Pawan Kalyan: కోనసీమ వ్యాఖ్యలపై వివాదం: పవన్‌ క్షమాపణలు చెప్పాలని డిమాండ్..

గోదావరి జిల్లాల పచ్చదనంపై ఉప ముఖ్యమంత్రి పవన్ కళ్యాణ్ (Pawan Kalyan) చేసిన వ్యాఖ్యలు ఆంధ్రప్రదేశ్–తెలంగాణ రాజకీయాల్లో కొత్త చర్చకు దారితీశాయి. ఉమ్మడి రాష్ట్ర విభజనకు కోనసీమ ప్రాంతం అందమైన పచ్చదనం కూడా ఒక కారణమని, తెలంగాణ నాయకులు ఆ ప్రాంతంకు దిష్టి పెట్టారని పవన్ చేసిన వ్యాఖ్యలు రెండు రాష్ట్రాల్లోనూ వివాదానికి దారితీసాయి. ఈ వ్యాఖ్యలపై ముఖ్యంగా తెలంగాణ రాజకీయ నేతలు తీవ్రంగా అభ్యంతరం వ్యక్తం చేస్తున్నారు.

ఇందులో భాగంగా, తెలంగాణ మాజీ మంత్రి జగదీశ్ రెడ్డి (Jagadish Reddy) పవన్ వ్యాఖ్యలను ఖండించారు. ఆయనతోపాటు కాంగ్రెస్ (Congress) నేత, జడ్చర్ల ఎమ్మెల్యే అనిరుధ్ రెడ్డి (Anirudh Reddy) కూడా పవన్ పై మరింత ఘాటుగా స్పందించారు. పవన్ చేసిన వ్యాఖ్యలు తెలంగాణ ప్రజలను అవమానించేలా ఉన్నాయని, వెంటనే క్షమాపణలు చెప్పాలని ఆయన డిమాండ్ చేశారు.

అనిరుధ్ రెడ్డి తన విమర్శలను వ్యక్తిగత కోణంలోనూ విస్తరించారు. పవన్ కళ్యాణ్ రాజకీయ భవిష్యత్తుపై వ్యాఖ్యానిస్తూ, 70 ఏళ్లు వచ్చినా ప్రధానమంత్రి ఏమో, కనీసం ముఖ్యమంత్రి కూడా కాలేరని ఆయన విమర్శించారు. అదేవిధంగా, పవన్ కళ్యాణ్ నిజ జీవితంలో ఎక్కువ కాలం తెలంగాణ (Telangana) లోనే ఉంటారని, ఇక్కడే వ్యాపారాలు నిర్వహిస్తున్నారని గుర్తు చేశారు. అటువంటి వ్యక్తి ఈ రెండు ప్రాంతాల మధ్య విభేదాలు రేపేలా మాట్లాడడం ఆశ్చర్యకరమని తెలిపారు.

తాను కూడా పవన్ కళ్యాణ్ అభిమానినే అన్న అనిరుధ్ రెడ్డి..ఆయన వ్యాఖ్యలను మాత్రం సమర్ధించలేనని కచ్చితంగా తేల్చి చెప్పారు. ఆయన నటించిన “ఓజీ (OG)” సినిమా బాక్సాఫీస్ వద్ద విఫలమైనా, 800 రూపాయలు ఖర్చు పెట్టి సినిమా చూసానని చెప్పారు. అయితే, అభిమాని అయినా తప్పు మాట్లాడినప్పుడు ప్రశ్నించాల్సిన బాధ్యత తనపైనే ఉందని ఆయన స్పష్టం చేశారు.

అనిరుధ్ రెడ్డి మరో కీలక ప్రశ్నను లేవనెత్తారు. తెలంగాణ వాళ్ల “దిష్టి” ఉంటే, ఆంధ్ర ప్రదేశ్ వ్యక్తులు ఇక్కడ బిజినెస్ ఎలా చేస్తున్నారు? ముఖ్యంగా ఇరిగేషన్, నిర్మాణ రంగాల్లో చాలా మంది ఆంధ్రా వ్యాపారులు ఉన్నారని, అయినా తెలంగాణ నాయకత్వం ఒక్క మాట కూడా మాట్లాడలేదని గుర్తు చేశారు. ఇరు తెలుగు రాష్ట్రాల గురించి మాట్లాడేటప్పుడు , అందులోనూ అవి సున్నితమైన విషయాలైతే పవన్ కళ్యాణ్ బాధ్యతగా మాట్లాడాల్సిన అవసరం ఉందని ఆయన సూచించారు.

ఇలా చూస్తే, పవన్ వ్యాఖ్యలు కేవలం ఒక్క రాష్ట్రంలోనే కాక, రెండు రాష్ట్రాల మధ్య రాజకీయ చర్చలకు హీట్ ఇచ్చాయి. పవన్ చేసిన వ్యాఖ్యలు తప్పుగా అర్థమయ్యాయా? లేక రాజకీయ లాభం కోసమే ఎడతెగని విమర్శలు చేస్తున్నారా? అన్నది ఇంకా చర్చలోనే ఉంది. అయితే, తెలంగాణ నేతలు కోరుతున్నట్టుగా పవన్ క్షమాపణలు చెబుతారా లేదా అన్నది ఇప్పుడు రాజకీయంగా ఆసక్తికరంగా మారింది.