Success Secrets: విజయానికి తొలి మెట్టు.. ‘నో’ చెప్పడం నేర్చుకోండి.. మీ కాలాన్ని కాపాడుకోండి!

హైదరాబాద్:  జీవితంలో ఎదగాలంటే కేవలం కష్టపడితే సరిపోదు, మన సమయాన్ని మనం ఎలా కాపాడుకుంటున్నామనేది కూడా ముఖ్యం. చాలామంది ఇతరులను సంతోషపెట్టడానికి లేదా మొహమాటానికి పోయి ప్రతిదానికీ ‘అవును’ (Yes) అని చెబుతుంటారు. కానీ, అనవసరమైన విషయాలకు ‘నో’ చెప్పలేకపోవడం వల్ల మన సొంత లక్ష్యాలను చేరుకోలేమని నిపుణులు హెచ్చరిస్తున్నారు.

మనం ఎందుకు ‘కాదు’ అని చెప్పలేం?
మనం ‘నో’ చెప్పలేకపోవడానికి ప్రధానంగా రెండు కారణాలు ఉంటాయి.

వ్యక్తిగత కారణాలు: ఎదుటివారు మన మాట వల్ల బాధపడతారేమో లేదా మనపై వారికి ఉన్న అభిప్రాయం మారిపోతుందేమో అన్న భయం. ఈ ఆందోళనతో మన ఇష్టాలను చంపుకుని మరీ ఇతరులకు తలొగ్గుతాం.

వృత్తిపరమైన కారణాలు: ఆఫీసులో లేదా వ్యాపారంలో ‘నో’ చెబితే మన సంబంధాలు దెబ్బతింటాయని, భవిష్యత్తులో అవకాశాలు రావని భయపడతాం. దీనివల్ల పని భారం పెరిగి మానసిక ఒత్తిడికి గురవుతాం.

‘నో’ చెప్పడం విజయానికి ఎలా దారితీస్తుంది?
నిజానికి, ‘నో’ చెప్పడం అంటే ఎదుటివారిని అవమానించడం కాదు, మన సమయానికి మనం గౌరవం ఇచ్చుకోవడం. సమయాన్ని వృథా చేయకుండా, తమ ప్రాధాన్యతలను గుర్తించి ‘నో’ చెప్పగలిగే వారే జీవితంలో ఉన్నత స్థాయికి చేరుకుంటారు. ఇతరుల పనుల కోసం మీ విలువైన కాలాన్ని ధారపోస్తే, పోటీ ప్రపంచంలో మీరు వెనుకపడే అవకాశం ఉంది .

మీ ప్రగతికి ఆటంకం కలిగించే పనులకు లేదా మీ సమయాన్ని వృథా చేసే విషయాలకు ఏమాత్రం సంకోచించకుండా సున్నితంగా ‘నో’ చెప్పండి. మీ సమయంపై మీకు నియంత్రణ ఉన్నప్పుడే మీరు విజయం వైపు వేగంగా అడుగులు వేయగలరు.