Jubilee Hills Bypoll: జూబ్లీహిల్స్ కు మోగిన నగారా.. ఏ పార్టీ బలమేంటి?

తెలంగాణ రాజకీయాలు మరోసారి జూబ్లీహిల్స్ (Jubilee Hills) అసెంబ్లీ నియోజకవర్గం చుట్టూ కేంద్రీకృతమయ్యాయి. బీఆర్ఎస్ ఎమ్మెల్యే మాగంటి గోపీనాథ్ (Maganti Gopinath) మరణంతో అనివార్యమైన ఈ ఉప ఎన్నికకు కేంద్ర ఎన్నికల సంఘం ఇవాళ షెడ్యూల్‌ను విడుదల చేసింది. బీహార్ అసెంబ్లీ ఎన్నికలతో పాటే జూబ్లీహిల్స్ ఉప ఎన్నిక (Bypoll) పోలింగ్ నిర్వహించనున్నట్లు ఈసీఐ ప్రకటించింది. అధికార కాంగ్రెస్, ప్రధాన ప్రతిపక్ష బీఆర్‌ఎస్, జాతీయ పార్టీ బీజేపీకి ఈ ఉప ఎన్నిక అత్యంత ప్రతిష్ఠాత్మకంగా మారింది. ఈ నెల 13న జూబ్లీహిల్స్ ఉప ఎన్నికకు నోటిఫికేషన్ విడుదలవనుంది. 21 వరకూ నామినేషన్లు స్వీకరిస్తారు. 22న నామినేషన్లు పరిశీలిస్తారు. నామినేషన్ల ఉపసంహరణకు 24 ఆఖరు తేదీ. వచ్చే నెల 11న పోలింగ్ జరుగుతుంది. 14న కౌంటింగ్ ఉంటుంది.

హైదరాబాద్ నగరంలోని అత్యంత సంపన్న నివాస ప్రాంతాలతో పాటు అనేక పేద బస్తీలు, ముస్లిం మైనారిటీ ప్రాంతాలను కలిగి ఉన్న జూబ్లీహిల్స్ నియోజకవర్గం భిన్నమైన సామాజిక వర్గాల సమ్మేళనం. ఇక్కడ మొత్తం 3.99 లక్షల మంది ఓటర్లు ఉన్నారు. గత అసెంబ్లీ ఎన్నికల్లో బీఆర్ఎస్ తరపున మాగంటి గోపీనాథ్ కాంగ్రెస్ అభ్యర్థి మొహమ్మద్ అజహరుద్దీన్ పై 16,337 ఓట్ల మెజారిటీతో విజయం సాధించారు. అంతకుముందు 2018, 2014 ఎన్నికల్లోనూ మాగంటి గెలుపొందడం ద్వారా ఈ స్థానంపై బీఆర్‌ఎస్ పట్టును నిరూపించుకున్నారు.

ఈ ఉపఎన్నికలో సిట్టింగ్ స్థానాన్ని నిలబెట్టుకోవడం బీఆర్ఎస్ (BRS) కు ప్రతిష్టాత్మకంగా మారింది. మాగంటి కుటుంబానికి ఉన్న పట్టు, హైదరాబాద్ లో బీఆర్ఎస్ కు సుస్థిరమైన ఓటు బ్యాంకు ఆ పార్టీకి కలిసొచ్చే అంశాలు. అందుకే దివంగత సతీమణి మాగంటి సునీతను అభ్యర్థిగా ప్రకటించడం ద్వారా సానుభూతిని తమకు అనుకూలంగా మలచుకోవాలని చూస్తోంది. వర్కింగ్ ప్రెసిడెంట్ కేటీఆర్ ఈ ఎన్నికను వ్యక్తిగత ప్రతిష్ఠగా తీసుకున్నారు. నగరంలో తమ పట్టును నిలుపుకోవడానికి బూత్ స్థాయి నుంచే పకడ్బందీ వ్యూహాలు అమలు చేస్తున్నారు. అసెంబ్లీ ఎన్నికల్లో అధికారం కోల్పోయిన తర్వాత, జీహెచ్ఎంసీ ఎన్నికలకు ముందు పార్టీకి ఈ గెలుపు అత్యంత కీలకం.

