BRS: పాపం బీఆర్ఎస్.. కీలక మీటింగ్ కూ ఆహ్వానం లేకపోయే..!!

జమ్మూ కశ్మీర్‌లోని పహల్గాం సమీపంలోని బైసరన్ లోయలో ఏప్రిల్ 22న జరిగిన ఉగ్రదాడి (Pahalgam Terrorist Attack) దేశవ్యాప్తంగా ఆందోళన కలిగించింది. ఈ దాడిలో 26 మంది పర్యాటకులు ప్రాణాలు కోల్పోగా, దేశ రాజకీయ వర్గాలు తీవ్ర ఆగ్రహం వ్యక్తం చేశాయి. ఈ నేపథ్యంలో కేంద్ర ప్రభుత్వం ఏప్రిల్ 24న దిల్లీలో అఖిలపక్ష సమావేశం (All Party Meeting) నిర్వహించింది. ఈ సమావేశానికి జాతీయ, ప్రాంతీయ పార్టీల నేతలు హాజరు కాగా, తెలంగాణలో ప్రతిపక్షంగా ఉన్న భారత రాష్ట్ర సమితి (BRS)కు ఆహ్వానం అందలేదు. ఈ విషయం రాజకీయ వర్గాల్లో తీవ్ర చర్చనీయాంశంగా మారింది.

అఖిలపక్ష సమావేశంలో బీజేపీ జాతీయ అధ్యక్షుడు జేపీ నడ్డా (KP Nadda), కేంద్ర హోం మంత్రి అమిత్ షా (Amit Shah), రక్షణ మంత్రి రాజ్‌నాథ్ సింగ్ (Rajnath Singh), విదేశాంగ మంత్రి ఎస్. జైశంకర్ (Jai Shankar), కాంగ్రెస్ అధ్యక్షుడు మల్లికార్జున్ ఖర్గే (Mallikarjuna Kharge), లోక్‌సభలో ప్రతిపక్ష నేత రాహుల్ గాంధీ (Rahul Gandhi), ఎంఐఎం అధ్యక్షుడు అసదుద్దీన్ ఒవైసీతో (Asaduddin Owaisi) పాటు ఇతర పార్టీల నేతలు పాల్గొన్నారు. ఈ సమావేశంలో పహల్గాం దాడిని ఖండిస్తూ, ఉగ్రవాదంపై కఠిన చర్యలు తీసుకోవాలని అన్ని పార్టీలూ ముక్తకంఠంతో చెప్పాయి. అయితే, రాజ్యసభలో నలుగురు ఎంపీలతో ప్రాతినిధ్యం ఉన్న బీఆర్ఎస్‌ను ఈ సమావేశానికి ఆహ్వానించకపోవడం ఆశ్చర్యం కలిగించింది. లోక్‌సభలో ఒకే ఒక ఎంపీ ఉన్న ఎంఐఎంకు ఆహ్వానం అందడం ఈ అంశాన్ని మరింత వివాదాస్పదం చేసింది.

తెలంగాణలో (Telangana) 2001లో ప్రారంభమైంది టీఆర్ఎస్. రాష్ట్ర ఏర్పాటు తర్వాత రెండు పర్యాయాలు అధికారం దక్కించుకుంది. 2023 అసెంబ్లీ ఎన్నికల్లో ఓటమి తర్వాత రాజకీయంగా ఒడిదొడుకులను ఎదుర్కొంటోంది. గతంలో రాష్ట్రంలో ఏకఛత్రాధిపత్యంగా వ్యవహరించిన ఈ పార్టీ, ఇప్పుడు కేంద్ర స్థాయిలో గుర్తింపు కోల్పోతున్నట్లు కనిపిస్తోంది. అఖిలపక్ష సమావేశానికి ఆహ్వానం లేకపోవడం బీఆర్ఎస్ నాయకత్వానికి, ముఖ్యంగా అధినేత కేసీఆర్‌కు అవమానకరంగా మారింది. రాజ్యసభలో ప్రాతినిధ్యం ఉన్నప్పటికీ, కేంద్రంలోని బీజేపీ నేతృత్వంలోని ఎన్డీఏ ప్రభుత్వం బీఆర్ఎస్‌ను పట్టించుకోకపోవడం రాజకీయ విశ్లేషకుల దృష్టిని ఆకర్షించింది.

బీఆర్ఎస్ గతంలో తెలంగాణ రాజకీయాల్లో అజేయ శక్తిగా ఉండేది. కేసీఆర్ (KCR) నాయకత్వంలో పార్టీ రాష్ట్ర ప్రయోజనాల కోసం గట్టిగా పోరాడింది. 2019లో జాతీయ స్థాయిలో ప్రభావం చూపాలనే ఉద్దేశంతో పార్టీ పేరును టీఆర్ఎస్ నుంచి బీఆర్ఎస్‌గా మార్చారు. అయితే, 2023 అసెంబ్లీ ఎన్నికల్లో కాంగ్రెస్ చేతిలో ఓటమి, 2024 లోక్‌సభ ఎన్నికల్లో ఒక్క సీటు కూడా గెలవలేకపోవడం పార్టీ బలాన్ని బాగా దెబ్బతీసింది. ప్రస్తుతం రాజ్యసభలో నలుగురు ఎంపీలు ఉన్నప్పటికీ, లోక్‌సభలో ప్రాతినిధ్యం లేకపోవడం బీఆర్ఎస్‌కు కేంద్ర స్థాయిలో ప్రాధాన్యతను తగ్గించింది.

బీఆర్ఎస్‌ను అఖిలపక్ష సమావేశానికి ఆహ్వానించకపోవడం వెనుక బీజేపీ (BJP) రాజకీయ వ్యూహం ఉందనే అనుమానాలు వ్యక్తమవుతున్నాయి. తెలంగాణలో బీజేపీ, బీఆర్ఎస్ మధ్య రాజకీయ పోటీ తీవ్రంగా ఉంది. 2024 లోక్‌సభ ఎన్నికల్లో బీజేపీ తెలంగాణలో ఎనిమిది సీట్లు గెలుచుకోగా, బీఆర్ఎస్ కు ఒక్క సీటూ రాలేదు. ఈ నేపథ్యంలో, కేంద్ర ప్రభుత్వం బీఆర్ఎస్‌ను ఉద్దేశపూర్వకంగా పక్కనపెట్టి ఉండవచ్చనే ఊహాగానాలు వినిపిస్తున్నాయి. ఎంఐఎంకు ఆహ్వానం అందడం ఈ అనుమానాలను మరింత బలపరిచింది.