Y.V.Subba Reddy: టీటీడీ వివాదాల దర్యాప్తు వేగం: వైవీ చుట్టూ మళ్ళీ ముసురుతున్న ప్రశ్నలు

వైసీపీ సీనియర్ నేత, టీటీడీ మాజీ చైర్మన్ (TTD Ex Chairman) వైవీ సుబ్బారెడ్డి (YV Subba Reddy)గారిపై తాజాగా వివాదాలు ఒక్కసారిగా పెరిగి, ఆయనకు ఇబ్బందులు తలెత్తే పరిస్థితి కనిపిస్తోంది. గత ప్రభుత్వ కాలంలో ఆయన దాదాపు నాలుగేళ్లు తిరుమల తిరుపతి దేవస్థానం (Tirumala Tirupati Devasthanams – TTD)కు చైర్మన్‌గా పనిచేశారు. అప్పట్లో మాజీ ముఖ్యమంత్రి వైఎస్ జగన్‌మోహన్‌రెడ్డి (YS Jagan Mohan Reddy)కు మామగారుగా ఉండటం వల్ల టీటీడీలో కీలక నిర్ణయాలు తీసుకున్నారని రాజకీయ వర్గాలు అప్పటి నుంచే చర్చించాయి.

కానీ కూటమి ప్రభుత్వం అధికారంలోకి వచ్చిన తర్వాత ఆయన చైర్మన్‌గా పనిచేసిన కాలానికి సంబంధించిన రెండు వివాదాలు మళ్లీ బయటకు వచ్చాయి. మొదటిది—లడ్డూ ప్రసాదం తయారీలో నాసిరకం, కల్తీ నెయ్యి వాడారనే ఆరోపణ. రెండోవది—పరకామణి (Parakamani)లో జరిగిన చోరీ కేసులో నిందితుడితో అనుమానాస్పదంగా రాజీ జరిగిందని వచ్చిన ఆరోపణ. ఈ రెండు విషయాలపై కోర్టులు స్పందించడంతో సిట్ ,సీఐడీ విచారణలు వేగంగా ముందుకు సాగుతున్నాయి.

ఇటీవల కల్తీ నెయ్యి కేసులో వైవీ సుబ్బారెడ్డి సిట్ ఎదుట హాజరైన విషయం తెలిసిందే. ఆ కేసులో ఆయన మాజీ పీఏ చిన్న అప్పన్న (Chinna Appanna)ని అధికారులు అరెస్టు చేయడం పెద్ద చర్చనీయాంశమైంది. దీంతో ప్రభుత్వ వర్గాలు, ముఖ్యంగా టీడీపీ (TDP) సోషల్ మీడియా, వైవీ పాత్రపైనే దృష్టి పెట్టి ప్రచారం జరపడం మొదలుపెట్టాయి. ఈ ఒత్తిడి మధ్యనే ఆయన విచారణకు హాజరు కావాలంటూ నోటీసులు రావడంతో మొదట తిరుపతి (Tirupati) విచారణకు వ్యక్తిగత కారణాల వల్ల రాలేకపోయానని, అవసరమైతే హైదరాబాద్ (Hyderabad)లో విచారణ జరపొచ్చని అభిప్రాయం తెలపాల్సి వచ్చింది.

అయితే అదే సమయంలో పరకామణి చోరీ కేసులో మళ్లీ ఆయనను విజయవాడ (Vijayawada)లో విచారణకు పిలిచారు. ఈ కేసులో ఆయన తర్వాత టీటీడీ చైర్మన్‌గా ఉన్న భూమన కరుణాకరరెడ్డి (Bhumana Karunakara Reddy) కూడా విచారణలో పాల్గొన్నారు. విచారణలో భూమన ఇచ్చిన కొన్ని వాంగ్మూలాలు వైవీపై ప్రశ్నలు పెంచినట్లు టాక్.

విచారణ అనంతరం బయటకు వచ్చిన వైవీ సుబ్బారెడ్డి ఇవన్నీ రాజకీయ కోణంలో చూడొద్దని మీడియాను కోరారు. కానీ న్యాయవాదుల అభిప్రాయం ప్రకారం, రెండు కేసుల్లోనూ సిట్ అడిగిన ప్రశ్నలు, సేకరించిన ఆధారాలు ఆయనను మరింతగా ఇబ్బందుల్లోకి నెట్టవచ్చని అంటున్నారు. సిట్ వాదన ప్రకారం, టీటీడీలో నెయ్యి కొనుగోలు నిబంధనలు వైవీ కాలంలోనే మార్చడం, కల్తీ నెయ్యిపై వచ్చిన సమాచారం ఉన్నప్పటికీ తగిన చర్యలు తీసుకోకపోవడం ప్రధాన అంశాలుగా కనిపిస్తున్నాయి.

ఇక వైవీ మాత్రం ఈ ఆరోపణలను ఖండిస్తూ, నెయ్యి వివాదంపై తానే సుప్రీం కోర్టులో పిటీషన్ వేసానని, తప్పు చేసిన ఎవరూ కోర్టు తలుపు తట్టరని చెబుతున్నారు. పరకామణి చోరీ కేసు తన పదవీకాలం ముగిసిన తర్వాతే బయటపడిందని, దీనితో తనకు సంబంధం లేదని చెప్పినా, అధికార వర్గాల వద్ద ఉన్న ఆధారాలను చూసినప్పుడు ఆయనపై అనుమానాలు పూర్తిగా తొలగుతున్నట్లు మాత్రం కనిపించడం లేదని రాజకీయ వర్గాల్లో చర్చ సాగుతోంది. మొత్తం మీద వైవీ సుబ్బారెడ్డి వ్యవహారంపై రాబోయే రోజులు ఎంతో కీలకంగా మారనున్నాయి.