Jagan: మొంథా తుఫాన్ ప్రభావం.. రద్దయిన జగన్ కోటి సంతకాల ఉద్యమం..

ఏపీలో (Andhra Pradesh) మొంథా తుఫాన్ తీవ్ర ప్రభావం చూపిస్తోంది. తీర ప్రాంతాల్లో వర్షాలు ముంచెత్తుతుండటంతో ప్రజలు భయాందోళనలకు గురవుతున్నారు. చాలా ప్రాంతాల్లో రోడ్లు జలమయం అయ్యాయి. విద్యుత్ సరఫరా అంతరాయం కలిగింది. ఈ తుఫాన్ ఈ రోజు సాయంత్రం లేదా రాత్రి సమయంలో తీరం దాటే అవకాశముందని వాతావరణ శాఖ హెచ్చరించింది. ఫలితంగా ప్రభుత్వం అలర్ట్ ప్రకటించింది. రక్షణ చర్యల్లో ఎన్ డి ఆర్ ఎఫ్(NDRF), ఎస్డిఆర్ఎఫ్ (SDRF) బృందాలు సజావుగా పనిచేస్తున్నాయి. ప్రజలు ఇళ్ల బయటకు వెళ్లకూడదని అధికారులు సూచిస్తున్నారు.

ఇక ఈ తుఫాన్ ప్రభావం రాజకీయ నాయకుల ప్రణాళికలపైనా పడింది. ముఖ్యంగా మాజీ ముఖ్యమంత్రి జగన్ మోహన్ రెడ్డి (Jagan Mohan Reddy) ఈ వాతావరణ పరిస్థితుల కారణంగా తన విజయవాడ (Vijayawada) పర్యటనను రద్దు చేసుకున్నారు. ప్రస్తుతం బెంగళూరు (Bengaluru) లో ఉన్న ఆయన ఈ రోజు రాష్ట్రానికి రావాలని అనుకున్నారు. అయితే తుఫాన్ ప్రభావంతో విమాన సర్వీసులు నిలిపివేయడంతో ఆయన రావడం సాధ్యం కాలేదు. గన్నవరం (Gannavaram) విమానాశ్రయం నుంచి విశాఖపట్నం (Visakhapatnam), హైదరాబాద్ (Hyderabad), బెంగళూరు మార్గాల్లో ఉన్న అన్ని విమాన సర్వీసులు తాత్కాలికంగా రద్దయ్యాయి. దీంతో వందలాది ప్రయాణికులు ఇబ్బందులు ఎదుర్కొన్నారు.

జగన్ తన పర్యటన రద్దు చేసినప్పటికీ, తుఫాన్ బాధితులకు సహాయం అందేలా పార్టీ నేతలకు ప్రత్యేక సూచనలు చేసినట్లు సమాచారం. బెంగళూరు నుంచే ఆయన పార్టీ కీలక నేతలతో టెలీ కాన్ఫరెన్స్ నిర్వహించి పరిస్థితులను సమీక్షించినట్లు చెబుతున్నారు. ఈ క్రమంలో సజ్జల రామకృష్ణారెడ్డి (Sajjala Ramakrishna Reddy), బొత్స సత్యనారాయణ (Botsaa Satyanarayana) లకు రాష్ట్రవ్యాప్తంగా సహాయక చర్యల పర్యవేక్షణ బాధ్యతలు అప్పగించారు. జిల్లా స్థాయి వైసీపీ (YCP) నాయకులు స్థానిక అధికారులతో సమన్వయం చేసుకుని సహాయక కార్యక్రమాలు వేగవంతం చేయాలని ఆయన ఆదేశించినట్లు పార్టీ వర్గాలు వెల్లడించాయి.

ఇక తుఫాన్ తీవ్రతను దృష్టిలో ఉంచుకుని వైసీపీ చేపట్టిన కోటి సంతకాల ఉద్యమం , కల్తీ మద్యం వ్యతిరేక ప్రచారాలను తాత్కాలికంగా నిలిపివేసినట్లు తెలుస్తోంది. ప్రభుత్వ మెడికల్ కాలేజీల ప్రైవేటీకరణకు వ్యతిరేకంగా జరుగుతున్న సంతకాల సేకరణ తుఫాన్ తగ్గిన తర్వాత మళ్లీ ప్రారంభించనున్నట్లు పార్టీ తెలిపింది.ప్రస్తుతం రాష్ట్రంలో రవాణా వ్యవస్థ దెబ్బతినడంతో రైలు, బస్సు సర్వీసులు కూడా నిలిపివేశారు. ప్రజలు సురక్షిత ప్రదేశాల్లో ఉండాలని ప్రభుత్వం సూచించింది. అధికార పార్టీ అయిన టిడిపీ (TDP) ప్రభుత్వం కూడా అత్యవసర పరిస్థితుల్లో సహాయ చర్యలను వేగవంతం చేసింది. మొత్తం మీద మొంథా తుఫాన్ కారణంగా రాష్ట్రం ఒక పెద్ద సవాల్‌ను ఎదుర్కొంటోంది. ప్రజలు, అధికారులు, రాజకీయ నాయకులు అందరూ కలిసి ఈ సంక్షోభాన్ని ఎదుర్కోవాలని పిలుపునిస్తున్నారు.