కరోనా పోరులో డొనాల్డ్ ట్రంప్ విఫలం : ఒబామా

అమెరికా అధ్యక్షుడు డొనాల్డ్ ట్రంప్‍ కోవిడ్‍ 19పై పోరాటంలో పూర్తిగా విఫలమయ్యారని ఆ దేశ మాజీ అధ్యక్షుడు ఒరాక్‍ ఒబామా తీవ్ర స్థాయిలో విరుచుకుపడ్డారు. ఈ మహమ్మారిని ఎదుర్కోవడంలో ట్రంప్‍ వ్యవహరించిన తీరు విపత్తుని మరింత గందరగోళంగా మార్చిందని విమర్శించారు. వైట్‍హౌస్‍లో తనతో కలిసి పనిచేసిన సిబ్బందితో శుక్రవారం రాత్రి ఒబామా మాట్లాడారు. దీనికి అమెరికా మీడియా ప్రముఖంగా ప్రసారం చేసింది. సమర్థవంతమైన పాలకులు అధికారంలో ఉన్నప్పటికీ కరోనా వంటి ఆరోగ్య సంక్షోభాలను ఎదుర్కోవడం కత్తి మీద సామేనని, అలాంటిది నాకేంటి అన్న ధోరణిలో అధ్యక్షుడు ఉండడంతో అగ్రరాజ్యం కొంపమునిగిందని ఒబామా తీవ్ర వ్యాఖ్యలు చేశారు.

కరోనాతో వచ్చే ముప్పేమీ లేదని ఫిబ్రవరిలో వాదించిన ట్రంప్‍, మార్చికల్లా అది ఎంతో ప్రమాదకరమైందని అన్నారని ఇలా ఉగిసలాట ధోరణిలోనే ఆయన కాలం గడిపేశారని విమర్శించారు. కరోనాని ట్రంప్‍ ఎదుర్కొన్న తీరు ఈ విపత్తుని మరింత గందరగోళానికి గురి చేసి అందరిలోనూ తీవ్రమైన నిరాశ నిస్పృహలను నింపిందని ఒబామా విరుచుకుపడ్డారు. అమెరికా అధ్యక్ష ఎన్నికలు ఈ నవంబర్‍లో జరగనుండగా ట్రంప్‍పై డెమొక్రాట్‍ అయిన ఒబామా తీవ్రంగా విమర్శలు చేయడం చర్చకు దారితీసింది. వైట్‍హౌస్‍ సభ్యులతో మాట్లాడుతూ ఒబామా పదే పదే డెమొక్రాట్‍ అభ్యర్థి జో బిడెన్‍ను మద్దతునివ్వాలని కోరారు.