Pawan Kalyan: ఉత్తరాంధ్రలో పెరుగుతున్న కాలుష్యానికి చెక్ పెట్టే దిశగా పవన్ అడుగులు..

విశాఖపట్నం (Visakhapatnam) ఒకప్పుడు ప్రశాంతతకు చిరునామాగా నిలిచేది. సముద్రతీర గాలితో, పచ్చని కొండలతో ఆహ్లాదకరమైన వాతావరణం కలిగిన ఈ నగరం ‘సిటీ ఆఫ్ డెస్టినీ’గా దేశవ్యాప్తంగా గుర్తింపు పొందింది. అయితే కాలక్రమేణా అభివృద్ధి వేగం పెరిగిన కొద్దీ, దానికి అనుసంధానంగా కాలుష్యం కూడా విస్తరించింది. అభివృద్ధి అవసరమే అయినప్పటికీ, అదే ప్రజల ఆరోగ్యానికి ముప్పుగా మారుతుండటంపై మేధావులు, పర్యావరణవేత్తలు, ప్రజా సంఘాలు ఆందోళన వ్యక్తం చేస్తున్నాయి.

ఈ నేపథ్యంలో ఆంధ్రప్రదేశ్ (Andhra Pradesh) పర్యావరణ శాఖ మంత్రిగా ఉన్న పవన్ కళ్యాణ్ (Pawan Kalyan) విశాఖ పర్యటన సందర్భంగా కాలుష్య సమస్యపై ప్రత్యేక దృష్టి పెట్టారు. కాలుష్య నియంత్రణ విషయంలో ఇక సీరియస్ చర్యలు తప్పవని అధికారులకు ఆయన స్పష్టంగా సూచించారు. చట్టాలు కాగితాలకే పరిమితం కాకుండా, కఠినంగా అమలయ్యేలా చూడాలని ఆదేశించారు. ప్రభుత్వ యంత్రాంగం, పరిశ్రమలు, ప్రజలు అందరూ కలిసి పనిచేస్తేనే కాలుష్యాన్ని నియంత్రించవచ్చని ఆయన అభిప్రాయపడ్డారు.

ఉత్తరాంధ్ర (Uttarandhra) ప్రాంతంలో అభివృద్ధి పెరిగినంత వేగంగా కాలుష్యం కూడా పెరిగిపోయిందని పవన్ కళ్యాణ్ ఆందోళన వ్యక్తం చేశారు. ముఖ్యంగా రసాయన పరిశ్రమల వల్ల చుట్టుపక్కల గ్రామాల్లో తీవ్రమైన ఆరోగ్య సమస్యలు తలెత్తుతున్నాయని పేర్కొన్నారు. కొన్ని గ్రామాల్లో ప్రతి ఇంట్లో ఎవరో ఒకరు క్యాన్సర్ బారిన పడుతున్న పరిస్థితి ఉందని, పిల్లల్లో చర్మ వ్యాధులు, మహిళల్లో గర్భస్రావాలు, పెద్దల్లో ఊపిరితిత్తుల సంబంధిత రోగాలు పెరుగుతున్నాయని తెలిపారు. ఇది అభివృద్ధి పేరుతో ప్రజల జీవితాలతో చెలగాటమాడటమేనని ఆయన వ్యాఖ్యానించారు.

విశాఖ పోర్టు (Visakhapatnam Port) పరిసర ప్రాంతాల్లో బొగ్గు ధూళి వల్ల కాలుష్యం అధికమవుతోందని, దాని ప్రభావం ప్రజల ఆరోగ్యంపై తీవ్రంగా పడుతోందని పవన్ కళ్యాణ్ పేర్కొన్నారు. పరిశ్రమలు రావడాన్ని ప్రభుత్వం వ్యతిరేకించడం లేదని, కానీ అవి నిబంధనలు పాటిస్తూ, కాలుష్యాన్ని తగ్గించే బాధ్యత తీసుకోవాలని ఆయన స్పష్టం చేశారు. ముఖ్యంగా పరిశ్రమల్లో తప్పనిసరిగా అమలు చేయాల్సిన 33 శాతం గ్రీన్ బెల్ట్ నిబంధనను కచ్చితంగా పాటించాలన్నారు.

పర్యావరణ అధికారులు కూడా మొక్కుబడి చర్యలకే పరిమితం కాకుండా, జీవ వైవిధ్యాన్ని కాపాడే విధంగా పని చేయాలని పవన్ సూచించారు. ఇదే సందర్భంలో ఆయన ‘గ్రేట్ గ్రీన్ వాల్’ (Great Green Wall) ప్రాజెక్టు గురించి ప్రస్తావించారు. ఆంధ్రప్రదేశ్‌లోని తొమ్మిది కోస్తా జిల్లాల పరిధిలో సుమారు 970 కిలోమీటర్ల తీర ప్రాంతాన్ని అయిదు కిలోమీటర్ల వెడల్పుతో, మూడు బఫర్ జోన్లుగా అభివృద్ధి చేసి, పచ్చని మొక్కల గోడ నిర్మించడమే ఈ ప్రాజెక్టు లక్ష్యమని వివరించారు. ఈ ప్రణాళికలో పారిశ్రామికవేత్తలు భాగస్వాములవ్వాలని ఆయన పిలుపునిచ్చారు. ఈ గ్రీన్ వాల్ తీర ప్రాంతాన్ని రక్షించడమే కాకుండా, కాలుష్యానికి దీర్ఘకాలిక పరిష్కారంగా నిలుస్తుందని పవన్ కళ్యాణ్ అభిప్రాయపడ్డారు.