Chandrababu: సంక్షోభంలో సూపర్ అడ్మిన్‌గా మారిన చంద్రబాబు ..విపత్తు నిర్వహణలో మరో మైలురాయి..

ఆంధ్రప్రదేశ్ ముఖ్యమంత్రి నారా చంద్రబాబు నాయుడు (N. Chandrababu Naidu) మరోసారి తన చాకచక్యాన్ని నిరూపించుకున్నారు. రాష్ట్రాన్ని వణికించిన మొంథా తుఫాన్ (Monthaa Cyclone) సమయంలో ఆయన వ్యవహరించిన తీరు అందరినీ ఆకట్టుకుంది. సంక్షోభ సమయాల్లో ఎలా స్పందించాలో ఆయనకు బాగా తెలుసని మళ్లీ చాటుకున్నారు. 1999లో శ్రీకాకుళం (Srikakulam) జిల్లాను తాకిన సూపర్ సైక్లోన్ సమయంలోనూ, ఇప్పుడు మొంథా తుఫాన్ సమయంలోనూ ఆయన చూపిన ప్రతిస్పందన ఒకేలా ఉంది. డిజాస్టర్ మేనేజ్‌మెంట్ (Disaster Management) విషయంలో చంద్రబాబు దేశవ్యాప్తంగా గుర్తింపు పొందిన నాయకుడు.

మొంథా తుఫాన్ ఆంధ్రప్రదేశ్ తీరాన్ని మంగళవారం రాత్రి మచిలీపట్నం (Machilipatnam) ,కాకినాడ (Kakinada) మధ్య నరసాపురం (Narasapuram) సమీపంలో తాకింది. ఈ తుఫాన్ వల్ల భారీ వర్షాలు, ఈదురు గాలులు రాష్ట్రాన్ని వణికించాయి. విద్యుత్ వ్యవస్థ దెబ్బతింది, వందలాది చెట్లు నేలకొరిగాయి. ఈ నేపథ్యంలో సీఎం చంద్రబాబు రెండు రోజులపాటు అర్ధరాత్రి వరకు సచివాలయంలో (Secretariat) ఉండి సహాయక చర్యలను పర్యవేక్షించారు. సోమవారం అర్ధరాత్రి వరకు పరిస్థితిని పరిశీలించిన ఆయన, మంగళవారం కూడా తెల్లవారుజామున సచివాలయానికి చేరుకుని అర్ధరాత్రి వరకు సమీక్షలు కొనసాగించారు.

ఆర్టిజిఎస్‌ (RTGS) ద్వారా గ్రామ, వార్డు సచివాలయాల సిబ్బందితో పలు మార్లు టెలికాన్ఫరెన్స్ నిర్వహించి పరిస్థితిని అడిగి తెలుసుకున్నారు. ఉదయం నుంచి అర్ధరాత్రి వరకు విరామం లేకుండా అధికారులు, మంత్రులతో సమావేశాలు జరిపారు. తుఫాన్ ప్రభావం ఎక్కువగా ఉన్న జిల్లాలకు సంబంధించి సమీక్షలు మూడు దఫాలు జరిగాయి. ప్రతి నివేదికను స్వయంగా పరిశీలిస్తూ తక్షణ చర్యలకు ఆదేశాలు జారీ చేశారు. చివరకు రాత్రి 11:30 గంటల తరువాత ఆయన ఇంటికి బయలుదేరారు.

ఇక మంత్రి నారా లోకేష్‌ (Nara Lokesh) కూడా సచివాలయంలోనే రాత్రంతా ఉండి పరిస్థితిని పర్యవేక్షించారు. జిల్లాల వారీగా అధికారులతో టెలికాన్ఫరెన్స్ నిర్వహించి ఎక్కడ ఏం పరిస్థితి ఉందో తెలుసుకున్నారు. విద్యుత్ అంతరాయాలు, రోడ్డు మూసివేతలు, చెట్లు పడిపోవడం వంటి అంశాలను సమీక్షించారు. ముందస్తు చర్యల వల్ల పెద్ద నష్టం జరగకుండా ప్రభుత్వం విజయవంతమైందని ఆయన తెలిపారు. ముఖ్యంగా ప్రాణ నష్టం తగ్గించడంలో అధికారులు సమర్థంగా పనిచేసారని ప్రశంసించారు.

ఏడు పదుల వయస్సులో ఉన్న చంద్రబాబు నాయుడు ఇంత శ్రమతో వ్యవహరించడం ప్రజల మనసులు దోచుకుంది. ఆయన పరిపాలనా నైపుణ్యం, సమయానికి తీసుకునే నిర్ణయాలు రాష్ట్ర ప్రజల్లో నమ్మకం పెంచుతున్నాయి. రాజకీయంగా ఆయనను వ్యతిరేకించే వారికీ ఈ పనితీరు ఆశ్చర్యం కలిగించింది. తుఫాన్ వంటి సంక్షోభ సమయంలో ఆయన చూపిన పట్టుదల, అంకితభావం మరోసారి నాయకత్వానికి నిదర్శనమైంది. రాష్ట్ర ప్రజల భద్రత కోసం అర్ధరాత్రి వరకు పనిచేసిన ఆయన తీరు నిజంగా ఆదర్శప్రాయమని చెప్పక తప్పదు.