Chandrababu: మూడు ప్రాంతాల సమగ్ర అభివృద్ధిపై బాబు కొత్త వ్యూహం..

ముఖ్యమంత్రి చంద్రబాబు నాయుడు (Chandrababu Naidu) ఇటీవల “మూడు ప్రాంతాలు” అనే మాట ప్రస్తావించగానే రాజకీయ వర్గాల్లో కొత్త చర్చ మొదలైంది. ఈ పదం వినగానే కొందరు అది గత ప్రభుత్వ కాలంలో వచ్చిన “మూడు రాజధానులు” అనే ఆలోచనను గుర్తుచేసుకుంటున్నారు. కానీ సీఎంకి అది పూర్తిగా భిన్నమైన భావన. ఆయన ఉద్దేశం మూడు రాజధానులు కాదు, ఏపీలోని మూడు ప్రధాన ప్రాంతాలైన ఉత్తరాంధ్ర, కోస్తా ,రాయలసీమలను సమానంగా అభివృద్ధి చేయడమే కూటమి లక్ష్యం అని స్పష్టంగా తెలుస్తోంది.

చంద్రబాబు తిరిగి అధికారంలోకి వచ్చినప్పటి నుంచి అమరావతి (Amaravati) అభివృద్ధిని అత్యంత ప్రాధాన్యంగా చూస్తున్నారు. రాజధానిని వేగంగా ముందుకు తీసుకెళ్లాలన్న సంకల్పం ఆయనలో స్పష్టంగా కనిపిస్తోంది. అయితే 2014–2019 మధ్య అమరావతి ఒక్కదానిపై అతిగా దృష్టిపెట్టడం వల్ల రాజకీయంగా ఎదుర్కొన్న అనుభవాలు కూడా ఆయనకు తెలుసు. అందుకే ఈసారి మరింత సమతుల్యంగా ముందుకు సాగేందుకు ప్లాన్ చేస్తున్నారని భావిస్తున్నారు.

ఇటీవల మీడియాతో మాట్లాడినప్పుడు కూడా చంద్రబాబు ఇదే విషయాన్ని వివరించారు. అమరావతి అభివృద్ధి కొనసాగుతూనే, రాష్ట్రంలోని మూడు ప్రాంతాలు కూడా సమాన అవకాశాలు పొందాలనది తన లక్ష్యం అని చెప్పారు. రాజధాని ప్రాంతంలో ఉన్న రైతుల సమస్యలను పరిష్కరించేందుకు ప్రత్యేకమైన కమిటీ ఏర్పాటు చేస్తామన్నారు. అలాగే సి.ఆర్.డి.ఏ (Capital Region Development Authority) వ్యవహారాలపై వచ్చిన ఫిర్యాదులను కూడా పరిశీలిస్తామని ప్రకటించారు.

ఒకవైపు రాజధానికి వేగం పెంచుతూనే, మరోవైపు ఉత్తరాంధ్రలో పరిశ్రమలు, రాయలసీమలో నీటి ప్రాజెక్టులు, కోస్తా ప్రాంతంలో మౌలిక సదుపాయాలు వంటి అంశాలపై దృష్టి పెట్టాలన్న ఆలోచన బాబులో ఉంది. పెట్టుబడులు ఒకే ప్రాంతానికి కాకుండా మొత్తం రాష్ట్రానికి సమానంగా రావాలన్న ఉద్దేశ్యంతో ఆయన ప్రత్యేక వ్యూహాన్ని సిద్ధం చేసినట్టు అధికార వర్గాలు చెబుతున్నాయి.

వైసీపీ (YCP) తరచుగా చేసిన “అమరావతి మాత్రమే అభివృద్ధి, మిగతా ప్రాంతాలకు నిర్లక్ష్యం” అనే విమర్శలకు ఎలాంటి అవకాశమూ ఇవ్వకుండా సమగ్రమైన అభివృద్ధిని ప్రధాన నినాదంగా ముందుకు తీసుకెళ్లాలని బాబు భావిస్తున్నారు. రాష్ర్టంలోని ప్రతి ప్రాంతంకున్న శక్తులను ఉపయోగించుకుని ఎదగడానికి సహకరించే విధంగా ప్రభుత్వ యంత్రాంగాన్ని సిద్ధం చేస్తున్నారు.

చంద్రబాబు మూడు ప్రాంతాల అభివృద్ధి అనే ఆలోచనను ముందుకు తెచ్చిన ఈ దశలో, రాష్ట్ర ప్రగతికి కొత్త దిశ చెప్పబడుతున్నట్టు విశ్లేషకులు అభిప్రాయపడుతున్నారు. రైతుల సంక్షేమం, పెట్టుబడుల ప్రవాహం, పారిశ్రామికీకరణ, రాజధాని నిర్మాణం—ఈ నాలుగు అంశాలు సమానంగా సాగితేనే ఆంధ్రప్రదేశ్ వచ్చే దశాబ్దంలో భారీ ఎదుగుదల సాధించగలదని అంచనా. ఇక ఈ వ్యూహం ఎంతవరకు ఫలిస్తుందో, రాబోయే నెలల్లోనే స్పష్టమవుతుంది.