Trump: నువ్వంటే నాకిష్టం లేదు.. ఆసిస్ రాయభారి రడ్ పై ట్రంప్ తీవ్ర అసహనం..

సాదారణంగా అత్యున్నత పదవిలో ఉన్న వ్యక్తులు.. చాలా విషయాల్లో లిబరల్ గా , అదే సమయంలో పూర్తి పాజిటివ్ మైండ్ సెట్ తో ఉంటారు. అంతేకాదు.. మాట్లాడే సమయంలో కూడా పూర్తి దౌత్య పరిభాషలో సంభోదిస్తారు. కానీ అమెరికా అధ్యక్షుడు ట్రంప్ (Trump) మాత్రం.. ఈ విషయంలో పూర్తిగా భిన్నం. ఎదుటి వ్యక్తి ఏమనుకుంటారన్నది తనకు అనవసరం.. చెప్పాలనుకున్నది ముఖం మీద కొట్టినట్లు చెప్పడం ఆయన పద్దతి. సాక్షాత్తూ ఆసిస్ ప్రధాని ఆంథోనీ అల్బనీస్ సమక్షంలో.. ఆదేశ రాయబారిపై అసహనం వ్యక్తం చేశారు ట్రంప్.

అమెరికా అధ్యక్ష భవనం వైట్‌హౌస్‌లో జరిగిన ఉన్నతస్థాయి సమావేశంలో నాటకీయ పరిణామాలు చోటుచేసుకున్నాయి. ఆస్ట్రేలియా ప్రధాని ఆంథోనీ అల్బనీస్ సమక్షంలోనే, అమెరికాలో ఆ దేశ రాయబారిగా ఉన్న కెవిన్ రడ్‌పై అధ్యక్షుడు డొనాల్డ్ ట్రంప్ తన అసహనాన్ని తీవ్రస్థాయిలో వ్యక్తం చేశారు. “నేను నిన్ను ఇష్టపడను. బహుశా ఎప్పటికీ ఇష్టపడకపోవచ్చు” అని ఆయన ముఖం మీదే చెప్పడం తీవ్ర చర్చనీయాంశంగా మారింది.

వైట్‌హౌస్‌లో జలాంతర్గాముల ఒప్పందంపై చర్చించేందుకు ట్రంప్, ఆస్ట్రేలియా ప్రధాని అల్బనీస్ సమావేశమయ్యారు. ఈ భేటీ స్నేహపూర్వక వాతావరణంలో జరుగుతున్న సమయంలో, ఒక విలేకరి కెవిన్ రడ్‌ను ఉద్దేశించి ఒక ప్రశ్న అడిగారు. గతంలో రడ్ చేసిన విమర్శలపై మీరెలా భావిస్తున్నారని ట్రంప్‌ను ప్రశ్నించారు. దీనికి ట్రంప్ స్పందిస్తూ, “ఆయనెక్కడ? ఇంకా మీ దగ్గరే పనిచేస్తున్నారా?” అని అల్బనీస్‌ను అడిగారు.

ప్రధాని అల్బనీస్ ఇబ్బందిగా నవ్వుతూ ఎదురుగా కూర్చున్న రడ్‌ను చూపించారు. వెంటనే రడ్ వివరణ ఇచ్చేందుకు ప్రయత్నిస్తూ, “అధ్యక్షా, నేను ఈ పదవి చేపట్టక ముందు చేసిన వ్యాఖ్యలవి” అని చెప్పబోయారు. అయితే, ఆయన మాటలకు అడ్డు తగిలిన ట్రంప్, “నువ్వంటే నాకు ఇష్టం లేదు” అని ఘాటుగా బదులిచ్చారు. ఈ అనూహ్య పరిణామంతో అక్కడున్న అధికారులు ఒక్కసారిగా అవాక్కయ్యారు. కొందరు నవ్వడంతో, మరో విలేకరి వెంటనే వేరే ప్రశ్న అడిగి వాతావరణాన్ని తేలికపరిచే ప్రయత్నం చేశారు.

వివాదానికి అసలు కారణం ఇదే:

కెవిన్ రడ్ గతంలో, ట్రంప్ అధికారంలో లేనప్పుడు, సోషల్ మీడియాలో ఆయనపై తీవ్ర విమర్శలు చేశారు. “చరిత్రలోనే అత్యంత విధ్వంసకర అధ్యక్షుడు” అని, “పశ్చిమ దేశాలకు ద్రోహి” అని రడ్ ఆరోపించారు. 2020 ఎన్నికల ఓటమి తర్వాత ట్రంప్ మద్దతుదారులు క్యాపిటల్‌పై దాడి చేసిన ఘటనను ప్రస్తావిస్తూ అమెరికా ప్రజాస్వామ్యాన్ని ట్రంప్ మంటగలుపుతున్నారని విమర్శించారు. అయితే, ట్రంప్ మళ్లీ అధ్యక్ష ఎన్నికల్లో గెలవగానే రడ్ ఆ పోస్టులను తొలగించారు.