H1B Visa: భారతీయ టెకీలకు భారీ ఊరట.. హెచ్ 1 బీ వీసా నిబంధనల నుంచి పలువర్గాలకు మినహాయింపు

అమెరికా అధ్యక్షుడు ట్రంప్ (Trump) అమల్లోకి తెచ్చిన హెచ్ 1 బీ వీసా ఫీజు లక్షడాలర్లు.. కంపెనీలను, టెకీలను తీవ్ర గందరగోళంలోకి నెట్టేసింది. అంతేకాదు.. అసలు ఎవరికి ఈ ఫీజు వర్తిస్తుందన్న అంశంపై .. టెకీల నుంచి ఆందోళనలు వెల్లువెత్తాయి. ఇలాంటి తరుణంలో వీటన్నింటికీ తెరదించుతూ…యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ కీలకమైన మార్గదర్శకాలను జారీ చేసింది. లక్ష డాలర్ల (సుమారు రూ. 83 లక్షలు) అప్లికేషన్ ఫీజు నుంచి పలు వర్గాలకు మినహాయింపు ఇస్తున్నట్లు స్పష్టం చేసింది. ఈ నిర్ణయంతో ఇప్పటికే అమెరికాలో ఉన్న వేలాది మంది భారతీయ టెకీలు ఊపిరి పీల్చుకున్నారు.

కొత్త మార్గదర్శకాల ప్రకారం, ఈ లక్ష డాలర్ల ఫీజు నిబంధన కేవలం అమెరికా బయట ఉండి, కొత్తగా హెచ్-1బీ వీసా కోసం దరఖాస్తు చేసుకునే వారికి మాత్రమే వర్తిస్తుంది. ఇప్పటికే హెచ్-1బీ వీసా కలిగి ఉన్నవారు అమెరికాలోకి ప్రవేశించడానికి గానీ, దేశం విడిచి వెళ్లడానికి గానీ ఎలాంటి అడ్డంకులు ఉండవని ప్రభుత్వం స్పష్టం చేసింది.

అంతేకాకుండా అమెరికాలో ఉంటూనే ఇతర వీసా కేటగిరీల నుంచి హెచ్-1బీ వీసా స్టేటస్‌కు మారేవారికి ఈ ఫీజు నుంచి మినహాయింపునిచ్చారు. ఉదాహరణకు, ఎఫ్-1 విద్యార్థి వీసాపై ఉండి హెచ్-1బీకి మారాలనుకునే వారికి ఈ నిబంధన వర్తించదు. అలాగే, తమ వీసాను పొడిగించుకోవాలనుకునే వారికి, సవరణలు (amendment) కోరుకునే వారికి, లేదా స్టేటస్ మార్చుకునే వారికి కూడా ఈ భారీ రుసుము చెల్లించాల్సిన అవసరం లేదని హోమ్‌ల్యాండ్ సెక్యూరిటీ విభాగం తన ప్రకటనలో పేర్కొంది. కొత్త దరఖాస్తుల కోసం ఆన్‌లైన్ పేమెంట్ లింక్‌ను కూడా అందుబాటులోకి తెచ్చింది.

సెప్టెంబర్‌లో ట్రంప్ ప్రభుత్వం జారీ చేసిన ఈ ప్రకటనపై తీవ్ర గందరగోళం నెలకొంది. అమెరికన్లకే ఉద్యోగాలు దక్కాలనే ఉద్దేశంతో ఈ నిబంధన తెచ్చినట్లు ట్రంప్ అప్పట్లో తెలిపారు. అయితే, ఈ నిబంధన చట్టవిరుద్ధమని, అమెరికా వ్యాపారాలకు తీవ్ర నష్టం కలిగిస్తుందని ఆరోపిస్తూ దేశంలోని అతిపెద్ద వాణిజ్య సంస్థ ‘యూఎస్ ఛాంబర్ ఆఫ్ కామర్స్’ రెండు రోజుల క్రితమే ప్రభుత్వంపై దావా వేసింది. ఈ నేపథ్యంలోనే ప్రభుత్వం తాజాగా స్పష్టతను ఇచ్చింది.