BRS: దీక్షా దివస్ పేరుతో బీఆర్ఎస్ కొత్త డ్రామా

రాష్ట్రంలో ఉనికి కోల్పోతున్న బీఆర్ఎస్ (BRS) పార్టీ, దీక్షా దివస్ పేరుతో కొత్త డ్రామాకు తెరలేపిందని టీపీసీసీ చీఫ్ మహేశ్కుమార్ గౌడ్ (Mahesh Kumar Goud) అన్నారు. గాంధీభవన్లో మహేశ్గౌడ్ మీడియా సమావేశంలో మాట్లాడుతూ తెలంగాణ రాష్ట్రం కేసీఆర్ దీక్ష వల్ల రాలేదని, సోనియాగాంధీ (Sonia Gandhi) చలవ వల్లే వచ్చిందని పేర్కొన్నారు. 2009లో కేసీఆర్ చేపట్టిన దీక్ష పూర్తిగా నాటకమని వ్యాఖ్యానించారు. కేసీఆర్ బయటికి వస్తే ప్రజలు అసహ్యించుకునే పరిస్థితి ఏర్పడిందని, బీఆర్ఎస్ శకం ముగిసిన విషయాన్ని ఆయన స్వయంగా అర్థం చేసుకున్నారని అన్నారు. రాష్ట్రం కోసం దీక్ష చేస్తున్నట్లు ప్రకటించిన కేసీఆర్, నిమ్స్ ఆస్పత్రిలో ఫ్లూయిడ్స్ తీసుకున్నారని, ఇందుకు సంబంధించి తమ వద్ద ఆధారాలు ఉన్నాయని తెలిపారు. నిజమైన దీక్ష అంటే మణిపూర్ ఐరన్ లేడీ ఇరోమ్ షర్మిలదని అన్నారు. బీఆర్ఎస్ నేతలకు చిత్తశుద్ధి ఉంటే, ముందుగా ఉద్యమంలో ప్రాణాలర్పించిన అమరులకు నివాళులర్పించాలని సూచించారు. సోనియాగాంధీ లేకుంటే తెలంగాణ వచ్చేదే కాదని స్వయంగా కేసీఆర్ అంగీకరించారని గుర్తు చేశారు. ఉస్మానియా వర్సిటీ విద్యార్థులు ఉద్యమానికి ఊపిరిగా నిలిచారన్నారు. తెలంగాణ రాష్ట్రం ఏర్పాటు సందర్భంగా అవాంఛనీయ సంఘటనలు జరగకుండా కాపాడింది అప్పటి కాంగ్రెస్ ప్రభుత్వం, నాటి సీఎం కిరణ్కుమార్రెడ్డి రాజకీయ చాణక్యమేనని తెలిపారు.