Gali Janardhan Reddy : గాలి జనార్ధన్ రెడ్డికి బిగ్ రిలీఫ్.. సీబీఐ కోర్టు తీర్పుపై హైకోర్టు స్టే..!!

కర్ణాటక మాజీ మంత్రి, ఖనిజ వ్యాపారవేత్త గాలి జనార్ధన్ రెడ్డికి (Gali Janardhan Reddy) తెలంగాణ హైకోర్టులో (telangana High Court) పెద్ద ఊరట లభించింది. అక్రమ ఖనిజ తవ్వకాల కేసులో సీబీఐ కోర్టు (CBI Court) ఇచ్చిన తీర్పుపై తెలంగాణ హైకోర్టు స్టే విధించింది. అంతేకాకుండా, జనార్ధన్ రెడ్డికి షరతులతో కూడిన బెయిల్ మంజూరు చేస్తూ హైకోర్టు కీలక ఆదేశాలు జారీ చేసింది. ఈ కేసు రాజకీయ, చట్టపరమైన వర్గాల్లో తీవ్ర చర్చనీయాంశంగా మారింది.

గాలి జనార్ధన్ రెడ్డి బళ్లారి (Bellari) జిల్లాకు చెందిన ప్రముఖ రాజకీయ నాయకుడు. బీజేపీ మాజీ నేత. ఓబుళాపురం మైనింగ్ కంపెనీ (OMC) అధినేత. అక్రమ ఖనిజ తవ్వకాళ ఆరోపణలపై ఆయనపై కేసులు నమోదయ్యాయి. వాటిలో నేరం రుజువైంది. సీబీఐ కోర్టు ఆయనకు జైలు శిక్ష విధించింది. సీబీఐ కోర్టు తీర్పు అతనికి పెద్ద ఎదురుదెబ్బగా మారింది. దీంతో అతను హైకోర్టును ఆశ్రయించాడు.

జనార్ధన్ రెడ్డి దాఖలు చేసిన అప్పీల్‌ను పరిగణనలోకి తీసుకుని తెలంగాణ హైకోర్టు.. సీబీఐ కోర్టు తీర్పుపై స్టే విధించింది. దీంతో జనార్ధన్ రెడ్డికి తాత్కాలిక ఉపశమనం లభించింది. అదే సమయంలో.. హైకోర్టు అతనికి షరతులతో కూడిన బెయిల్ మంజూరు చేసింది. ఈ షరతుల్లో రూ.10 లక్షల చొప్పున ఇద్దరు షూరిటీలు సమర్పించాలని, దేశం విడిచి ఎక్కడికీ వెళ్లకూడదని, తన పాస్‌పోర్ట్‌ ను కోర్టుకు సరెండర్ చేయాలని హైకోర్టు ఆదేశించింది. ఈ షరతులు కఠినంగా ఉన్నప్పటికీ, బెయిల్ మంజూరు కావడం జనార్ధన్ రెడ్డి శిబిరంలో ఆనందాన్ని నింపింది.

గాలి జనార్ధన్ రెడ్డి గతంలో బళ్లారి, అనంతపురంజ జిల్లాల సరిహద్దుల్లో మైనింగ్ వ్యాపారం చేశారు. అతని సోదరులు కూడా ఈ వ్యాపారంలో భాగస్వాములుగా ఉన్నారు. 2010-11 సమయంలో జరిగిన అక్రమ ఖనిజ కార్యకలాపాలు దేశవ్యాప్తంగా సంచలనం సృష్టించాయి. ఈ కేసులో సీబీఐ దర్యాప్తు చేపట్టి, జనార్ధన్ రెడ్డితో పాటు ఇతరులపై కేసులు నమోదు చేసింది. ఈ దర్యాప్తు ఫలితంగా అతను కొంతకాలం జైలు శిక్ష కూడా అనుభవించాడు. అయితే, రాజకీయంగా, చట్టపరంగా అతను తన పోరాటాన్ని కొనసాగించాడు.

హైకోర్టు ఇచ్చిన ఈ తాజా తీర్పు జనార్ధన్ రెడ్డి రాజకీయ భవిష్యత్తుపై కూడా ప్రభావం చూపనుంది. గతంలో బీజేపీలో కీలక నాయకుడిగా ఉన్న అతను, ప్రస్తుతం సొంతంగా రాజకీయ కార్యకలాపాలు నిర్వహిస్తున్నాడు. ఈ కేసు తీర్పు అతని రాజకీయ ఆశలకు కొత్త ఊపిరి పోసే అవకాశం ఉందని విశ్లేషకులు భావిస్తున్నారు. అయితే, షరతులతో కూడిన బెయిల్ కారణంగా అతని కదలికలపై కొన్ని పరిమితులు ఉంటాయని కూడా స్పష్టమవుతోంది.

రాజకీయ వర్గాల్లో ఈ తీర్పుపై మిశ్రమ స్పందనలు వ్యక్తమవుతున్నాయి. జనార్ధన్ రెడ్డి మద్దతుదారులు ఈ నిర్ణయాన్ని స్వాగతిస్తుండగా, వ్యతిరేక వర్గాలు ఈ కేసు ఇంకా పూర్తిగా ముగియలేదని, భవిష్యత్తులో మరిన్ని చట్టపరమైన సవాళ్లు ఎదురుకావచ్చని అభిప్రాయపడుతున్నారు. సీబీఐ కూడా ఈ తీర్పుపై తదుపరి చర్యల గురించి ఆలోచిస్తున్నట్లు సమాచారం.