NTR: ఎన్టీఆర్ చుట్టూ జూబ్లీహిల్స్ ఉపఎన్నిక!

తెలుగు రాష్ట్రాల్లో ఎన్టీఆర్ (NTR) కున్న క్రేజ్ తెలిసిందే. ఆంధ్రుల అభిమాన నటుడిగా, తెలుగుదేశం (TDP) పార్టీ వ్యవస్థాపకుడిగా, ముఖ్యమంత్రిగా ఆయన చెరగని ముద్ర వేశారు. ఇప్పటికీ ఆయనకు ఎంతోమంది అభిమానులు ఉన్నారు. ఎప్పుడు ఎన్నికలు జరిగినా ఆయన పేరు తెరపైకి రాకుండా ఉండదు. ప్రస్తుతం జరుగుతున్న జూబ్లీహిల్స్ ఉపఎన్నికలోనూ (Jubilee Hills ByElection) ఎన్టీఆర్ పేరు ప్రముఖంగా వినిపిస్తోంది. తెలుగుదేశం పార్టీ బరిలో దిగకపోవడంతో ఎన్టీఆర్ అభిమానుల ఓట్ల కోసం మూడు ప్రధాన పార్టీలూ తీవ్రంగా శ్రమిస్తున్నాయి. ఎన్టీఆర్ పై ప్రేమను చూపిస్తున్నాయి. ఎన్టీఆర్ కేంద్రంగా పార్టీల నేతలు మాటల తూటాలు పేల్చుకుంటున్నారు.

ముఖ్యమంత్రి రేవంత్ రెడ్డి (CM Revanth Reddy) ఎన్టీఆర్ అభిమానుల ఓట్లపై పూర్తి ధీమా వ్యక్తం చేస్తున్నారు. టీడీపీ పుట్టడానికి ప్రధాన కారణమైన కాంగ్రెస్ (Congress) వ్యతిరేకత అనేది ఇప్పుడు లేదని, ప్రస్తుత రాజకీయ పరిస్థితులు మారాయని ఆయన ఘంటాపథంగా చెబుతున్నారు. ఎన్టీఆర్ ఆశయాలు, రాజకీయ మార్పును కాంక్షించే టీడీపీ అభిమానులు రాష్ట్రంలో అధికారంలో ఉన్న కాంగ్రెస్ పార్టీకే ఓటు వేస్తారని రేవంత్ రెడ్డి స్పష్టం చేస్తున్నారు. దివంగత ఎమ్మెల్యే మాగంటి గోపీనాథ్ (Maganti Gopinath) బీఆర్‌ఎస్‌లో చేరకముందు టీడీపీ నేతగా ఉండేవారని గుర్తు చేశారు. కాబట్టి ఆయన అభిమానులంతా బీఆర్‌ఎస్‌కు (BRS) కాకుండా, కాంగ్రెస్ వైపు మొగ్గు చూపుతారని ఆయన పరోక్షంగా సూచిస్తున్నారు. అంతేకాక బీఆర్ఎస్ హయాంలో ఎన్టీఆర్ కు జరిగిన అవమానాలను రేవంత్ రెడ్డి ప్రధానాస్త్రాలుగా వాడుతున్నారు.

బీఆర్ఎస్ (BRS) వర్కింగ్ ప్రెసిడెంట్ కేటీఆర్ (KTR) కూడా ఎన్టీఆర్ అభిమానుల ఓట్లను తమ పార్టీకే దక్కుతాయని గట్టిగా వాదిస్తున్నారు. తన పేరునే ప్రధాన అస్త్రంగా చేసుకుని ఆయన కాంగ్రెస్ వాదనను తిప్పికొడుతున్నారు. తన పేరులో తారక రామారావు ఉండడం అనేది ఎన్టీఆర్‌పై తమ కుటుంబానికి, పార్టీకి ఉన్న అభిమానాన్ని తెలియజేస్తుందని కేటీఆర్ పేర్కొన్నారు. ఈ భావోద్వేగ బంధం కారణంగానే ఎన్టీఆర్ అభిమానులంతా బీఆర్‌ఎస్‌కు మద్దతు ఇస్తారని చెబుతున్నారు. జూబ్లీహిల్స్ మాజీ ఎమ్మెల్యే మాగంటి గోపీనాథ్ తన చివరి శ్వాస వరకు ఎన్టీఆర్ అభిమానిగా ఉన్నారని, ఆయన్ని మించిన ఎన్టీఆర్ అభిమాని ఎవరుంటారని కేటీఆర్ ప్రశ్నించారు. గోపీనాథ్ సతీమణి, బీఆర్ఎస్ అభ్యర్థి అయిన మాగంటి సునీతకు ఎన్టీఆర్ అభిమానులు, టీడీపీ వర్గం ఓటు వేయడం ద్వారా గోపీనాథ్‌కు నివాళులు అర్పిస్తారని కేటీఆర్ ప్రచారం చేస్తున్నారు.

ఇక టీడీపీ మద్దతుదారుల ఓట్లపై భారతీయ జనతా పార్టీ (BJP) కూడా గంపెడు ఆశలు పెట్టుకుంది. కేంద్రంలో, ఆంధ్రప్రదేశ్‌లో బీజేపీతో కలిసి టీడీపీ, జనసేన పనిచేస్తున్నాయి. కాబట్టి టీడీపీ, జనసేన మద్దతుదారులు సహజంగానే తమ వైపే ఉంటారని బీజేపీ నేతలు భావిస్తున్నారు. ఏపీలో ఈ కూటమి ప్రభావం జూబ్లీహిల్స్ లో కనిపించే అవకాశం ఉందని బీజేపీ అంచనా వేస్తోంది. టీడీపీ శ్రేణులు తమ కూటమి ధర్మాన్ని అనుసరించి బీజేపీ అభ్యర్థికే ఓటు వేయాలని బీజేపీ నాయకులు తమ ప్రచారంలో విజ్ఞప్తి చేస్తున్నారు.