YS Jagan: జెండా ఆవిష్కరణకు జగన్ దూరం… టీడీపీ విమర్శలు..!!

ఆంధ్రప్రదేశ్ మాజీ ముఖ్యమంత్రి, వైఎస్సార్ కాంగ్రెస్ పార్టీ (YCP) అధ్యక్షుడు వైఎస్ జగన్మోహన్ రెడ్డి (YS Jagan) పులివెందుల జడ్పీటీసీ ఉప ఎన్నికలో పార్టీ ఓటమితో తీవ్ర నిరాశలో మునిగిపోయారని రాజకీయ వర్గాల్లో చర్చ జరుగుతోంది. ఈ ఓటమి ఆయనను మానసికంగా కలచివేసిందని, పార్టీ నేతలతో సమావేశాలకు కూడా ఆసక్తి చూపడం లేదని ప్రచారం సాగుతోంది. ఈ నేపథ్యంలో, 79వ స్వాతంత్ర్య వేడుకల (Independence Day Celebrations) సందర్భంగా వైసీపీ కేంద్ర కార్యాలయంలో (YCP Central Office) జరిగిన జాతీయ జెండా ఆవిష్కరణ కార్యక్రమానికి జగన్ గైర్హాజరు కావడం రాజకీయ వర్గాల్లో తీవ్ర చర్చనీయాంశంగా మారింది.

తాడేపల్లిలోని వైసీపీ కేంద్ర కార్యాలయంలో జరిగిన ఇండిపెండెన్స్ డే వేడుకల్లో జాతీయ జెండాను పార్టీ స్టేట్ కో-ఆర్డినేటర్ సజ్జల రామకృష్ణారెడ్డి (Sajjala Ramakrishna Reddy) ఆవిష్కరించారు. అయితే, జగన్ తన నివాసంలోనే ఉన్నప్పటికీ ఈ కార్యక్రమానికి హాజరు కాలేదు. ఒక పార్టీ అధ్యక్షుడిగా, మాజీ ముఖ్యమంత్రిగా జాతీయ జెండా ఆవిష్కరణ వంటి ముఖ్యమైన కార్యక్రమంలో పాల్గొనడం ఒక బాధ్యతగా భావిస్తారు. జగన్ మాత్రం ఇలాంటి బాధ్యతలను లెక్కచేరయరని టీడీపీ నేతలు తీవ్ర విమర్శలు గుప్పిస్తున్నారు. టీడీపీ నేతలు జగన్ తీరును ఎండగడుతూ, దేశభక్తి పట్ల ఆయనకు చిత్తశుద్ధి లేదని ఆరోపిస్తున్నారు. సామాన్య పౌరుడైతే జాతీయ జెండా ఆవిష్కరణలో పాల్గొనకపోవడం పెద్దగా పట్టించుకోవాల్సిన అవసరం లేకపోవచ్చు, కానీ ఒక రాజకీయ నాయకుడిగా, ప్రత్యేకించి మాజీ ముఖ్యమంత్రిగా జగన్ ఈ విషయంలో విఫలమయ్యారని వారు విమర్శిస్తున్నారు. “జగన్‌కు దేశం పట్ల బాధ్యత లేదా? ఇలాంటి వాళ్లు రాజకీయాలకు అర్హులా” అని టీడీపీ నేతలు ప్రశ్నిస్తున్నారు.

ఈ సందర్బంగా కాంగ్రెస్ పార్టీ నాయకుడు, ప్రతిపక్ష నేత రాహుల్ గాంధీని ఉదాహరణగా చూపుతున్నారు. గత స్వాతంత్ర్య దినోత్సవం సందర్భంగా ఎర్రకోట వద్ద జరిగిన అధికారిక కార్యక్రమంలో రాహుల్ గాంధీ పాల్గొన్నారు. అధికార పక్షంతో రాజకీయ విభేదాలు ఉన్నప్పటికీ, ఆయన దేశభక్తిని చాటుకుంటూ ఆ కార్యక్రమంలో హాజరయ్యారు. రాహుల్‌కు ఎర్రకోట వేడుకల్లో చివరి నుంచి రెండో వరుసలో సీటు కేటాయించినప్పటికీ, ఆయన ఆ కార్యక్రమంలో పాల్గొని జాతీయ జెండా ఆవిష్కరణను గౌరవించారు. రాహుల్ గాంధీ తీరును చూసి జగన్ నేర్చుకోవాలని పలువురు సూచిస్తున్నారు.

పులివెందుల ఓటమి జగన్‌ను రాజకీయంగా, మానసికంగా కలవరపెట్టినట్లు కనిపిస్తోందని ఎద్దేవా చేస్తున్నారు. ఈ ఓటమిని పులివెందుల ప్రజల పౌరుషానికి, టీడీపీ నాయకుడు లోకేష్ అహంకారానికి మధ్య జరిగిన పోరుగా వైసీపీ వర్గాలు అభివర్ణించాయి. ఈ ఓటమితో జగన్ పార్టీ నేతలతో సమావేశాలకు దూరంగా ఉంటూ, బహిరంగ కార్యక్రమాల నుంచి కూడా తప్పుకుంటున్నారని విమర్శలు వ్యక్తమవుతున్నాయి. వైసీపీ కార్యకర్తలు, నేతలు ఈ పరిస్థితిని చూసి నిరాశకు గురవుతున్నారని, జగన్ తన నాయకత్వ శైలిని మార్చుకోవాలని కొందరు అభిప్రాయపడుతున్నారు.

స్వాతంత్ర్య దినోత్సవం వంటి జాతీయ ప్రాధాన్యత కలిగిన కార్యక్రమంలో జగన్ గైర్హాజరు కావడం, ఆయన రాజకీయ నిరాసక్తతను ప్రతిబింబిస్తుందని విశ్లేషకులు అభిప్రాయపడుతున్నారు. ఈ పరిణామాలు వైసీపీ భవిష్యత్తుపై కూడా ప్రభావం చూపే అవకాశం ఉందని రాజకీయ పరిశీలకులు అంటున్నారు. జగన్ తన నాయకత్వ శైలిని, పార్టీ వ్యవహారాల్లో చురుకైన పాత్రను పోషించాలని, లేకుంటే పార్టీ బలహీనపడే ప్రమాదం ఉందని హెచ్చరిస్తున్నారు.