హరీశ్‌రావు రాజీనామా చేయాలి… లేదంటే : సీఎం రేవంత్‌

రుణమాఫీ చేయలేరని కాంగ్రెస్‌ ప్రభుత్వం రుణమాఫీ చేస్తే సిద్దిపేట ఎమ్మెల్యే పదవికి రాజీనామా చేస్తానని హరీశ్‌రావు సవాల్‌ చేశారు. రుణమాఫీ అమలు చేశాం. హరీశ్‌రావు రాజీనామా చేయాలి లేదంటే తెలంగాణ రైతాంగానికి క్షమాపణ చెప్పాలి. అమర వీరుల స్తూపం వద్ద ముక్కు నేలకు రాయాలి. తాను విసిరిన సవాల్‌ను వెనక్కి తీసుకుంటున్నట్టు హరీశ్‌రావు చెప్పాలి అని తెలంగాణ ముఖ్యమంత్రి రేవంత్‌ రెడ్డి డిమాండ్‌ చేశారు. సాగుకు జీవం, రైతుకు ఊతం పేరుతో ఖమ్మం జిల్లా వైరాలో ఏర్పాటు చేసిన బహిరంగ సభలో  రేవంత్‌రెడ్డి మాట్లాడారు. వరంగల్‌ వేదికగా తెలంగాణ రైతులకు రుణమాపీ చేస్తామని రాహుల్‌ గాంధీ మాట ఇచ్చారు. ఇచ్చిన హామీ మేరకు రూ.31 వేల కోట్లతో రుణమాఫీ చేశామన్నారు. 

ఖమ్మం గడ్డ కాంగ్రెస్‌ అడ్డా. ఖమ్మం జిల్లా రైతాంగానికి అండగా నిలిచేందుకే ఈ ప్రాంతానికి వచ్చా. 2026 పంద్రాగస్టు లోపు సీతారామ ప్రాజెక్టు పూర్తి చేసి ఖమ్మం జిల్లాలోని 7 లక్షల ఎకరాలకు సాగునీరు అందించే బాధ్యత ఈ ప్రభుత్వం తీసుకుంటుది. రెండు పడక గదుల ఇళ్ల పేరిట కేసీఆర్‌ మోసం చేశారు. మేం నియోజకవర్గానికి 3,500 చొప్పున ఇందిరమ్మ ఇళ్లు అందిస్తాం. రాష్ట్ర వ్యాప్తంగా 4.5 లక్షల ఇందిరమ్మ ఇళ్లు కట్టిస్తాం. ఆరు గ్యారంటీల అమలులకు నిరంతరం కష్టపడుతున్నాం అని తెలిపారు.