Congress: జూబ్లీహిల్స్ ఉపఎన్నిక.. కాంగ్రెస్ భయపడుతోందా?

జూబ్లీహిల్స్ ఉపఎన్నిక (Jubilee Hills ByElection) రాష్ట్ర రాజకీయాల్లో హాట్ టాపిక్‌గా మారింది. నవంబర్ 11న జరగనున్న ఈ ఉపఎన్నికలో విజయం కోసం అధికార కాంగ్రెస్ (Congress), ప్రతిపక్ష బీఆర్ఎస్ (BRS) పార్టీలు సర్వశక్తులు ఒడ్డుతున్నాయి. ముఖ్యంగా బీఆర్ఎస్ సిట్టింగ్ స్థానం కావడంతో, దానిని ఎలాగైనా కైవసం చేసుకోవాలని చూస్తున్న కాంగ్రెస్ పార్టీకి ఊహించని ప్రతికూల పరిస్థితులు ఎదురవుతున్నాయా అనే చర్చ రాజకీయ వర్గాల్లో జరుగుతోంది.

బీఆర్ఎస్ పార్టీ ఈ ఉపఎన్నికను కాంగ్రెస్ పాలనపై రెఫరెండంగా మార్చేందుకు ప్రయత్నిస్తోంది. సీఎం రేవంత్ రెడ్డి ఇచ్చిన హామీలు నెరవేర్చలేదని, తెలంగాణ ప్రజలకు ప్రభుత్వం బాకీ పడిందని ఇంటింటికీ వెళ్లి బలంగా ప్రచారం చేస్తోంది. మాగంటి గోపీనాథ్ (Maganti Gopinath) మరణంతో ఆయన భార్యకు టికెట్ ఇవ్వడం ద్వారా బీఆర్ఎస్ సానుభూతి అనే బలమైన అస్త్రాన్ని ప్రయోగిస్తోంది. కాంగ్రెస్ అభ్యర్థి నవీన్ యాదవ్ (Navin Yadav) ను రౌడీ షీటర్‌గా బీఆర్ఎస్ పెద్దఎత్తున ప్రచారం చేస్తూ, ఆయన ఇమేజ్‌ను దెబ్బతీసేందుకు ప్రయత్నిస్తోంది. దీంతో ఈ స్థానంలో గెలుపుపై కాంగ్రెస్ పార్టీలో కాస్త డైలమాలో ఉందనే ప్రచారం జరుగుతోంది.

కాంగ్రెస్ పార్టీలో నెలకొన్న ఈ అంచనాల నేపథ్యంలోనే, ఏ చిన్న అవకాశాన్ని వదులుకోకూడదనే ఉద్దేశంతో ముఖ్యమంత్రి రేవంత్ రెడ్డి (Revanth Reddy) ఒక కీలకమైన వ్యూహాత్మక నిర్ణయం తీసుకున్నట్లు కనిపిస్తోంది. మైనారిటీ నేత, మాజీ క్రికెటర్ అజారుద్దీన్ ను (Azharuddin) హడావుడిగా కేబినెట్‌లోకి తీసుకునేందుకు రేవంత్ రెడ్డి సిద్ధమయ్యారు. ఎమ్మెల్సీగా గవర్నర్ నుంచి ఇంకా ఆమోదముద్ర పడకుండానే ఈ సమయంలో అజారుద్దీన్‌ను మంత్రివర్గంలోకి తీసుకోవడం వెనుక ప్రధాన కారణం జూబ్లీహిల్స్ ఉపఎన్నికే అనే ఊహాగానాలు బలంగా వినిపిస్తున్నాయి. జూబ్లీహిల్స్ నియోజకవర్గంలో మైనారిటీ ఓటర్లు ఫలితాన్ని ప్రభావితం చేయగల స్థాయిలో ఉన్నారు. కాంగ్రెస్ పార్టీకి ఎంఐఎం మద్దతు ఇస్తున్నప్పటికీ, కాంగ్రెస్‌లో ఇంకా పూర్తిస్థాయిలో నమ్మకం కలగలేదనే టాక్ వినిపిస్తోంది.

మాగంటి గోపీనాథ్ వ్యక్తిత్వం, మైనారిటీలతో ఆయనకు ఉన్న సత్సంబంధాలు బీఆర్ఎస్‌కు అనుకూలంగా మారే అవకాశం ఉంది. ఈ పరిస్థితిని ఎదుర్కోవాలంటే, మైనారిటీ వర్గం నుంచి బలమైన నేతను రంగంలోకి దించడమే సరైన మార్గం అని కాంగ్రెస్ అధిష్టానం భావించినట్లు తెలుస్తోంది. అందుకే అజారుద్దీన్‌ను తెరపైకి తెచ్చి, ముస్లిం ఓట్లను ఏకతాటిపైకి తెచ్చే ప్రయత్నం చేస్తోందని రాజకీయ విశ్లేషకులు అభిప్రాయపడుతున్నారు. కాంగ్రెస్ పార్టీ హడావుడి నిర్ణయంపై ప్రతిపక్షాలు తీవ్రంగా విమర్శిస్తున్నాయి. ఓటమి భయంతోనే కాంగ్రెస్ పార్టీ ఇలాంటి రాజ్యాంగ విరుద్ధమైన చర్యలకు పాల్పడుతోందని, తమ ప్రభుత్వంపై ప్రజల్లో విశ్వాసం లేదని తెలుసుకునే ఈ తరహా ఎత్తుగడలకు పాల్పడుతున్నారని బీఆర్ఎస్, బీజేపీ ఆరోపిస్తున్నాయి.

జూబ్లీహిల్స్ ఉపఎన్నికలో గెలుపు కాంగ్రెస్‌కు ప్రతిష్టాత్మకం. బీఆర్ఎస్ వ్యూహాత్మక ఎదురుదాడి, సానుభూతి అంశం, అలాగే అభ్యర్థిపై ప్రతికూల ప్రచారం నేపథ్యంలో కాంగ్రెస్ అజారుద్దీన్ కార్డును ఉపయోగించి, మైనారిటీ ఓట్లను తమవైపు తిప్పుకోవాలని చూస్తోంది. ఈ వ్యూహం ఎంతవరకు ఫలిస్తుంది, కేబినెట్ విస్తరణ ఉపఎన్నికపై ఏ మేరకు ప్రభావం చూపుతుంది అనేది నవంబర్ 14న తేలనుంది.