Kavitha – PK: కవిత కొత్త పార్టీకి పీకే వ్యూహాలు ఫలించేనా?

తెలంగాణ రాజకీయ ముఖచిత్రం మరో కీలక మలుపు తిరగబోతోంది. బీఆర్ఎస్ పార్టీ అగ్ర నాయకత్వంతో విభేదాలు, అనంతర బహిష్కరణ పరిణామాల తర్వాత కల్వకుంట్ల కవిత తన రాజకీయ అస్తిత్వం కోసం సొంత గూడు ఏర్పాటుకు సిద్ధమయ్యారు. ఉగాది పర్వదినాన కొత్త పార్టీని ప్రకటించే దిశగా శరవేగంగా అడుగులు పడుతుండటం, దానికి జాతీయ స్థాయి వ్యూహకర్త ప్రశాంత్ కిశోర్ తెరవెనుక సహకారం అందిస్తుండటం ఇప్పుడు చర్చనీయాంశంగా మారింది.

కవితకు మొదటి నుంచీ ‘తెలంగాణ జాగృతి’ అనే బలమైన సాంస్కృతిక వేదిక ఉంది. మలిదశ తెలంగాణ ఉద్యమంలో బతుకమ్మ పండుగను విశ్వవ్యాప్తం చేయడం ద్వారా ఆమె ప్రజల్లోకి వెళ్లారు. ఇప్పుడు అదే జాగృతిని రాజకీయ పార్టీగా మార్చాలని ఆమె భావిస్తున్నట్లు తెలుస్తోంది. ఇప్పటికే ఉన్న కేడర్, జిల్లాల వారీగా ఉన్న నెట్‌వర్క్ ఆమెకు కలిసివచ్చే అంశం. ఎమ్మెల్సీగా వీడ్కోలు చెబుతూ ఆమె చేసిన వ్యాఖ్యలు, తాను ఒంటరిని కాదని, ప్రజల అండతో కొత్త ప్రస్థానం మొదలుపెడతానని స్పష్టం చేశాయి.

ఈ మొత్తం ఎపిసోడ్‌లో అత్యంత ఆసక్తికరమైన అంశం ప్రశాంత్ కిశోర్ ప్రమేయం. గతంలో వైఎస్ జగన్, మమతా బెనర్జీ, ఎంకే స్టాలిన్ వంటి నేతలకు అధికారాన్ని అందించిన ట్రాక్ రికార్డ్ పీకేకు ఉంది. కవితతో ఆయన వరుస భేటీలు జరిపారన్న వార్తలు రాజకీయ వర్గాల్లో ప్రకంపనలు సృష్టిస్తున్నాయి. తెలంగాణలో ప్రస్తుతం బీఆర్ఎస్, కాంగ్రెస్, బీజేపీల పట్ల ఉన్న అసంతృప్తిని కవితకు అనుకూలంగా ఎలా మలచాలో పీకే విశ్లేషించగలరు. కవితను కేవలం ఒక మాజీ నేతగా కాకుండా, ఒక బాధితురాలిగా లేదా ప్రత్యామ్నాయ శక్తిగా జనాల్లోకి తీసుకెళ్లే వ్యూహాన్ని ఆయన రచించవచ్చు.

అయితే, ఇటీవల బీహార్‌లో సొంతంగా పార్టీ పెట్టిన ప్రశాంత్ కిశోర్ ఆశించిన ఫలితాలను సాధించలేకపోయారు. గ్రౌండ్ రియాలిటీకి, వ్యూహాలకు మధ్య ఉన్న వ్యత్యాసం అక్కడ బయటపడింది. ఈ నేపథ్యంలో, తెలంగాణ వంటి ఉద్వేగభరిత రాష్ట్రంలో పీకే వ్యూహాలు కవితను ఏ మేరకు గట్టెక్కిస్తాయనేది ప్రశ్నార్థకమే.

కవిత తన కొత్త పార్టీ ద్వారా ప్రధానంగా బీఆర్ఎస్ ఓటు బ్యాంకును, ముఖ్యంగా అసంతృప్త నేతలను టార్గెట్ చేసే అవకాశం ఉంది. పార్టీ నుండి బహిష్కరణకు గురైన తర్వాత ఆమెలో పెరిగిన కసి, గత కొన్ని రోజులుగా ఆమె చేస్తున్న విమర్శలు గమనిస్తే.. కేసీఆర్ నాయకత్వంలోని బీఆర్ఎస్ ను దెబ్బతీయడమే ఆమె తక్షణ కర్తవ్యంగా కనిపిస్తోంది. ఒక రకంగా చెప్పాలంటే, సొంత తండ్రి కట్టిన కోటపైనే ఆమె తిరుగుబాటు బావుటా ఎగురవేయబోతున్నారు.

కవిత ముందున్న మార్గం అంత సులభమేమీ కాదు. తెలంగాణలో ఇప్పటికే మూడు ప్రధాన పార్టీలు బలంగా ఉన్నాయి. ఇలాంటి త్రిముఖ పోటీలో నాలుగో శక్తిగా ఎదగాలంటే బలమైన ఎజెండా ఉండాలి. కేవలం ‘రివెంజ్ పాలిటిక్స్’ తో పార్టీని నడపడం అసాధ్యం. కవిత పోరాటం కేవలం మనుగడ కోసమా? లేక తెలంగాణ రాజకీయాల్లో కింగ్ మేకర్ కావడానికా? అన్నది ఉగాది నాటి ప్రకటనతో స్పష్టమవుతుంది. ప్రశాంత్ కిశోర్ మేధస్సు, కవితకున్న వాగ్ధాటి తోడైతే తెలంగాణలో కొత్త సమీకరణాలు పుట్టుకురావడం ఖాయం. అయితే, ప్రజలు ఆమెను ఒక స్వతంత్ర శక్తిగా అంగీకరిస్తారా లేదా అనేది కాలమే నిర్ణయించాలి.