ATA: టెన్నెస్సీ అర్రింగ్టన్‌ ఫైర్‌ డిపార్టుమెంట్‌ కు ఆటా భారీ విరాళం

అమెరికా తెలుగు సంఘం (ATA) సామాజిక సేవా కార్యక్రమాల్లో భాగంగా టెన్నెస్సీలోని ఆర్రింగ్టన్‌ వాలంటీర్‌ ఫైర్‌ డిపార్ట్‌మెంట్‌కు 8,000 డాలర్ల విరాళాన్ని అందించింది. సమాజానికి అర్థవంతమైన మద్దతు అందించడంలో ఆటా నిబద్ధతను ఈ విరాళం మరోసారి చాటిచెప్పింది. ఈ కార్యక్రమాన్ని నాష్‌విల్లే ఏటీఏ బృందం సమన్వయం చేసింది. ఈ బృందంలో కిషోర్‌ గూడూరు (బోర్డ్‌ ట్రస్టీ), రామకృష్ణారెడ్డి ఆల, నరేందర్‌ నూకల (రీజినల్‌ అడ్వైజర్‌), సుశీల్‌ చందా (విద్య కమిటీ చైర్‌), వంశీ నూకల (రీజినల్‌ కోఆర్డినేటర్‌), సాయిరామ్‌ రాచకొండ (రీజినల్‌ కోఆర్డినేటర్‌), ఈషాన్‌ చందా (రీజినల్‌ కోఆర్డినేటర్‌) ఉన్నారు.

ఈ కార్యక్రమానికి ఆటా అధ్యక్షుడు జయంత్‌ చల్లా, ప్రెసిడెంట్‌ ఎలక్ట్‌ సతీష్‌ రెడ్డి, అనిల్‌ బోడిరెడ్డి (బోర్డ్‌ ట్రస్టీ), శ్రీనివాస్‌ శ్రీరామ (బోర్డ్‌ ట్రస్టీ), రమణ గాంధ్రా (బిజినెస్‌ కమిటీ కో-చైర్‌) హాజరయ్యారు. స్థానికులు, కమ్యూనిటీ నాయకులు ఈ కార్యక్రమంలో పాల్గొని, ఈ ప్రాంతంలోని అత్యవసర సేవలకు ఆటా అందిస్తున్న మద్దతును ప్రశంసించారు. ఆర్రింగ్టన్‌ వాలంటీర్‌ ఫైర్‌ డిపార్ట్‌మెంట్‌ ప్రతినిధులు తమ కృతజ్ఞతను వ్యక్తం చేస్తూ, ఈ విరాళం చాలా కీలకమైన సమయంలో అందిందని తెలిపారు. ఈ ప్రాంతంలో వేగంగా వృద్ధి చెందుతున్న నేపథ్యంలో, పరిమిత బడ్జెట్‌తో పనిచేస్తున్నప్పటికీ, తమ డిపార్ట్‌మెంట్‌పై డిమాండ్‌లు పెరుగుతున్నాయని వారు పేర్కొన్నారు. ఆటా అందించిన ఈ సహకారం, సకాలంలో సమర్థవంతమైన అత్యవసర సేవలను అందించాలనే తమ లక్ష్యానికి గణనీయంగా సహాయపడుతుందని వారు తెలిపారు.

Click here for Photogallery