Panchayat Elections: పంచాయతీ ఎన్నికలకు రేవంత్ పక్కా స్కెచ్..!

తెలంగాణలో (Telangana) పంచాయతీ ఎన్నికల (Panchayat Elections) నిర్వహణపై సర్వత్రా ఆసక్తి నెలకొంది. వీలైనంత త్వరగా ఎన్నికలను పూర్తి చేయాలని భావిస్తున్న రేవంత్ రెడ్డి (CM Revanth Reddy ) నేతృత్వంలోని కాంగ్రెస్ ప్రభుత్వం, ఎదురవుతున్న న్యాయపరమైన అడ్డంకులను అధిగమించేందుకు కీలక నిర్ణయం తీసుకుంది. బీసీ రిజర్వేషన్ల (BC Reservations) అంశం న్యాయస్థానాల పరిధిలో ఉండటంతో, ప్రభుత్వపరంగా రిజర్వేషన్లు అమలు చేయడం వీలు కావట్లేదు. అందుకే ప్రస్తుతానికి దాన్ని పక్కనపెట్టి, పార్టీపరంగా 42 శాతం బీసీ రిజర్వేషన్లు కల్పించి ఎన్నికలకు వెళ్లాలని నిర్ణయించింది.

తెలంగాణలోని పంచాయతీలకు చాలాకాలం కిందటే గడువు ముగిసింది. స్థానిక సంస్థల ఎన్నికలను మార్చి 2026 లోపు నిర్వహించకపోతే, కేంద్ర ప్రభుత్వం నుంచి రాష్ట్రానికి అందాల్సిన నిధులు ఆగిపోయే ప్రమాదం ఉంది. గ్రామ పంచాయతీల అభివృద్ధి, నిర్వహణకు సంబంధించిన ఈ నిధులు ఆగిపోతే, గ్రామీణ ప్రాంతాల్లో అభివృద్ధి కార్యక్రమాలు స్తంభించిపోతాయి. ఈ నేపథ్యంలో ఎన్నికల నిర్వహణ రాష్ట్ర ప్రభుత్వానికి రాజ్యాంగపరంగా అనివార్యంగా మారింది. కేంద్రం నుంచి నిధులు పొందాలంటే, ఎన్నికలు నిర్వహించడం తప్ప మరో మార్గం లేదు.

బీసీ రిజర్వేషన్ల అంశంపై కొంతకాలంగా న్యాయస్థానాల్లో వివాదం నడుస్తోంది. స్థానిక సంస్థల్లో బీసీలకు రిజర్వేషన్ల శాతంపై న్యాయపరమైన చిక్కులు ఇంకా తొలగిపోలేదు. రిజర్వేషన్లను చట్టబద్ధంగా ప్రకటించి, కోర్టుల నుంచి గ్రీన్ సిగ్నల్ వచ్చాకే ఎన్నికలు నిర్వహించాలని తొలుత రేవంత్ రెడ్డి సర్కార్ భావించింది. అయితే న్యాయ ప్రక్రియ పూర్తయ్యేందుకు మరింత సమయం పట్టే అవకాశం ఉండటంతో, మార్చిలోపు ఎన్నికలు నిర్వహించాలనే లక్ష్యం నెరవేరడం కష్టమని ప్రభుత్వం గుర్తించింది. బీసీ రిజర్వేషన్లతోనే ఎన్నికలకు వెళ్లాలని ప్రభుత్వం గట్టిగా అనుకున్నప్పటికీ ఈ ప్రక్రియలో జాప్యం జరిగితే, కేంద్ర నిధులను కోల్పోవాల్సి వస్తుంది. ఈ పరిస్థితుల్లో ఒకవైపు బీసీ వర్గాలకు న్యాయం చేయాలనే లక్ష్యం, మరోవైపు నిధుల ముప్పును నివారించాలనే ఒత్తిడి ప్రభుత్వానికి ఎదురయ్యాయి.

