతిష్టకు మచ్చ తెచ్చాయి. ఇప్పుడు వీటన్నింటికీ మించి శ్రీ గోవిందరాజ స్వామి ఆలయం (Sri Govindaraja Swamy Temple) లో జరిగిన ఘటన మరింత కలవరపెడుతోంది.

ఆలయ విమాన గోపురం పనుల్లో ఏకంగా 50 కిలోల బంగారం మాయమైనట్లు ఆరోపణలు నమోదయ్యాయి. ఈ వ్యవహారంపై విజిలెన్స్ విభాగం (Vigilance Department) లోతైన విచారణ చేపట్టింది. అంతేకాదు, ఈ పనుల సందర్భంగా 30 విగ్రహాలను ధ్వంసం చేసినట్టు ప్రాథమిక సమాచారం వెలుగులోకి వచ్చింది. ఇది భక్తుల్లో తీవ్ర ఆందోళనకు కారణమవుతోంది.

గోవిందరాజ స్వామి ఆలయానికి చారిత్రక, ఆధ్యాత్మిక ప్రాధాన్యం ఉంది. 2022–23 కాలంలో ఆలయ విమాన గోపురానికి బంగారు తాపడం చేయాలని నిర్ణయించారు. ఇందుకోసం దేవస్థానం దాదాపు 100 కిలోల బంగారాన్ని కేటాయించింది. ఈ తాపడం తొమ్మిది పొరలుగా అమర్చాల్సి ఉండగా, ఆ ప్రక్రియలో భాగంగా విగ్రహాలను తొలగించినట్లు తెలుస్తోంది. అయితే తొలగించిన విగ్రహాలను తిరిగి అమర్చకుండా, వాటిని ధ్వంసం చేసి మిగిలిన బంగారాన్ని దుర్వినియోగం చేశారన్న అనుమానాలు వ్యక్తమవుతున్నాయి. ప్రాథమికంగా దాదాపు 50 కిలోల బంగారం కనిపించడంలేదని అధికారులు గుర్తించారు.

ఈ విషయం బయటకు రాకుండా అప్పటి దేవస్థాన పాలకులు జాగ్రత్తలు తీసుకున్నట్టు సమాచారం. అప్పటి చైర్మన్ వై వి సుబ్బారెడ్డి (YV Subba Reddy), ఈవో ధర్మారెడ్డి (Dharma Reddy) పాత్రపై కూడా అనుమానాలు వ్యక్తమవుతున్నాయి. విమాన గోపురం పనులకు టెండర్ పొందిన కాంట్రాక్టర్ కాకుండా, మరో సబ్ కాంట్రాక్టర్ ద్వారా పనులు చేయించారన్న ప్రచారం ఉంది. ఈ విషయమై అప్పట్లోనే కొన్ని ఫిర్యాదులు కూడా అందినట్టు తెలుస్తోంది.

ప్రస్తుతం విజిలెన్స్ అధికారులు అప్పటి ఫిర్యాదులు, పత్రాలు, కార్మికుల వివరాలు సేకరిస్తూ దర్యాప్తు కొనసాగిస్తున్నారు. ఎంత బంగారం వాడారు, ఎలా వాడారు, విగ్రహాల ధ్వంసానికి కారణాలు ఏమిటన్న అంశాలపై లోతైన విచారణ జరుగుతోంది. ఈ వ్యవహారం పూర్తిగా వెలుగులోకి వస్తే తిరుమల దేవస్థానంలో గతంలో జరిగిన అక్రమాలపై మరింత స్పష్టత వచ్చే అవకాశం ఉందని భావిస్తున్నారు.