Nara Lokesh: భజన బృందం కారణంగా ఇరకాటంలో లోకేష్ భవిష్యత్తు..

ఆంధ్రప్రదేశ్‌ రాష్ట్రంలో మంత్రి నారా లోకేష్ (Nara Lokesh) రాజకీయంగా వేగంగా ఎదుగుతున్న నాయకుడిగా గుర్తింపు పొందుతున్నారు. ప్రభుత్వం చేపట్టిన పలు కార్యక్రమాల్లో ఆయన చూపిస్తున్న చొరవ, సమస్యలను ప్రత్యక్షంగా పరిశీలిస్తూ తీసుకుంటున్న నిర్ణయాలు ఆయనకు మంచి ఇమేజ్‌ను తీసుకొచ్చాయి. అదే సమయంలో తెలుగుదేశం పార్టీ (TDP)లో కూడా లోకేష్ కీలక స్థానంలో నిలుస్తూ, భవిష్యత్ నాయకుడిగా పార్టీ శ్రేణుల విశ్వాసాన్ని సంపాదిస్తున్నారు. ఈ నమ్మకమే ఒకవైపు ఆయనను ముందుకు నడిపిస్తే, మరోవైపు కొన్ని సమస్యలకు దారితీస్తోందని విశ్లేషకులు చెబుతున్నారు.

లోకేష్‌పై గతంలో కూడా తీవ్రమైన దుష్ప్రచారం జరిగిన విషయం తెలిసిందే. వాస్తవాలకు దూరంగా ఉన్న ఆరోపణల మధ్య ఆయన తన శైలిలో ముందుకు సాగి, పని ద్వారా విమర్శలను తగ్గించారు. అయితే ఇప్పుడు కొత్తగా ఆయన ఎదుగుదలను చూసి ప్రత్యర్థులు మాత్రమే కాదు, కొందరు సొంత శ్రేణుల్లోని వ్యక్తులు కూడా అజాగ్రత్తగా మాట్లాడటం వల్ల లోకేష్ రాజకీయంగా ఇబ్బందులు పడే పరిస్థితి ఏర్పడుతోంది.

తాజాగా ఇండిగో (IndiGo) విమాన సర్వీసుల్లో ఏర్పడిన అంతరాయం జాతీయస్థాయిలో చర్చకు దారి తీసింది. ఈ నేపధ్యంలో ఒక నేషనల్ న్యూస్ చానల్‌లో జరిగిన డిబేట్‌లో టిడిపి ప్రతినిధిగా హాజరైన వ్యక్తి ఇచ్చిన సమాధానం పెద్ద వివాదంగా మారింది. పౌర విమానయాన శాఖ మంత్రి కింజరాపు రామ్మోహన్ నాయుడు (Kinjarapu Ram Mohan Naidu) వ్యవహరించాల్సిన విషయాన్ని నారా లోకేష్ చూసుకుంటున్నారని చెప్పడంతో డిబేట్ హోస్ట్ ఆర్నాబ్ గోస్వామి (Arnab Goswami) అభ్యంతరం వ్యక్తం చేశారు. ఈ ఒక్క వ్యాఖ్యనే ప్రత్యర్థులు ఆయుధంగా మార్చుకుని, లోకేష్ ఏపీ రాజకీయాల్లో ప్రత్యామ్నాయ అధికార కేంద్రంగా మారిపోయారనే విమర్శలు మొదలు పెట్టారు. వైయస్సార్ కాంగ్రెస్ పార్టీ (YSRCP) అనుకూల వర్గాలు ఈ విషయాన్ని విస్తృతంగా ప్రచారం చేస్తుండటం గమనార్హం.

ఇక మరోవైపు, కొన్ని కొత్త ఆరోపణలు కూడా వినిపిస్తున్నాయి. లోకేష్ వ్యవహార శైలి మాజీ సీఎం వైఎస్ జగన్ (YS Jagan Mohan Reddy) తరహాలో ఉందని, ప్రతిపక్ష నేతలను కేసులతో వేధిస్తున్నారని కొందరు విమర్శకులు చెబుతున్నారు. ఇది లోకేష్ వ్యక్తిత్వాన్ని అర్థం చేసుకోకుండా చేస్తున్న దుష్ప్రచారం అని టిడిపి శ్రేణులు చెబుతున్నప్పటికీ, ఇలాంటి వ్యాఖ్యలు సామాజిక మాధ్యమాల్లో బలంగా ప్రచారం కావడం ఆయనకు అవాంతరం అవుతోంది.

నిజానికి, ఈ విమర్శలు చాలా వరకు అధికాభిమానం, అత్యుత్సాహం, లోకేష్‌ను మెప్పించాలని ప్రయత్నించే కొందరు నాయకుల తప్పుడు వ్యాఖ్యానాల వల్లే వచ్చాయని రాజకీయ విశ్లేషకులు అంటున్నారు. పార్టీ కార్యకర్తలు, నేతలు నియంత్రణలో లేకుండా వ్యాఖ్యలు చేస్తే, వాటి ప్రభావం ప్రత్యక్షంగా లోకేష్‌పై పడే అవకాశం ఉంది. అందుకే ఆయన చుట్టూ ఉన్నవారు బాధ్యతగా వ్యవహరించడం చాలా అవసరం. లేకుంటే మంచి పేరు తెచ్చుకున్న యువనేతకు అవాంఛిత ఇబ్బందులు తలెత్తే ప్రమాదం ఉందని స్పష్టమవుతోంది.