KCR: పార్టీని కాపాడుకోవడం కేసీఆర్‌కు కత్తిమీద సామేనా..?

తెలంగాణ రాజకీయాల్లో (Telangana Politics) బీఆర్ఎస్ (BRS) గత ఏడాది కాలంగా అనేక సవాళ్లను ఎదుర్కొంటోంది. 2023 అసెంబ్లీ ఎన్నికల్లో అధికారం కోల్పోయిన తర్వాత.. పార్టీ అధ్యక్షుడు కేసీఆర్ (KCR) నాయకత్వం పట్ల పార్టీలోనే అసంతృప్తి వ్యక్తమవుతోంది. ఈ నేపథ్యంలో కేసీఆర్ కుమార్తె, బీఆర్ఎస్ ఎమ్మెల్సీ కల్వకుంట్ల కవిత (Kavitha) ఇటీవల చేసిన వ్యాఖ్యలు పార్టీలోని అంతర్గత సంక్షోభాన్ని మరింత జటిలం చేశాయి. బీఆర్ఎస్‌ను బీజేపీలో (BJP) విలీనం చేసే కుట్ర జరుగుతోందని కవిత ఆరోపించడం రాజకీయ వర్గాల్లో కలకలం రేపింది. ఈ ఆరోపణలు, కుటుంబ కలహాలు, పార్టీ అస్తిత్వ సంక్షోభం కేసీఆర్ నాయకత్వాన్ని ప్రశ్నార్థకం చేస్తున్నాయి.

బీఆర్ఎస్‌ను బీజేపీలో విలీనం చేసేందుకు పార్టీలోని కొందరు కుట్ర చేస్తున్నారని కవిత ఆరోపించారు. గత ఏడాది ఢిల్లీ లిక్కర్ పాలసీ కేసులో తాను జైలులో ఉన్నప్పుడు ఈ ప్రతిపాదన తన దృష్టికి వచ్చిందని, దాన్ని తాను గట్టిగా వ్యతిరేకించానని తెలిపారు. బీఆర్ఎస్ తెలంగాణ ప్రజల కోసం ఉన్న ప్రాంతీయ పార్టీ. దాన్ని ఏ జాతీయ పార్టీలోనూ విలీనం చేయకూడదు అని కవిత స్పష్టం చేశారు. ఈ వ్యాఖ్యలు పార్టీలోని అంతర్గత విభేదాలను బహిర్గతం చేశాయి. ముఖ్యంగా.. తన సోదరుడు, బీఆర్ఎస్ వర్కింగ్ ప్రెసిడెంట్ కేటీఆర్ (KTR) ను కవిత పరోక్షంగా టార్గెట్ చేశారు. పార్టీని నడిపిస్తున్న తీరుపై ఆమె అసంతృప్తి వ్యక్తం చేశారు.

మే 2న కేసీఆర్‌కు తాను రాసిన ఆరు పేజీల లేఖ లీక్ కావడం ఈ వివాదానికి మూలం. ఈ లేఖలో కేసీఆర్ బీజేపీని తక్కువగా విమర్శించడం, బీసీ రిజర్వేషన్ల విషయంలో నిశ్శబ్దంగా ఉండటం, పార్టీ నాయకులు అందుబాటులో లేకపోవడం వంటి అంశాలపై కవిత అసంతృప్తి వ్యక్తం చేశారు. ఈ లేఖ లీక్ కావడంతో పార్టీలోని కొందరు తనను ఒంటరిని చేసేందుకు కుట్ర చేస్తున్నారని ఆమె ఆరోపించారు. నా లేఖ ఎవరు లీక్ చేశారో బయట పెట్టాలని ఆమె డిమాండ్ చేశారు.

కవిత వ్యాఖ్యలు కేసీఆర్ కుటుంబంలోని విభేదాలను బహిర్గతం చేశాయి. కేటీఆర్‌పై ఆమె చేసిన పరోక్ష విమర్శలు, పార్టీలో కేసీఆర్ తర్వాతి నాయకత్వం కోసం కవిత, కేటీఆర్ మధ్య పోటీ ఉందనే ఊహాగానాలకు ఊతమిచ్చాయి. తన నాయకుడు కేసీఆర్ మాత్రమేనని, వేరొకరి నాయకత్వంలో నేను పనిచేయనని కవిత స్పష్టం చేశారు. ఇది కేటీఆర్‌కు వ్యతిరేకంగా ఆమె రణరంగం సిద్ధం చేస్తున్నారనే అభిప్రాయాన్ని కలిగించింది. కేటీఆర్ ప్రస్తుతం విదేశీ పర్యటనలో ఉండగా.. విదేశాల్లో ఏం జరుపుకుంటున్నారు? గ్రామస్థాయిలో ఎందుకు ఏమీ చేయడం లేదు? అని కవిత ప్రశ్నించారు.

కేసీఆర్ నాయకత్వంపై కూడా కవిత వ్యాఖ్యలు పరోక్షంగా ప్రశ్నలు లేవనెత్తాయి. కేసీఆర్ ఒక దేవుడిలాంటి వాడు, కానీ చుట్టూ దెయ్యాలు ఉన్నాయి అని ఆమె వ్యాఖ్యానించారు. ఈ వ్యాఖ్యలు పార్టీలోని అంతర్గత గందరగోళాన్ని, నాయకత్వంలోని లోటుపాట్లను సూచిస్తున్నాయి. అదే సమయంలో కేసీఆర్‌ను కాళేశ్వరం ప్రాజెక్టు విచారణ కమిషన్ నోటీసులు ఇవ్వడంపై పార్టీ నిశ్శబ్దంగా ఉండటాన్ని కవిత తప్పుపట్టారు. కాంగ్రెస్ ప్రభుత్వం మన నాయకుల ఇళ్లకు బుల్డోజర్లు పంపినప్పుడు ఎందుకు నిరసనలు చేయలేదు? అని ఆమె ఆగ్రహం వ్యక్తం చేశారు.

కేసీఆర్ ఒకప్పుడు తెలంగాణ ఉద్యమాన్ని విజయవంతంగా నడిపించి రాష్ట్ర సాధనలో కీలక పాత్ర పోషించారు. అయితే, 2023 ఎన్నికల్లో ఓటమి, కాంగ్రెస్ అధికారంలోకి రావడం, కాళేశ్వరం ప్రాజెక్టు విచారణ, కవిత అరెస్ట్ వంటి సంఘటనలు ఆయన నాయకత్వాన్ని బలహీనపరిచాయి. పార్టీ క్యాడర్‌లో నీరసం, నాయకత్వంలోని అంతర్గత విభేదాలు బీఆర్ఎస్‌ను సంక్షోభంలోకి నెట్టాయి. కవిత ఆరోపణలు, కుటుంబ కలహాలు ఈ సంక్షోభాన్ని మరింత తీవ్రతరం చేశాయి. బీజేపీ లేదా కాంగ్రెస్‌తో విలీనం కాకుండా, బీఆర్ఎస్ తన అస్తిత్వాన్ని కాపాడుకోగలదా అనేది ప్రస్తుతం పెద్ద ప్రశ్నగా మారింది.