ఈ క్లిష్ట పరిస్థితులను అధిగమించేందుకు రేవంత్ రెడ్డి ప్రభుత్వం ఒక కీలకమైన రాజకీయ వ్యూహాన్ని అమలు చేయాలని నిర్ణయించింది. అధికారికంగా రిజర్వేషన్లను ప్రకటించకుండానే, కాంగ్రెస్ పార్టీ తరఫున పంచాయతీ ఎన్నికల్లో పోటీ చేసే అభ్యర్థుల్లో 42 శాతం స్థానాలను బీసీలకు కేటాయించాలని నిర్ణయం తీసుకుంది. తద్వారా ప్రభుత్వం రెండు లక్ష్యాలను సాధించాలని చూస్తోంది. బీసీల అభ్యున్నతికి, వారికి రాజకీయ ప్రాతినిధ్యం కల్పించాలనే తన చిత్తశుద్ధిని చాటుకోవడం ఒకటైతే, న్యాయపరమైన చిక్కులు లేని పద్ధతిలో ఎన్నికలను సకాలంలో పూర్తి చేసి, కేంద్ర నిధులను కాపాడుకోవడం రెండోది. ఇది పూర్తిగా పార్టీపరమైన నిర్ణయం. చట్టబద్ధమైన రిజర్వేషన్లతో సంబంధం లేకుండా, పార్టీ బీసీలకు 42శాతం సీట్లు కేటాయిస్తుంది. ఒక విధంగా బీసీ ఓటు బ్యాంకును తమవైపు తిప్పుకునేందుకు కాంగ్రెస్ ప్రభుత్వం వేసిన రాజకీయ ఎత్తుగడగా దీన్ని భావించవచ్చు.

కాంగ్రెస్ పార్టీ తీసుకున్న ఈ కీలక నిర్ణయం ఇప్పుడు రాష్ట్రంలోని ఇతర ప్రధాన రాజకీయ పార్టీల ముందు ఒక పెద్ద సవాలును ఉంచింది. ముఖ్యంగా బీఆర్‌ఎస్ (BRS), బీజేపీ (BJP) వంటి పార్టీలు ఈ అంశంపై ఎలాంటి వైఖరి తీసుకుంటాయనేది ఆసక్తికరంగా మారింది. గతంలో అధికారంలో ఉన్న బీఆర్‌ఎస్, ఈ విషయంలో కాంగ్రెస్ కంటే ముందంజలో ఉన్నామని నిరూపించుకోవాల్సిన అవసరం ఉంది. బీసీలను ఆకర్షించేందుకు, కాంగ్రెస్ కంటే మెరుగైన లేదా సమానమైన శాతం రిజర్వేషన్లను పార్టీపరంగా కల్పించే అవకాశం ఉంది. జాతీయ స్థాయిలో బీసీలకు అనుకూలమైన విధానాలను ప్రకటిస్తున్న బీజేపీ కూడా తెలంగాణలో ఈ రిజర్వేషన్ల అంశాన్ని తేలికగా తీసుకోకపోవచ్చు. కాంగ్రెస్ నిర్ణయానికి పోటీగా లేదా దానిని మించి తాము బీసీలకు ప్రాధాన్యత ఇస్తామని నిరూపించుకోవడానికి ప్రయత్నించవచ్చు.

రాజకీయ పార్టీలు తాము అధికారంలోకి వస్తే బీసీల కోసం ఏయే చర్యలు తీసుకుంటాయో ప్రజలకు చెప్పేందుకు ఈ ఎన్నికలను ఒక వేదికగా ఉపయోగించుకునే అవకాశం ఉంది. కాంగ్రెస్ నిర్ణయం నేపథ్యంలో, మిగిలిన పార్టీలు కూడా తప్పనిసరిగా పార్టీపరంగా బీసీ రిజర్వేషన్లను ప్రకటించి ఎన్నికల బరిలోకి దిగాల్సిన పరిస్థితి ఏర్పడింది. ఒకవేళ ఏ పార్టీ అయినా దీనికి భిన్నంగా వ్యవహరిస్తే, అది బీసీల ఆగ్రహానికి గురయ్యే ప్రమాదం ఉంది.