కాంగ్రెస్ (Congress) పార్టీ ఎలాగైనా బీఆర్ఎస్ సిట్టింగ్ స్థానాన్ని కైవసం చేసుకోవాలని భావిస్తోంది. అధికారంలో ఉండడం, సిక్స్ గ్యారంటీలు, ముఖ్యమంత్రి రేవంత్ రెడ్డి (CM Revanth Reddy) చరిష్మాపై ఆ పార్టీ ఆధారపడింది. సికింద్రాబాద్ కంటోన్మెంట్ ఉప ఎన్నికలో గెలిచిన ఉత్సాహం ఆ పార్టీకి ప్లస్ పాయింట్. సీఎం రేవంత్ రెడ్డి స్వయంగా ఈ ఎన్నికలపై దృష్టి సారించారు. మంత్రులు పొన్నం ప్రభాకర్, వివేక్ వెంకటస్వామి, తుమ్మల నాగేశ్వరరావులకు నియోజకవర్గ బాధ్యతలు అప్పగించారు. సామాజిక సమీకరణాలను దృష్టిలో ఉంచుకుని బీసీ వర్గానికి చెందిన అభ్యర్థిని బరిలో దింపేందుకు కాంగ్రెస్ ప్రయత్నిస్తోంది. నవీన్ యాదవ్, బొంతు రామ్మోహన్ గౌడ్, సీఎన్ రెడ్డి తదితరులు టికెట్ ఆశిస్తున్నారు. ప్రభుత్వ పథకాల ద్వారా ప్రజాకర్షణను పెంచుకోవాలని, గత బీఆర్‌ఎస్ ప్రభుత్వ వైఫల్యాలను ఎత్తిచూపాలని ప్రణాళికలు రచిస్తోంది.

జూబ్లీహిల్స్ ఉపఎన్నికల్లో సత్తా చాటాలని బీజేపీ (BJP) కూడా ప్రయత్నిస్తోంది. త్రిముఖ పోరులో ప్రభుత్వ వ్యతిరేకత తమకు కలిసొస్తుందనేది కమలం పార్టీ ఆశగా కనిపిస్తోంది. బీఆర్‌ఎస్-కాంగ్రెస్ మధ్య పోటీ జరిగితే, అది తమకు అనుకూలంగా మారుతుందని బీజేపీ భావిస్తోంది. పార్టీ రాష్ట్ర అధ్యక్షుడు నైతికంగా ఈ సీటు గెలుచుకోవడం ద్వారా రాబోయే జీహెచ్ఎంసీ ఎన్నికలకు బలమైన పునాది వేయాలని చూస్తున్నారు. గత ఎన్నికల్లో పోటీ చేసిన లంకాల దీపక్ రెడ్డి, మాజీ ఎమ్మెల్యే రామచందర్ రెడ్డి వంటి బలమైన అభ్యర్థుల పేర్లను పరిశీలిస్తున్నారు. కేంద్ర ప్రభుత్వ అభివృద్ధి, హిందుత్వ నినాదాన్ని నమ్ముకుని ప్రచారం సాగించనున్నారు.

షెడ్యూల్ విడుదల కావడంతో జూబ్లీహిల్స్ ఉప ఎన్నిక క్షేత్రస్థాయి పోరు మొదలైంది. జీహెచ్ఎంసీ ఎన్నికలకు ముందు జరుగుతున్న ఈ పోరులో గెలుపు తెలంగాణ రాజకీయ దిశను నిర్దేశించడంలో కీలక పాత్ర పోషించనుంది. త్రిముఖ పోటీ మధ్య సానుభూతి, సంక్షేమం, స్థానిక పట్టు వంటి అంశాల ఆధారంగా నవంబర్ 11న ఓటర్లు ఎవరికి పట్టం కడతారో చూడాలి.