Anantapuram: 2029 దిశగా సంకేతాలు – అనంతపురం అర్బన్‌లో గుర్నాథ్ రెడ్డి ఎంట్రీపై రాజకీయ వేడి..

అనంతపురం జిల్లా (Ananthapuram district) రాజకీయాల్లో మెల్లగా కదలికలు మొదలయ్యాయి. గత కొంతకాలంగా నిశ్శబ్దంగా ఉన్న నాయకులు ఇప్పుడు మళ్లీ యాక్టివ్ అవుతున్న సూచనలు కనిపిస్తున్నాయి. ముఖ్యంగా రాయలసీమ (Rayalaseema) ప్రాంతంలో వైయస్సార్ కాంగ్రెస్ పార్టీకి (YSR Congress Party) బలమైన నేతల కొరత లేదన్నది వాస్తవం. అయితే అదే సమయంలో అంతర్గత విభేదాలు కూడా అదే స్థాయిలో కొనసాగుతున్నాయి. ప్రస్తుతం చాలా మంది నేతలు వేచి చూసే ధోరణిలో ఉన్నప్పటికీ, 2029 ఎన్నికలు దగ్గర పడే సరికి పరిస్థితి పూర్తిగా మారే అవకాశముందని రాజకీయ వర్గాలు అంచనా వేస్తున్నాయి.

ఈ నేపధ్యంలో అనంతపురం అర్బన్ నియోజకవర్గానికి (Ananthapuram Urban constituency) చెందిన మాజీ ఎమ్మెల్యే గుర్నాథ్ రెడ్డి (Gurunath Reddy) ఒక్కసారిగా వార్తల్లోకి వచ్చారు. నూతన సంవత్సర వేడుకల సందర్భంగా ఆయన వచ్చే ఎన్నికల్లో తాను పోటీ చేయనున్నట్లు ప్రకటించారు. ఈ ప్రకటనతో పార్టీ వర్గాల్లో చర్చ మొదలైంది. ముఖ్యంగా అదే నియోజకవర్గానికి చెందిన ప్రస్తుత పార్టీ ఇన్‌చార్జ్‌కు ఇది ఊహించని పరిణామంగా మారింది. గత రెండు ఎన్నికలుగా పార్టీ కోసం పని చేసిన తనను పక్కన పెడితే ఊరుకునేది లేదని ఆయన అసంతృప్తి వ్యక్తం చేస్తున్నట్లు సమాచారం.

రాయలసీమలో పరిస్థితులు ఎలా ఉన్నప్పటికీ ..అనంతపురం జిల్లాలో మాత్రం తెలుగుదేశం పార్టీకి (Telugu Desam Party) గట్టి పట్టు ఉంది. గ్రౌండ్ లెవల్‌లో ఆ పార్టీకి బలం ఎక్కువగా ఉండటంతో పాటు, ముఖ్యంగా బీసీ వర్గాల్లో టీడీపీకి అనుకూలత కనిపిస్తుంది. ఈ అంశాన్ని అప్పట్లో వైఎస్ రాజశేఖర్ రెడ్డి (Y. S. Rajasekhara Reddy) గుర్తించి బలమైన అభ్యర్థులను రంగంలోకి దించేవారు. అదే క్రమంలో 2009 ఎన్నికల్లో గుర్నాథ్ రెడ్డికి అవకాశం ఇచ్చారు. ఆ ఎన్నికల్లో ఆయన ఘన విజయం సాధించారు. రాజశేఖర్ రెడ్డి మరణం తర్వాత జగన్‌మోహన్ రెడ్డి (Y. S. Jagan Mohan Reddy) నాయకత్వాన్ని నమ్మి వైయస్సార్ కాంగ్రెస్ పార్టీలో కొనసాగారు. 2012 ఉప ఎన్నికల్లో మరోసారి గెలిచి ఎమ్మెల్యేగా నిలిచారు. అయితే 2014 ఎన్నికల్లో మాత్రం ఓటమిని ఎదుర్కొన్నారు.

ఆ తర్వాత పార్టీ రాజకీయ సలహా మండలిలో పనిచేస్తూ వచ్చారు. మధ్యలో టీడీపీలో చేరి, కొద్ది కాలానికే మళ్లీ వైసీపీలోకి రావడం వంటి పరిణామాలు చోటు చేసుకున్నాయి. గత రెండు ఎన్నికల్లో ఆయనకు టికెట్ దక్కలేదు. అయినప్పటికీ పార్టీని వీడకుండా కొనసాగడం విశేషం. ఇప్పుడు మాత్రం తాను మళ్లీ బరిలో ఉంటానని ప్రకటించడం ద్వారా పార్టీకి స్పష్టమైన సంకేతం పంపినట్టైంది. ఈ ప్రకటన వెనుక ఉన్న రాజకీయ లెక్కలు ఏమిటన్నదానిపై చర్చ జరుగుతోంది. పార్టీలో పెద్దల ఆశీర్వాదం లేకుండా ఇలాంటి ప్రకటన చేయరన్న అభిప్రాయం కూడా వినిపిస్తోంది. ఒక్క అనంతపురం అర్బన్ మాత్రమే కాదు, జిల్లాలోని పలు నియోజకవర్గాల్లో ప్రత్యామ్నాయ నాయకత్వం తెరపైకి వస్తోంది. ఇది వైయస్సార్ కాంగ్రెస్ పార్టీలో ఒక రకమైన అలజడిని సృష్టిస్తోంది. రాబోయే రోజుల్లో ఈ అసంతృప్త స్వరాలు ఎంతవరకు పెరుగుతాయో, వాటిని జగన్‌మోహన్ రెడ్డి ఎలా సమన్వయం చేస్తారో చూడాల్సి ఉంది.