ఐపీఎల్ 2024 విజేత కోల్ కతా…

ఐపీఎల్ 17వ సీజన్ విజేతగా కోల్ కతా నైట్ రైడర్స్ నిలిచింది. ఆది నుంచి ఎదురులేని ఆటతీరుతో రాణించిన కోల్ కతా .. ఫైనల్లోనూ అదే ఊపు కనబర్చింది. తనతో ఆటంటే మాటలు కాదని మరోసారి నిరూపించింది. సంచలన విజయాలతో ఫైనల్ కు దూసుకొచ్చిన హైదరాబాద్ సన్ రైజర్స్ ను.. 113 పరుగులకే కుప్పకూల్చి, విజేతగా ఆవిర్భవించింది. 2012, 2014లోనూ విజేతగా నిలిచిన కోల్‌కతా.. పదేళ్ల తర్వాత మళ్లీ కప్పు అందుకుంది.

ఈ ఐపీఎల్‌ లో సంచలన ప్రదర్శనతో ఫైనల్‌కు దూసుకొచ్చి కప్పు తమదే అన్న అంచనాలు కలిగించిన సన్‌రైజర్స్‌ హైదరాబాద్‌.. అసలు పోరులో తేలిపోయింది. మిచెల్‌ స్టార్క్‌ (2/14), హర్షిత్‌ రాణా (2/24), ఆండ్రి రసెల్‌ (3/19)ల అద్భుత బౌలింగ్‌కు తలవంచిన సన్‌రైజర్స్‌ 18.3 ఓవర్లలో కేవలం 113 పరుగులకే కుప్పకూలింది. 24 పరుగులు చేసిన కెప్టెన్‌ కమిన్సే టాప్‌స్కోరర్‌. అనంతరం వెంకటేశ్‌ అయ్యర్‌ (52 నాటౌట్‌; 26 బంతుల్లో 4×4, 3×6), రహ్మనుల్లా గుర్బాజ్‌ (39; 32 బంతుల్లో 5×4, 2×6) చెలరేగడంతో లక్ష్యాన్ని నైట్‌రైడర్స్‌ 10.3 ఓవర్లలోనే 2 వికెట్లు మాత్రమే కోల్పోయి అలవోకగా ఛేదించింది. మిచెల్‌ స్టార్క్‌ ‘మ్యాన్‌ ఆఫ్‌ ద మ్యాచ్‌’గా ఎంపికయ్యాడు.

రాజస్థాన్‌తో రెండో క్వాలిఫయర్‌తో పోలిస్తే చెపాక్‌ పిచ్‌ బ్యాటింగ్‌కు ఎక్కువ అనుకూలం అన్న అభిప్రాయాలు వ్యక్తం కావడంతో టాస్‌ గెలిచిన కమిన్స్‌ బ్యాటింగ్‌ ఎంచుకున్నాడు. దీంతో లీగ్‌ దశలో మాదిరే ఓపెనర్లు హెడ్, అభిషేక్‌ చెలరేగిపోతారనుకుంటే.. అనూహ్యంగా రెండు ఓవర్లు తిరిగేసరికే పెవిలియన్‌ చేరిపోయారు. తొలి బంతి నుంచే భారీ షాట్లతో చెలరేగిపోయే అభిషేక్‌ (2).. వరుసగా మూడు డాట్‌ బాల్స్‌ ఆడడంతోనే పిచ్‌ అంత తేలికగా లేదని అర్థమైపోయింది. నాలుగో బంతికి రెండు పరుగులు తీసిన అతను.. స్టార్క్‌ కళ్లు చెదిరే రీతిలో సంధించి ఔట్‌ స్వింగింగ్‌ డెలివరీకి ఆఫ్‌ స్టంప్‌ లేచిపోవడంతో నిశ్చేష్ఠుడై వెనుదిరిగాడు. ఈ షాక్‌ నుంచి తేరుకునేలోపే.. తర్వాతి ఓవర్లో హెడ్‌ (0) కూడా ఔటైపోయాడు. ఇక తర్వాతి బ్యాటర్లు అందరూ పేకమేడను తలపించారు. కెప్టెన్‌ కమిన్స్‌ చివర్లో పోరాడడంతో హైదరాబాద్‌ ఆమాత్రం స్కోరైనా చేయగలిగింది. ఆరంభంలో స్టార్క్‌ హైదరాబాద్‌ను దెబ్బ తీస్తే.. తర్వాత హర్షిత్‌ రాణా, రసెల్‌ ఆ జట్టు పని పట్టారు.

చెపాక్‌ పిచ్‌పై సన్‌రైజర్స్‌ తడబాటు చూస్తే లక్ష్యం చిన్నదైనా కోల్‌కతా చెమటోడుస్తుందేమో అనిపించింది. కానీ కోల్‌కతా బ్యాటర్లు ఎదురుదాడితో సగం ఓవర్లలో లక్ష్యాన్ని కరిగించేశారు. ఆ జట్టు ఇన్నింగ్స్‌లో తొలి ఓవర్‌ మాత్రమే మెరుపుల్లేకుండా సాగింది. ఆ ఓవర్లో భువనేశ్వర్‌ అయిదు పరుగులే ఇచ్చాడు. కమిన్స్‌ వేసిన రెండో ఓవర్లో ఒక సిక్సర్‌ బాదిన వెంటనే నరైన్‌ (6) ఔటైపోయాడు. అప్పుడు సన్‌రైజర్స్‌లో కాస్త చిగురించిన ఆశలు.. కూలిపోవడానికి ఎంతో సమయం పట్టలేదు. వెంకటేశ్‌ అయ్యర్‌ వచ్చీ రాగానే హైదరాబాద్‌ బౌలర్లపై ఉప్పెనలా పడిపోయాడు. భువనేశ్వర్‌ వేసిన మూడో ఓవర్లో అతనువరుసగా 4, 6, 6 బాది ఇన్నింగ్స్‌కు రాకెట్‌ వేగాన్నందించాడు. నటరాజన్‌ వేసిన ఆరో ఓవర్లోనూ అతను వరుసగా 4, 4, 6, 4 బాదడంతో హైదరాబాద్‌కు పరాభవం తప్పదని తేలిపోయింది. మరో ఎండ్‌లో గుర్బాజ్‌ కూడా ధాటిగా ఆడాడు. విజయానికి 12 పరుగులే అవసరమైన స్థితిలో గుర్బాజ్‌ ఔటైనా.. శ్రేయస్‌ (6 నాటౌట్‌)తో కలిసి వెంకటేశ్‌ లాంఛనాన్ని పూర్తి చేశాడు.