China: సముద్రంలో తేలియాడే పెద్ద దీవి.. చైనా అద్భుత సృష్టి..!
- Published By: techteam
- November 23, 2025 / 11:10 AM IST
మొన్న త్రీగోర్జెస్ డ్యామ్.. నిన్న ఆకాశంలో కృత్రిమ చంద్రుడు.. ఇప్పుడు అంతర్జాతీయంగా అతిపెద్దదైన భారీ, కృత్రిమ దీవి నిర్మాణం.. ఇవన్నీ డ్రాగన్ చైనా (China) చేస్తున్న అద్భుతాలు. ప్రపంచ సూపర్ పవర్ కావాలన్న ధ్యేయంతో .. సరికొత్త, ఆధునిక పరిజ్ఞానంతో అద్భుత నిర్మాణాలు చేపడుతోంది. దీనిలో భాగంగా ప్రపంచంలో మరేదేశం ఊహించని విధంగా నిర్మాణాలకు శ్రీకారం చుట్టడమే కాదు.. వాటిని పూర్తి చేసి సెహబాష్ అనిపించుకుంటోంది.
అంతర్జాతీయంగా మరో భారీ, సంచలనాత్మక ప్రాజెక్టుకు చైనా శ్రీకారం చుట్టింది. ఏకంగా 78,000 టన్నుల బరువున్న ఒక కృత్రిమ దీవిని నిర్మిస్తోంది. దీని ప్రత్యేకత ఏమిటంటే.. ఇది సముద్రంలో కదులుతుంది, అంతేకాదు అణు దాడులను సైతం తట్టుకోగలదు. శాస్త్రీయ పరిశోధనల కోసం నిర్మిస్తున్నామని చైనా చెబుతున్నప్పటికీ, దీని నిర్మాణం సైనిక ప్రమాణాలకు అనుగుణంగా జరగడం ప్రపంచవ్యాప్తంగా ఆసక్తిని రేకెత్తిస్తోంది.
చైనాకు చెందిన ఫుజియాన్ విమాన వాహక నౌక అంత పరిమాణంలో ఉండే ఈ ప్లాట్‌ఫామ్‌ను 2028 నాటికి పూర్తి చేయాలని లక్ష్యంగా పెట్టుకున్నారు. ఎలాంటి బయటి సరఫరాలు లేకుండా 238 మంది సిబ్బంది నాలుగు నెలల పాటు ఇక్కడ నివసించేందుకు వీలుగా దీనిని తీర్చిదిద్దుతున్నారు. “ఈ ప్రాజెక్ట్ డిజైన్, నిర్మాణ పనులను వేగవంతం చేస్తున్నాం. 2028 నాటికి ఇది కార్యకలాపాలు ప్రారంభించేలా చూడటమే మా లక్ష్యమంటున్నారు ప్రాజెక్టు ప్రతినిధులు.
ఈ కృత్రిమ దీవి అత్యంత కఠినమైన సముద్ర వాతావరణాన్ని సైతం తట్టుకోగలదు. 6 నుంచి 9 మీటర్ల ఎత్తున ఎగిసిపడే అలలను, అత్యంత శక్తిమంతమైన కేటగిరీ 17 తుఫానులను కూడా ఇది ఎదుర్కోగలదు. సౌత్ చైనా మార్నింగ్ పోస్ట్ కథనం ప్రకారం.. తీవ్రమైన అఘాతాలను సైతం తేలికపాటి ఒత్తిళ్లుగా మార్చేసే “మెటామెటీరియల్” శాండ్‌విచ్ ప్యానెళ్లను ఇందులో వినియోగిస్తున్నారు.
అధికారికంగా దీనిని “డీప్-సీ ఆల్-వెదర్ రెసిడెంట్ ఫ్లోటింగ్ రీసెర్చ్ ఫెసిలిటీ” అని పిలుస్తున్నారు. అయితే, దీని రూపకల్పనలో చైనా సైనిక ప్రమాణమైన GJB 1060.1-1991 ను అనుసరించారు. అణు దాడులను తట్టుకునే నిర్మాణాలకు ఈ ప్రమాణాన్ని ఉపయోగిస్తారు. అత్యవసర విద్యుత్, కమ్యూనికేషన్స్, నావిగేషన్ కంట్రోల్ వంటి కీలక విభాగాలను అణు దాడుల నుంచి కాపాడటం చాలా ముఖ్యమని షాంఘై జియావో టాంగ్ యూనివర్సిటీ పరిశోధకులు పేర్కొన్నారు.
