KCR: రేపు మీడియా ముందుకు కేసీఆర్.. సరికొత్త ఉద్యమానికి యాక్షన్ ప్లాన్!?

తెలంగాణ రాజకీయాల్లో మరోసారి వేడి రాజుకోనుంది. భారత్ రాష్ట్ర సమితి (BRS) అధినేత, మాజీ ముఖ్యమంత్రి కల్వకుంట్ల చంద్రశేఖర్ రావు సుదీర్ఘ విరామం తర్వాత రేపు పార్టీ ప్రధాన కార్యాలయం తెలంగాణ భవన్ కు రానున్నారు. మధ్యాహ్నం 2 గంటలకు నిర్వహించనున్న BRSLP, రాష్ట్ర కార్యవర్గ సంయుక్త భేటీకి ఆయన అధ్యక్షత వహించనున్నారు. రాష్ట్రంలో మారుతున్న రాజకీయ సమీకరణలు, కాంగ్రెస్ ప్రభుత్వ వైఫల్యాలు, ముఖ్యంగా సాగునీటి రంగంలో తెలంగాణకు జరుగుతున్న అన్యాయంపై ఈ భేటీలో కేసీఆర్ దిశానిర్దేశం చేయనున్నారు.

గత అసెంబ్లీ ఎన్నికల అనంతరం క్షేత్రస్థాయి రాజకీయాలకు దూరంగా ఉన్న కేసీఆర్, ఇప్పుడు పూర్తిస్థాయి యాక్షన్ మోడ్‌లోకి వచ్చినట్లు తెలుస్తోంది. రేపటి సమావేశం కేవలం సాధారణ భేటీ కాదని, రాబోయే రోజుల్లో ప్రభుత్వంపై చేపట్టబోయే రెండో విడత ప్రజా ఉద్యమానికి ఇది నాంది అని పార్టీ వర్గాలు గట్టిగా నమ్ముతున్నాయి. చాలా కాలం తర్వాత కేసీఆర్ స్వయంగా తెలంగాణ భవన్ మెట్లు ఎక్కుతుండటంతో అటు పార్టీ శ్రేణుల్లో, ఇటు రాజకీయ వర్గాల్లో సర్వత్రా ఆసక్తి నెలకొంది.

ఈ సమావేశంలో ప్రధానంగా నీటి ప్రాజెక్టులపై చర్చించనున్నట్టు సమాచారం. ఆంధ్రప్రదేశ్ ప్రభుత్వం చేపడుతున్న అక్రమ ప్రాజెక్టుల వల్ల తెలంగాణ ప్రయోజనాలు దెబ్బతింటున్నాయని, దీనిపై ప్రస్తుత కాంగ్రెస్ ప్రభుత్వం మెతక వైఖరి అవలంబిస్తోందని బీఆర్ఎస్ ఆరోపిస్తోంది. కృష్ణా, గోదావరి నదులపై ఏపీ నిర్మిస్తున్న ప్రాజెక్టుల వల్ల దక్షిణ తెలంగాణ ఎడారిగా మారే ప్రమాదం ఉందని కేసీఆర్ భావిస్తున్నారు. ప్రాజెక్టుల నిర్వహణను కేఆర్ఎంబీ (KRMB)కి అప్పగించే అంశంపైన కూడా ప్రభుత్వ వైఖరి సరికాదని బీఆర్ఎస్ భావిస్తోంది. జలదోపిడీని అడ్డుకోవడంలో ప్రభుత్వం విఫలమైతే, ప్రజలను సమీకరించి పాదయాత్రలు లేదా భారీ బహిరంగ సభల ద్వారా ఒత్తిడి పెంచేలా కార్యాచరణ రూపొందించనున్నారు.

పార్టీని క్షేత్రస్థాయిలో బలోపేతం చేయడంపై కేసీఆర్ ప్రత్యేక దృష్టి సారించనున్నారు. గత ఏడాది కాలంలో కొందరు నేతలు పార్టీ వీడటం, క్యాడర్‌లో నెలకొన్న నైరాశ్యాన్ని తొలగించేందుకు ఈ సమావేశం వేదిక కానుంది. గ్రామ స్థాయి నుంచి రాష్ట్ర స్థాయి వరకు కమిటీల పునర్నిర్మాణం చేపట్టనున్నారు. పార్టీ అనుబంధ విభాగాల్లో కొత్త రక్తాన్ని నింపాలనుకుంటున్నారు. అంతేకాక, ప్రభుత్వ వ్యతిరేక విధానాలను ప్రజల్లోకి ఎలా తీసుకెళ్లాలనే అంశంపై పార్టీ నేతలకు శిక్షణ ఇవ్వనున్నారు.

అంతర్గత సమావేశం అనంతరం కేసీఆర్ మీడియాతో మాట్లాడే అవకాశం ఉంది. ఒకవేళ ఆయన ప్రెస్ కాన్ఫరెన్స్ నిర్వహిస్తే, అది రాజకీయంగా పెను సంచలనం సృష్టించే అవకాశం ఉంది. కాంగ్రెస్ ప్రభుత్వం అమలు చేస్తున్న ఆరు గ్యారెంటీలు, ప్రస్తుత రాష్ట్ర ఆర్థిక పరిస్థితి, శాంతిభద్రతల అంశాలపై ఆయన విరుచుకుపడే అవకాశం ఉందని విశ్లేషకులు భావిస్తున్నారు.

తెలంగాణ భవన్‌కు కేసీఆర్ రాక అనేది పార్టీ శ్రేణులకు ఒక బూస్ట్ లాంటిది. పార్టీని తిరిగి రేసులోకి తీసుకురావడానికి తెలంగాణ సెంటిమెంట్ ను, నీళ్లు నిధుల నినాదాన్ని మళ్లీ తెరపైకి తెస్తున్నట్లు స్పష్టమవుతోంది. ముఖ్యంగా పాలమూరు-రంగారెడ్డి ఎత్తిపోతల పథకం, కాళేశ్వరం ప్రాజెక్టుపై జరుగుతున్న ప్రచారాన్ని తిప్పికొట్టేలా కేసీఆర్ తన గళాన్ని విప్పనున్నారు. మొత్తానికి, రేపటి తెలంగాణ భవన్ భేటీ రాష్ట్ర రాజకీయాల్లో ఒక మలుపుగా మారబోతోంది. కేసీఆర్ ఇచ్చే పిలుపుతో గులాబీ దళం ఏ మేరకు కదులుతుందో, అది అధికార పక్షానికి ఎంతవరకు సవాల్ విసురుతుందో వేచి చూడాలి.