Buggana: డోన్ నుంచీ నంద్యాల పార్లమెంట్ వరకూ… బుగ్గన భవిష్యత్ ఏమిటో?

మాజీ ఆర్థిక మంత్రి (Finance minister) ,వైఎస్సార్‌సీపీ (YSRCP) సీనియర్ నాయకుడు బుగ్గన రాజేంద్రనాథ్ రెడ్డి (Buggana Rajendranath Reddy) గురించి రాయలసీమ రాజకీయాల్లో మరోసారి చర్చ మొదలైంది. గత ఎన్నికల్లో డోన్ (Dhone) నియోజకవర్గం నుండి పోటీ చేసి ఓటమి పాలైన ఆయన, ఇప్పుడు తన రాజకీయ దిశలో మార్పు అవసరం ఉందని భావిస్తున్నట్లు పార్టీ వర్గాల్లో మాటలు వినిపిస్తున్నాయి. ముఖ్యంగా రాబోయే ఎన్నికల్లో శాసనసభ కాకుండా పార్లమెంటు వైపు దృష్టి సారించాలని ఆయన ఆలోచిస్తున్నట్లు ప్రచారం వేగంగా సాగుతోంది.

డోన్ నియోజకవర్గం నంద్యాల (Nandyal) పార్లమెంటు పరిధిలోకి వస్తుంది. ప్రస్తుతం ఆ పార్లమెంటు ప్రాంతంలో వైసీపీలో (YCP) బలమైన నాయకత్వం లేకపోవడంతో, ఆ లోటు తాను పూడ్చగలనని బుగ్గన అధిష్టానానికి తెలుపుతున్నారని సమాచారం. తనకు నంద్యాల పార్లమెంటు సీట్ ఇవ్వాలని కోరుతూ, పార్టీ అధ్యక్షుడు వైఎస్ జగన్‌మోహన్ రెడ్డి (YS Jagan Mohan Reddy) ని ఒప్పించే ప్రయత్నం చేస్తున్నట్లు తెలుస్తోంది.

బుగ్గనకు రాష్ట్రంలో మంచి పరిపాలనా అనుభవం ఉంది. జగన్ మొదటి ప్రభుత్వం ఏర్పడిన తర్వాత ఆయనకు ఆర్థికశాఖ బాధ్యతలు అప్పగించబడాయి. హిందీ, ఇంగ్లీష్ భాషల్లో దిట్టగా మాట్లాడగలగటం, అధికార యంత్రాంగంపై పట్టు ఉండటం వల్ల ఐదేళ్ల పాటు కీలక శాఖను నిర్వహించారు. ఢిల్లీలో (Delhi) కేంద్ర నాయకత్వాన్ని పలుమార్లు కలిసి రాష్ట్రానికి అవసరమైన రుణాలు, నిధులు తీసుకురావడంలో ఆయన ముఖ్య పాత్ర పోషించారు. అందుకే గత సారే బుగ్గన నంద్యాల పార్లమెంట్‌ను కావాలని భావించినప్పటికీ, పార్టీ నిర్ణయంతో డోన్ నుంచే పోటీ చేశారు.

డోన్ ప్రాంతంలో కోట్ల, కేఈ కుటుంబాలు ఎన్నో సంవత్సరాలుగా రాజకీయ ప్రభావం కలిగివున్నాయి. అటువంటి బలమైన కుటుంబాలను ఎదుర్కొని బుగ్గన వరుసగా రెండు సార్లు ఎమ్మెల్యేగా గెలవడం చిన్న విషయం కాదు. జగన్ కూడా ఆయన హ్యాట్రిక్ గెలుస్తారని నమ్మకంగా ఉన్నారని అంటారు. అయితే కూటమి గాలి బలంగా వీచడంతో బుగ్గన కూడా పరాజయాన్ని ఎదుర్కొన్నారు. ఫలితంగా ఎన్నికల తరువాత ఆయన ఎక్కువగా హైదరాబాదులో (Hyderabad) ఉంటున్నారు.

ఇప్పుడేమో రాబోయే ఎన్నికల్లో తాను నంద్యాల నుంచి ఎంపీగా పోటీ చేయాలని స్పష్టమైన సంకేతాలు ఇస్తున్నట్లు ప్రచారం. అంతేకాక, తాను పోటీ చేసిన డోన్ స్థానం నుంచి తన కుమారుడు బుగ్గన అర్జున్ రెడ్డి (Buggana Arjun Reddy) ను రంగంలోకి దింపాలని బుగ్గన భావిస్తున్నట్లు చెప్పుకుంటున్నారు.

ఇక నంద్యాల పార్లమెంటు ప్రస్తుతం టీడీపీ కు చెందిన బైరెడ్డి శబరి (Byreddy Shabari) చేతిలో ఉంది. ఆమె గెలుపు తర్వాత చాలా చురుకుగా పనిచేస్తూ ప్రజల మధ్య మంచి పేరు తెచ్చుకుంది. ఈ నేపథ్యంలో ఆమెకు పోటీగా నిలబెట్టగల నాయకుడిని వైసీపీ వెతుకుతోంది. అలాంటి పరిస్థితుల్లో బుగ్గన పేరే ముందుకు రావడం ఆసక్తికరం. చివరకు పార్టీ ఆయనకు అవకాశం ఇస్తుందా? లేక కొత్త ముఖాన్ని తీసుకొస్తుందా? అన్నది ఇప్పుడు రాయలసీమలో హాట్ టాపిక్‌గా మారింది.