Konda Issue: సీఎంతో కొండా దంపతుల భేటీ.. వివాదానికి తెరపడినట్టేనా?

తెలంగాణ రాజకీయాల్లో (Telangana Politics) గత కొన్ని రోజులుగా హాట్ టాపిక్‌గా మారిన ముఖ్యమంత్రి రేవంత్ రెడ్డి (CM Revanth Reddy), మంత్రి కొండా సురేఖ (Konda Surekha) దంపతుల మధ్య నెలకొన్న విభేదాలకు తెరపడినట్లేనని తాజా పరిణామాలు సూచిస్తున్నాయి. దీపావళి పండుగ సందర్భంగా మంత్రి కొండా సురేఖ, ఆమె భర్త కొండా మురళీ ముఖ్యమంత్రి రేవంత్ రెడ్డితో భేటీ కావడం చర్చనీయాంశంగా మారింది. జూబ్లీహిల్స్‌లోని సీఎం నివాసంలో జరిగిన ఈ భేటీకి ఉపముఖ్యమంత్రి మల్లు భట్టి విక్రమార్క, టీపీసీసీ అధ్యక్షుడు మహేశ్ కుమార్ గౌడ్‌ మధ్యవర్తులుగా వ్యవహరించారు. అయితే, ఈ సమావేశానికి కొన్ని రోజుల ముందు మంత్రి కొండా సురేఖ నివాసం వద్ద జరిగిన హైడ్రామా, ఆమె కుమార్తె కొండా సుస్మిత (Konda Susmitha)పటేల్ చేసిన సంచలన ఆరోపణల నేపథ్యంలో ఈ భేటీ ప్రాధాన్యత సంతరించుకుంది.

మంత్రి కొండా సురేఖ ఓఎస్డీ సుమంత్‌, సిమెంట్ కంపెనీ యాజమాన్యాన్ని బెదిరించారనే ఆరోపణల నేపథ్యంలో రాష్ట్ర ప్రభుత్వం ఆయన్ను పదవి నుంచి తొలగించింది. సుమంత్‌ను అరెస్ట్ చేసేందుకు వరంగల్ టాస్క్‌ఫోర్స్ పోలీసులు మఫ్టీలో మంత్రి కొండా సురేఖ నివాసానికి వెళ్లారు. ఈ పరిణామంతో అక్కడ తీవ్ర ఉద్రిక్తత నెలకొంది. పోలీసులు తన ఇంటికి రావడాన్ని తీవ్రంగా వ్యతిరేకించిన కొండా సురేఖ కుమార్తె కొండా సుస్మిత పటేల్.. ప్రభుత్వంపై, సొంత పార్టీ నేతలపైనే నిప్పులు చెరిగారు. బీసీ వర్గానికి చెందిన తమ తల్లిని అణగదొక్కేందుకు ముఖ్యమంత్రి రేవంత్ రెడ్డితో పాటు మరికొందరు రెడ్డి నాయకులు కుట్ర చేస్తున్నారని ఆమె బహిరంగంగా ఆరోపించారు. ఈ వ్యాఖ్యలు కాంగ్రెస్ పార్టీలో కలకలం సృష్టించాయి. మాజీ మావోయిస్టు అయిన తమ తండ్రి కొండా మురళీకి ప్రాణహాని ఉందని, గన్‌మెన్‌లను కూడా తొలగించారని ఆమె ఆవేదన వ్యక్తం చేశారు.

ఈ మొత్తం వ్యవహారంపై కాంగ్రెస్ అధిష్టానం కూడా ఆగ్రహం వ్యక్తం చేసినట్లు తెలుస్తోంది. ఈ నేపథ్యంలోనే భట్టి విక్రమార్క, మహేశ్ కుమార్ గౌడ్‌ల చొరవతో కొండా దంపతులు సీఎం రేవంత్ రెడ్డితో భేటీ అయ్యారు. ఈ భేటీలో దీపావళి శుభాకాంక్షలు తెలియజేసిన అనంతరం, ఇటీవల జరిగిన పరిణామాలపై, ముఖ్యంగా సుస్మిత చేసిన ఆరోపణలపై కొండా దంపతులు ముఖ్యమంత్రికి వివరణ ఇచ్చినట్లు విశ్వసనీయ వర్గాల సమాచారం.

మంత్రి ఇంట్లోకి పోలీసులు వెళ్లడం, మంత్రి కుమార్తె సీఎంపైనే ఆరోపణలు చేయడం వంటి తీవ్ర పరిణామాల తర్వాత జరిగిన ఈ సమావేశం తెలంగాణ రాజకీయాల్లో కీలక మలుపుగా భావిస్తున్నారు. ఈ భేటీతో కొండా కుటుంబం, సీఎం రేవంత్ రెడ్డి మధ్య నెలకొన్న విభేదాలు సమసిపోయాయని, ఈ వివాదానికి ఫుల్‌స్టాప్ పడిందని పార్టీ వర్గాలు భావిస్తున్నాయి. అయితే, ముఖ్యమంత్రితో భేటీ తర్వాత ఈ వ్యవహారంపై రేవంత్ రెడ్డి ఎలాంటి నిర్ణయం తీసుకుంటారు, కొండా కుటుంబానికి ఎలాంటి హామీ లభిస్తుంది అనే దానిపై ఇంకా స్పష్టత రావాల్సి ఉంది. ఉమ్మడి వరంగల్ జిల్లా రాజకీయాల్లో పట్టున్న కొండా కుటుంబం, కాంగ్రెస్ ప్రభుత్వంలోని పెద్దల మధ్య నెలకొన్న తాత్కాలిక దూరం ఈ భేటీతో తొలగిపోయినట్లేనని విశ్లేషకులు అభిప్రాయపడుతున్నారు.