Jagga Reddy: మోదీ పాలనపై చర్చకు మీరు సిద్దమా? : జగ్గారెడ్డి

దేశం కోసం ఆస్తులతోపాటు ప్రాణాలనూ త్యాగం చేసిన చరిత్ర రాహుల్ గాంధీ (Rahul Gandhi) కుటుంబానికి ఉందని టీపీసీసీ కార్యనిర్వాహక అధ్యక్షుడు జగ్గారెడ్డి (Jagga Reddy) అన్నారు. రాహుల్ కుటుంబానికి మూడు ఎంపీ పదవులు అవసరమా? అంటూ బీజేపీ ఎంపీ కె.లక్ష్మణ్ (MP K. Lakshman) చేసిన వ్యాఖ్యలపై ఆయన స్పందిస్తూ, దేశం కోసం ఏం చేశావని ఎంపీ సహా ఇతర పదవులను తీసుకున్నావు? అని లక్ష్మణ్ను ప్రశ్నించారు. గాంధీభవన్లో ఏర్పాటు చేసిన మీడియా సమావేశంలో జగ్గారెడ్డి మాట్లాడుతూ రాహుల్గాంధీ కుటుంబం ఆధ్వర్యంలో కాంగ్రెస్ ప్రభుత్వాలు చేసిన అభివృద్ధిపై చర్చకు తాము సిద్ధమని, మోదీ 11 ఏళ్ల పాలనలో జరిగిన అభివృద్ధిపై చర్చకు లక్ష్మణ్ సహా బీజేపీ నేతలు సిద్ధమా? అని సవాల్ విసిరారు.




అధికారంలోకి రావడం, రాకపోవడం అనేది వేరే విషయమని, కానీ చరిత్రను ఎవరూ కాదనలేరన్నారు. స్వాతంత్య్రం వచ్చిన తర్వాత దేశానికి తొలి ప్రధానిగా ఉన్న నెహ్రూ, ఎఫ్సీఐ ఏర్పాటు చేసి కరువు కాలంలోనూ పేదలకు బియ్యం అందించే ఏర్పాటు చేశారన్నారు. ఇందిరాగాంధీ ప్రధానిగా ఉన్నప్పుడు పెత్తందారుల భూమిని పేదలకు పంచారని, బ్యాంకులను జాతీయం చేశారని కొనియాడారు. రాజీవ్గాంధీ ప్రధాని అయ్యాక యువతకు 18 ఏళ్లకే ఓటు హక్కు కల్పించారని, దేశంలో ఐటీ రంగ అభివృద్ధికీ బీజం వేశారని చెప్పారు. పీవీ నర్సింహారావును ప్రధానిని చేసిందీ కాంగ్రెస్ పార్టీయేనని గుర్తు చేశారు. సోనియా, రాహుల్కు ప్రధాని అయ్యే అవకాశం ఉన్నా, రెండు సార్లూ మన్మోహన్ సింగ్నే ప్రధానిని చేశారని గుర్తుచేశారు.