Y.S. Sharmila: అమరావతిలో రెండో విడత భూ సేకరణపై షర్మిల ఘాటు విమర్శలు..

అమరావతి రాజధాని విస్తరణ పేరుతో రెండో విడత భూములను సేకరించాలన్న ప్రభుత్వ నిర్ణయంపై ఏపీసీసీ అధ్యక్షురాలు వైఎస్‌ షర్మిల (Y.S. Sharmila) తీవ్రంగా స్పందించారు. ఇప్పటికే రైతుల నుంచి పొందిన 34 వేల ఎకరాలపై ఒక్క అడుగు అభివృద్ధి కూడా కనిపించకపోతే, మరో 20 వేల ఎకరాలు ఎందుకు తీసుకోవాలనే ప్రశ్నకు ప్రభుత్వం సమాధానం చెప్పాల్సిందే అని ఆమె డిమాండ్ చేశారు. అంతేకాదు ఈ నిర్ణయం ప్రజా ప్రయోజనాల కన్నా ప్రైవేట్ కంపెనీలు (Private Companies) , రియల్ ఎస్టేట్ (Real estate) వర్గాలకే లాభదాయకంగా మారే అవకాశముందని ఆరోపించారు.

ఒలింపిక్స్ స్టేడియాలు సహా ప్రపంచంలో ప్రముఖ క్రీడా వేదికలు కూడా అంతగా భూమి కలిగి ఉండవని, కానీ అమరావతిలో 2500 ఎకరాల భూమిని స్పోర్ట్స్ విలేజ్ (Sports Village) పేరుతో తీసుకోవడం అనవసరమని పేర్కొన్నారు. అదే విధంగా కొత్త విమానాశ్రయానికి 5000 ఎకరాలు అవసరమని ప్రభుత్వం చెప్పే వాదనను ఆమె పూర్తిగా ఖండించారు. ముంబై (Mumbai), భోగాపురం (Bhogapuram), గన్నవరం (Gannavaram) వంటి ఇంటర్నేషనల్ ఎయిర్‌పోర్ట్స్‌కు కూడా అంత విస్తీర్ణం అవసరం లేదని ఆమె ఉదాహరణ ఇచ్చారు. ప్రస్తుతం ఉన్న గన్నవరం విమానాశ్రయం విస్తరణే అత్యుత్తమ నిర్ణయం అవుతుందని ప్రభుత్వం పరిగణలోకి తీసుకోవాలని సూచించారు.

తొలి దశలో రైతులు 29 వేల మంది కలిసి అప్పగించిన 34 వేల ఎకరాలు, అలాగే అందుబాటులో ఉన్న ప్రభుత్వ భూములు కలిపి మొత్తంగా 54 వేల ఎకరాలు ఉన్నాయనే విషయాన్ని షర్మిల గుర్తు చేశారు. ఈ విస్తారమైన భూభాగంలో ఏమి చేశారో ప్రభుత్వం స్పష్టత ఇవ్వాల్సిన అవసరం ఉందని ఆమె పేర్కొన్నారు. 11 సంవత్సరాలు గడిచిపోయినా, రాజధాని ప్రాంతంలో అభివృద్ధి కనిపించకపోవడం బాధాకరమని ఆమె అభిప్రాయపడ్డారు. ఒక్కప్పుడు ప్రపంచ స్థాయి నగరంగా నిర్మిస్తామని చెప్పిన ప్రాంతం ఇప్పుడు ఖాళీ మైదానాలు, కలుపు మొక్కలతో కనిపిస్తోందని ఆమె ఆవేదన వ్యక్తం చేశారు.

ప్రభుత్వం ఇప్పుడున్న భూమి 700 ఎకరాలేనని చెబుతుండడం కూడా ప్రజలను తప్పుదారి పట్టించే ప్రయత్నంగా షర్మిల పేర్కొన్నారు. మొదటి దశలో పొందిన భూమిని ఎవరికీ కేటాయించారు? ఎటువంటి ఉపయోగం చేసారు? అన్న వివరాలు సి.ఆర్.డి.ఏ (CRDA) వెబ్‌సైట్‌లో కూడా లేకపోవడం సందేహాలు పెంచుతుందని ఆమె అన్నారు. ఈ నేపథ్యంలో రెండో దశ భూ సమీకరణ పూర్తిగా అనవసరం, రైతులపై మోపుతున్న కొత్త భారమని ఆమె స్పష్టం చేశారు.మొత్తం మీద రాజధాని నిర్మాణం పేరుతో రైతులను మళ్లీ ఇబ్బందులు పెట్టడం కంటే, ముందే పొందిన భూమిపై నిజమైన అభివృద్ధి ఎందుకు ప్రారంభించలేదో ప్రభుత్వం సమాధానం చెప్పాలని షర్మిల డిమాండ్ చేస్తున్నారు.