BRS: గతం ఘనం.. మరి వర్తమానం? ‘దీక్షా దివస్’ వేళ బీఆర్ఎస్ ఆత్మపరిశీలన చేసుకోవాల్సిందేనా?

తెలంగాణ (Telangana) చరిత్రను మలుపు తిప్పిన రోజుల్లో ‘నవంబర్ 29’కి ఉన్న ప్రాముఖ్యత అంతా ఇంతా కాదు. ఒకప్పటి ఉద్యమ పార్టీగా, నేటి ప్రధాన ప్రతిపక్షంగా ఉన్న భారత రాష్ట్ర సమితి (BRS) ప్రస్థానంలో ఈ తేదీకి ఒక ప్రత్యేక స్థానం ఉంది. సరిగ్గా 15 ఏళ్ల క్రితం, 2009 నవంబర్ 29న నాటి టీఆర్ఎస్ (TRS) అధినేత కేసీఆర్ (KCR) చేపట్టిన ఆమరణ నిరాహార దీక్ష తెలంగాణ ఉద్యమ గమనాన్ని పూర్తిగా మార్చేసింది. “తెలంగాణ వచ్చుడో.. కేసీఆర్ సచ్చుడో” అనే ఒక్క నినాదం కోట్లాది మందిని కదిలించింది. ఆనాడు కేసీఆర్ చూపిన తెగువ, ప్రజల భావోద్వేగం కేంద్ర ప్రభుత్వం మెడలు వంచాయి. ఫలితంగా డిసెంబర్ 9న తెలంగాణ ఏర్పాటు ప్రకటన వెలువడింది. అందుకే బీఆర్ఎస్ ఈ రోజును ‘దీక్షా దివస్’గా (Deeksha Diwas) భావిస్తుంది. కానీ, నాడు పని చేసిన ఆ సెంటిమెంట్, నేటి రాజకీయ ముఖచిత్రంలో పని చేస్తుందా? అన్నదే ఇప్పుడు మిలియన్ డాలర్ల ప్రశ్న.

తెలంగాణ రాష్ట్రం ఏర్పడిన తర్వాత బీఆర్ఎస్ (BRS) పదేళ్లపాటు అధికారాన్ని అనుభవించింది. అయితే, రాష్ట్ర సాధన సమయంలో ప్రజలు ఆ పార్టీని ఒక ఉద్యమ వేదికగా చూశారు. కానీ, అధికారం చేపట్టిన తర్వాత అది పూర్తిగా రాజకీయ పార్టీగా రూపాంతరం చెందింది. ఈ మార్పును జనం కూడా గమనించారు. మిగిలిన రాజకీయ పార్టీల మాదిరిగానే బీఆర్ఎస్ ను కూడా చూడటం అలవాటు చేసుకున్నారు. గత అసెంబ్లీ ఎన్నికల్లో ఆ పార్టీ ఓటమి, ఆ వెంటనే జరిగిన పార్లమెంట్ ఎన్నికల్లో కనీసం ఒక్క సీటు కూడా దక్కించుకోలేకపోవడం దీనికి నిదర్శనం. ప్రజల్లో సెంటిమెంట్ స్థానంలో రాజకీయ విచక్షణ పెరిగిందనడానికి ఇంతకంటే ఉదాహరణ అవసరం లేదు. కేవలం సెంటిమెంట్ రగిల్చి, ఎల్లకాలం రాజకీయ పబ్బం గడుపుకోవాలనుకుంటే అది సాధ్యం కాదని గత ఫలితాలు స్పష్టం చేశాయి.

బీఆర్ఎస్ గతంలో సీమాంధ్ర నాయకత్వాన్ని విమర్శించడం ద్వారా తెలంగాణ ఆత్మగౌరవ నినాదాన్ని ఎత్తుకునేది. కానీ, ఇప్పుడు ఆ ఫార్ములాను ప్రయోగిస్తే అది మూర్ఖత్వమే అవుతుంది. సీమాంధ్రులను తిడితే తెలంగాణ ప్రజలు ఓట్లు వేస్తారనుకోవడం భ్రమ అని తాజా పరిణామాలు రుజువు చేస్తున్నాయి. హైదరాబాద్ లోని సెటిలర్లు, సీమాంధ్ర మూలాలున్న ఓటర్లు ఒకప్పుడు బీఆర్ఎస్ కు అండగా నిలిచారు. కానీ, కంటోన్మెంట్, జూబ్లీహిల్స్ వంటి ఉపఎన్నికల ఫలితాలు చూస్తే.. ఆ ఓటు బ్యాంక్ ఇప్పుడు కాంగ్రెస్ వైపు మళ్లినట్లు స్పష్టంగా అర్థమవుతోంది. ఇలాంటి పరిస్థిల్లో ఇంకా పాత సెంటిమెంట్ నే నమ్ముకోవడం పార్టీకి నష్టమే తప్ప లాభం చేకూర్చదు.

