Jagan: 2029 ఎన్నికలకు జగన్ మాస్ ప్లాన్..5000 కి.మీ.లతో భారీ పాద యాత్ర..

వైసీపీ (YCP) అధినేత,మాజీ ముఖ్యమంత్రి వైఎస్ జగన్ మోహన్ రెడ్డి (Y.S. Jagan Mohan Reddy) మరోసారి ప్రజలలోకి వెళ్లేందుకు భారీ వ్యూహం సిద్ధం చేస్తున్నారని పార్టీ వర్గాలు చెబుతున్నాయి. 2019 ఎన్నికల్లో అధికారాన్ని అందుకోవడంలో ఆయన చేపట్టిన ప్రజాసంకల్ప యాత్ర (Praja Sankalpa Yatra) కీలక పాత్ర పోషించిన విషయం తెలిసిందే. ఆ పాదయాత్ర అప్పట్లో ఆయనను ప్రజలకు మరింత చేరువ చేసింది. అయితే అధికారం చేపట్టిన తర్వాత ప్రజలతో ఆయన కమ్యూనికేషన్ తగ్గిందన్న విమర్శలు బలంగా వినిపించాయి. ఈ దూరం 2024 ఎన్నికల్లో తీవ్రమైన వ్యతిరేకతకు కారణమై, ఆయన పార్టీ ఘోర ఓటమి చవిచూసిందనే అభిప్రాయం రాజకీయ వర్గాల్లో ఉంది.

ఇప్పుడేమో 2029 ఎన్నికలను దృష్టిలో పెట్టుకుని జగన్ మరల పాదయాత్ర అనే పాత ఫార్ములానే ఎంచుకున్నట్లుగా సమాచారం వెలువడుతోంది. వైఎస్సార్ కాంగ్రెస్ పార్టీ అధికార ప్రతినిధి వెంకట్ రెడ్డి (Venkat Reddy) చెప్పిన వివరాల ప్రకారం, ఈసారి జగన్ సుమారు 5000 కి.మీ.లు నడవాలని నిర్ణయించుకున్నారని తెలుస్తోంది. 2017–2019 కాలంలో ఆయన చేసిన పాదయాత్ర దాదాపు 3600 కి.మీ.లు కాగా, రాబోయే యాత్ర దాని కంటే పెద్దది, దీర్ఘమైనది కానుంది.

ఈ యాత్రను 15 నెలల పాటు సాగించేలా ప్రణాళిక రూపొందిస్తున్నారు అని టాక్. జగన్ ఒకసారి యాత్ర మొదలెడితే, అది పూర్తయ్యే వరకు విరామం లేకుండా కొనసాగించాలనే సంకల్పంతో ఉన్నారని ఆయన చెప్పారు. ఈ సమయం ప్రకారం చూస్తే, పాదయాత్ర 2028లో ప్రారంభమై 2029 ఎన్నికల ప్రచారం ముగిసే వరకు సాగే అవకాశం ఉంది.

ఈ యాత్ర ద్వారా జగన్ ప్రజల సమస్యలు నేరుగా వింటారు, గ్రామాలు—పట్టణాల్లో తిరిగి మద్దతు పెంపొందించుకుంటారని వైసీపీ భావిస్తున్నది. ముఖ్యంగా 2024 ఎన్నికల తర్వాత పార్టీ క్యాడర్‌లో వచ్చిన నిరుత్సాహాన్ని కొంతమేర అధిగమించడానికి కూడా ఈ పాదయాత్ర ఉపయుక్తమవుతుందని అంతర్గత వర్గాలు అంటున్నాయి.

అయితే, రాజకీయ విశ్లేషకుల అభిప్రాయం మాత్రం బిన్నంగా ఉంది. 2019లో ప్రజలు జగన్‌ను ప్రజల దగ్గరున్న నాయకుడిగా భావించి భారీ మెజారిటీ ఇచ్చినా, తరువాత ప్రభుత్వం ఏర్పాటు చేసిన తర్వాత ఆయన తీసుకున్న నిర్ణయాలు, ప్రజలతో దూరం, వివాదాస్పద పాలన శైలి వంటి అంశాలు ఆయనకు ప్రతికూలంగానే మారాయి. అందువల్ల యాత్ర 2.0 ప్రారంభమైందంటేనే ప్రజల నమ్మకం తక్షణమే తిరిగి వస్తుందని భావించడం కష్టమని వారు సూచిస్తున్నారు. ఇక మరోవైపు, ఆంధ్రప్రదేశ్ (Andhra Pradesh) రాజకీయాల్లో పాదయాత్రలు తరచూ కీలక మలుపులు తిప్పిన ఉదాహరణలు ఉన్నాయి. ఎన్నికలకు మిగిలిన సంవత్సరాల్లో జగన్ చేపట్టే ఈ పెద్ద యాత్ర ఆయనకు తిరిగి ప్రజామద్దతు తెచ్చిపెడుతుందా లేదా అనేది చూడాల్సి ఉంది.