Jagan: పదవుల రాజకీయం మధ్య జగన్ పర్యటనపై నెల్లూరు నాయకుల స్పందన..

వైఎస్ జగన్ మోహన్ రెడ్డి (Y. S. Jagan Mohan Reddy) ఇటీవల చేసిన నెల్లూరు (Nellore) పర్యటన ఏపీలో రాజకీయంగా హాట్ టాపిక్‌గా మారింది. సింహపురి ప్రాంతంలో ఆయన పర్యటనకు మంచి రెస్పాన్స్ వచ్చినా, మొత్తం పర్యటన మాత్రం టెన్షన్ వాతావరణంలోనే సాగింది. పోలీసుల ఆంక్షల మధ్య ఆయన పర్యటన జరిగినప్పటికీ, ప్రజల్లో ఆసక్తి మాత్రం తగ్గలేదు. జగన్ ఇద్దరు ముఖ్య నాయకులను వ్యక్తిగతంగా పరామర్శించటం రాజకీయ వర్గాల్లో చర్చకు దారి తీసింది. ఒకరు జైలులో ఉన్న కాకాణి గోవర్ధన్ రెడ్డి (Kakani Govardhan Reddy), మరొకరు నల్లపరెడ్డి ప్రసన్నకుమార్ రెడ్డి (Nallapareddy Prasanna Kumar Reddy) కావడంతో విమర్శలకు తావు ఏర్పడింది.

ప్రసన్న కుమార్ రెడ్డి మహిళపై అనుచిత వ్యాఖ్యలు చేశారని, ఆయనను పరామర్శించడంలో లాజిక్ లేదని ప్రతిపక్షం మండిపడుతోంది. జగన్ ఎందుకు అలాంటి నేతలతోనూ ఇలా ప్రవర్తించాలి? అని సందేహాలు వ్యక్తమవుతున్నాయి. ఇదిలా ఉండగా, నెల్లూరులోనే ఆయనకు ఎదురుదెబ్బ తగిలింది. సీనియర్ నేత ఆనం రామనారాయణరెడ్డి (Anam Ramanarayana Reddy) ఆయనపై బహిరంగ విమర్శలు చేశారు. జగన్ పర్యటనలపై, పార్టీ తీరు పట్ల గంభీరంగా స్పందించారు.

మరోవైపు, కోటంరెడ్డి శ్రీధర్ రెడ్డి (Kotamreddy Sridhar Reddy) పలు విమర్శలతో సోషల్ మీడియాలో హల్‌చల్ సృష్టించారు. జగన్ పై తీవ్రస్థాయిలో మండిపడి, వైసీపీ (YCP) పార్టీపై తీవ్రమైన వ్యాఖ్యలు చేశారు. ఇప్పుడేమో టిడిపి (TDP) నుంచి గెలిచి నెల్లూరు రూరల్ ఎమ్మెల్యేగా ఉన్న ఆయన వ్యాఖ్యలు తీవ్ర రాజకీయ సంకేతాలుగా మారాయి. కోవూరు నియోజకవర్గం ఎమ్మెల్యే వేమిరెడ్డి ప్రశాంతి రెడ్డి (Vemireddy Prashanthi Reddy) కూడా జగన్ చర్యలను తప్పుబట్టారు. మహిళలపై ప్రజలు మర్చిపోలేని అభ్యంతరకర వ్యాఖ్యలు చేసిన నేతను పరామర్శించడం సరికాదని అభిప్రాయపడుతున్నారు.

ఇక సోమిరెడ్డి చంద్రమోహన్ రెడ్డి (Somireddy Chandramohan Reddy) అయితే కాకాణి వ్యవహారాలన్నీ త్వరలో బయట పెడతానంటూ జగన్ పర్యటనపై కఠినంగా స్పందించారు. మొత్తానికి వీరంతా జగన్ పర్యటనను టార్గెట్ చేస్తూ మాటల తూటాలు పేలుస్తున్నారు. అయితే వాస్తవికంగా చూస్తే, వీరందరికీ ఒకే లక్ష్యం కనిపిస్తోంది – మంత్రి పదవి. కొంతమంది పదవిని కాపాడుకోవాలనుకుంటే, మరికొంతమంది పదవి కోసం ప్రయత్నిస్తున్నారు. ప్రతిపక్ష పార్టీపై విరుచుకుపడి చంద్రబాబు దృష్టిలో పడాలి అన్నది వీరి ముఖ్య ఉద్దేశం అని కొందరు భావిస్తున్నారు. అందుకే జగన్ నెల్లూరు పర్యటనను మరింత హైలైట్ చేసి టీడీపీ అధినాయకత్వాన్ని ట్రై చేస్తున్నారు.. అయితే వీరిలో ఎవరి లెక్కలు ఫలిస్తాయి.. ఎవరికి పదవులు దక్కుతాయి అన్నది ఆసక్తికర అంశంగా మారింది.