బీఆర్ఎస్ అంటే కేసీఆర్.. కేసీఆర్ అంటేనే బీఆర్ఎస్. తెలంగాణ ప్రజల మనసులో ముద్రపడిన ఈ సమీకరణం ఇప్పుడు పార్టీకి ప్రతికూలంగా మారుతోంది. కేటీఆర్, హరీశ్ రావు వంటి నాయకులు క్షేత్రస్థాయిలో పార్టీని ముందుకు నడిపిస్తున్నప్పటికీ, ప్రజలు కోరుకుంటున్నది కేసీఆర్ ను మాత్రమే. ఉద్యమ సమయంలో ఆయన మాట, ఆయన బాడీ లాంగ్వేజ్ ప్రజల్లో ఒక ఆవేశాన్ని రగిలించేవి. కానీ, అధికారం కోల్పోయాక ఆయన ప్రజలకు, మీడియాకు దూరంగా ఉండటం పార్టీ శ్రేణుల్లో నైరాశ్యాన్ని నింపుతోంది. కేసీఆర్ తెరపై కనిపించకుండా, ఆయన ఫేస్ వాల్యూ లేకుండా బీఆర్ఎస్ ఎన్ని పోరాటాలు చేసినా, అవి ప్రజల్లోకి బలంగా వెళ్లడం లేదు. ఆయన యాక్టివ్ గా లేనంత కాలం పార్టీకి పూర్వ వైభవం కష్టమేనన్నది విశ్లేషకుల మాట.

తెలంగాణ కోసమే కేసీఆర్ కుటుంబం పుట్టింది అనే భావనను ఒకప్పుడు జనం బలంగా నమ్మారు. కానీ, ఇటీవల జరుగుతున్న పరిణామాలు ఆ నమ్మకాన్ని దెబ్బతీస్తున్నాయి. ముఖ్యంగా ఢిల్లీ లిక్కర్ స్కామ్ పరిణామాల తర్వాత కవిత పార్టీకి, కుటుంబానికి దూరంగా ఉంటున్నారనే ప్రచారం, ఆమెను పార్టీ కార్యక్రమాలకు దూరంగా ఉంచారనే వార్తలు క్యాడర్ లో గందరగోళాన్ని సృష్టిస్తున్నాయి. కుటుంబమే ముక్కలైనప్పుడు, ఇక రాష్ట్రం కోసం ఏం పోరాడుతారు? అనే ప్రశ్నలు తలెత్తుతున్నాయి. రాజకీయం కోసం కుటుంబ బంధాలను ఫణంగా పెట్టాల్సి రావడం బీఆర్ఎస్ నైతిక బలాన్ని దెబ్బతీసే అంశం.

మొత్తంగా చూస్తే.. పదిహేనేళ్ల క్రితం నాటి దీక్షా దివస్ స్ఫూర్తి వేరు, నేటి రాజకీయ అవసరాలు వేరు. తెలంగాణ సెంటిమెంట్, కేసీఆర్ నామస్మరణ ఇకపై ఓట్లు రాల్చే అవకాశాలు లేవు. ప్రజలు అభివృద్ధిని, జవాబుదారీతనాన్ని కోరుకుంటున్నారు. కాబట్టి, బీఆర్ఎస్ తన పాత పద్ధతులను వదిలి, నిర్మాణాత్మక ప్రతిపక్షంగా కొత్త వ్యూహాన్ని రచించుకోవాల్సిన అవసరం ఎంతైనా ఉంది. దీక్షా దివస్ ను కేవలం ఒక ఉత్సవంగా కాకుండా, పార్టీ భవిష్యత్తుపై ఆత్మపరిశీలన చేసుకునే వేదికగా మలుచుకుంటేనే గులాబీ పార్టీకి మనుగడ ఉంటుంది. లేదంటే, కాలం చెల్లిన సెంటిమెంట్లతో కాలగర్భంలో కలిసిపోయే ప్రమాదం లేకపోలేదు.