Pawan Kalyan: జనసేన అధినేత వ్యాఖ్యలతో రెండు తెలుగు రాష్ట్రాల్లో రాజకీయ వేడి..

జనసేన (Janasena) అధినేత, ఉప ముఖ్యమంత్రి పవన్ కళ్యాణ్ (Pawan Kalyan) రాజకీయాల్లో చూపిస్తున్న ప్రవర్తన, వ్యూహాలు గురించి ప్రత్యర్థులు వరుసగా విమర్శలు చేస్తున్న నేపథ్యంలో, ఆయన రాజకీయ బలహీనతలు ఏమిటనే చర్చ మళ్లీ వేడెక్కింది. పవన్ తాను అనుసరించే ప్రతి అడుగు ఒక వ్యూహమేనని చెప్పుకుంటారు. కానీ ప్రత్యర్థి పార్టీలు మాత్రం ఆయన తీరే ఆయనకు పెద్ద లోపమని వ్యాఖ్యానిస్తున్నాయి. ముఖ్యంగా 2019 ఎన్నికల్లో రెండు చోట్ల పోటీ చేసి కూడా గెలవలేకపోవడం ఇప్పటికీ పలు పార్టీలకు ఆయుధంగా మారింది. అప్పటి ఓటు షేర్ కూడా తక్కువగా రావడంతో ఇప్పటికీ వైసీపీ (YCP) , తెలంగాణా (Telangana) పార్టీలకు పవన్‌పై దాడి చేసే అవకాశం అందుబాటులో ఉన్నట్టైంది.

ఇటీవల పవన్ చేసిన కోనసీమ (Konaseema) పర్యటనలో రైతులతో మాట్లాడేటప్పుడు “తెలంగాణా దిష్టి పడ్డట్లుంది” అన్న వ్యాఖ్య అనూహ్యంగా రాజకీయ తుపానుని రేపింది. పవన్ సరదాగా అన్నట్లున్నా, ఆ ఒక్క మాటను బీఆర్‌ఎస్ (BRS) మొదలుకొని కాంగ్రెస్ (Congress) వరకూ పెద్ద చర్చనీయాంసమైన విషయంగా మార్చాయి. బీఆర్‌ఎస్ నాయకుడు జగదీష్ రెడ్డి (Jagadish Reddy) అయితే పూర్తిగా కౌంటర్‌ ఇస్తూ, తెలంగాణా వాళ్లు ఏపీకి రారని, అందువల్ల దిష్టి పడే ప్రశ్నే లేదని తీవ్రంగా ప్రతిస్పందించారు. అంతేకాదు, డిప్యూటీ సీఎం పదవి పొందిన వ్యక్తి ఇంత లైట్‌గా ఎలా మాట్లాడగలడు అని విమర్శించారు

అదే విషయం మీద కాంగ్రెస్ కూడా స్పందిస్తూ పవన్‌పై విమర్శలు చేసింది. ఆ పార్టీ ఎమ్మెల్యే అనిరుధ్ రెడ్డి (Anirudh Reddy) అయితే పవన్ ఒంటరిగా పోటీ చేసి గెలిచే స్థాయి లేదని వ్యాఖ్యానించారు. ఇది వైసీపీ ఎన్నో రోజులుగా చేస్తున్న ఆరోపణ. ఇప్పుడది తెలంగాణా కాంగ్రెస్ నాయకుల నోట కూడా వినిపించడం విశేషం. 2024 ఎన్నికల్లో పొత్తులతోనే విజయం సాధించారని, వారి పార్టీ బలం కాకుండా కూటమి బలం పవన్‌కి తోడైందని ప్రత్యర్థులు ఇప్పటికీ దాడి చేస్తున్నారు.

పవన్ గురించి ఎవ్వరూ మాట్లాడాల్సి వచ్చిన మొదటగా ఉపయోగించే అస్త్రం ఒంటరిగా గెలవలేడు అనే వాదన. నిజంగా ఇది పవన్ రాజకీయ బలహీనత అన్న చర్చ జోరుగా సాగుతోంది. మరోపక్క ప్రత్యర్థులు ఆయనకు ప్రజల్లో పెరుగుతున్న ఇమేజ్ను తట్టుకోలేక ఇటువంటివి సృష్టిస్తున్నారు అన్న వాదన కూడా బలంగానే ఉంది. ఈ నేపథ్యంలో కొందరు పవన్ మాట తీరుని లోకేష్ మాట తీరుతో పోలుస్తున్నారు.. లోకేష్ ఎంతో నిబద్ధతతో తన పని తాను చేసుకుపోతూ ఎటువంటి విమర్శలకు తావివ్వకుండా ఆచితూచి మాట్లాడుతూ ముందుకు సాగుతున్నారు. మరి ఆ పరిపక్వత పవన్ లో ఎందుకు లేదు అన్న మాట లేకపోలేదు. ఇక జనసేన ఈ విమర్శలన్నింటికి ఎలా ప్రతిస్పందిస్తుందనే ఆసక్తి రాజకీయ వర్గాల్లో పెరుగుతోంది. పవన్ వ్యాఖ్యలు ఎంత చిన్నవైనా, వాటి మీద తెలంగాణా, ఏపీ పార్టీలంతా గట్టిగా దాడి చేయడం ఆయన రాజకీయ ప్రాధాన్యాన్ని మరోసారి స్పష్టంగా ప్రకటిస్తుంది.