Anil Ravipudi: పొగడ్తైనా, విమర్శైనా స్వీకరిస్తా.. మన శంకర వరప్రసాద్ సినిమాపై అనిల్ రావిపూడి ధీమా

సంక్రాంతి కానుకగా మెగాస్టార్ చిరంజీవి నటించిన ‘మన శంకర వరప్రసాద్ గారు’ చిత్రం ఇవాళ విడుదలై బాక్సాఫీస్ వద్ద అదిరిపోయే ఓపెనింగ్స్ సాధిస్తోంది. సక్సెస్‌ఫుల్ డైరెక్టర్ అనిల్ రావిపూడి రూపొందించిన ఈ చిత్రం, మొదటి షో నుండే పాజిటివ్ టాక్ తో దూసుకుపోతోంది. ఈ సందర్భంగా దర్శకుడు అనిల్ రావిపూడి సినిమా వెనుక ఉన్న శ్రమను, ఆసక్తికర విషయాలను వెల్లడించారు.

శంకర వరప్రసాద్ పాత్రలో మెగాస్టార్ సెల్ఫ్ సెటైర్స్
సినిమా అంతా చిరంజీవి పోషించిన ‘శంకర వరప్రసాద్’ అనే పాత్ర చుట్టూనే తిరుగుతుందని అనిల్ తెలిపారు. భార్యాభర్తల మధ్య వచ్చే సున్నితమైన భావోద్వేగ సంఘర్షణను ఈ సినిమాలో ప్రధానంగా చూపించారు. ఈ చిత్రంలో చిరంజీవి గారు తన సొంత ఇమేజ్‌పైనే తాను వేసుకున్న ‘సెల్ఫ్ సెటైర్స్’ ప్రేక్షకులను కడుపుబ్బ నవ్విస్తాయన్నారు. మెగాస్టార్ తన గొప్ప మనసుతో ఇలాంటి సన్నివేశాలకు అంగీకరించడం వల్లనే సినిమా ఇంత సహజంగా వచ్చిందని అనిల్ కొనియాడారు.

వెంకీ గౌడ ఎంట్రీ.. 20 నిమిషాల వెండితెర అద్భుతం
ఈ సినిమాలో విక్టరీ వెంకటేష్ ‘వెంకీ గౌడ’ అనే కన్నడ మైనింగ్ బిజినెస్‌మెన్ పాత్రలో అద్భుతంగా నటించారు. చిరంజీవి, వెంకటేష్ మధ్య వచ్చే సుమారు 20 నిమిషాల సన్నివేశాలు సినిమాకు హైలైట్‌గా నిలుస్తున్నాయి. వీరిద్దరి మధ్య ఉండే కెమిస్ట్రీ, కామెడీ టైమింగ్ చూస్తుంటే ప్రేక్షకులు ఈలలు, గోలలతో థియేటర్లను హోరెత్తిస్తారన్నారు. చిరు-వెంకీ కాంబినేషన్ చిత్రీకరించిన సమయం తన జీవితంలో ఎప్పటికీ గుర్తుండిపోయే జ్ఞాపకమని అనిల్ భావోద్వేగానికి లోనయ్యారు.

సామాన్య ప్రేక్షకుల కోసం మెగాస్టార్ నిర్ణయం
సినిమా టికెట్ ధరల గురించి అనిల్ ఒక ముఖ్యమైన విషయం చెప్పారు. సామాన్య కుటుంబ ప్రేక్షకులపై భారం పడకూడదని, టికెట్ ధరలు నార్మల్ గానే ఉండాలని చిరంజీవి కచ్చితంగా ఆదేశించారని చెప్పారు. అందుకే భారీ సినిమా అయినప్పటికీ సామాన్యులకు అందుబాటులో ఉండేలా ధరలను నిర్ణయించినట్లు ఆయన తెలిపారు. అలాగే చివరి నిమిషంలో చిత్రీకరించిన ‘హుక్ స్టెప్’ సాంగ్ థియేటర్లలో ‘మెగా మ్యాజిక్’ సృష్టిస్తోందని, భీమ్స్ అందించిన సంగీతం సినిమా విజయానికి తోడ్పడిందని ఆయన పేర్కొన్నారు. మొత్తానికి, విమర్శలను కూడా నవ్వుతూ స్వీకరిస్తానని చెప్పే అనిల్ రావిపూడి, ఈ సినిమాతో సంక్రాంతి విజేతగా నిలిచారనడంలో సందేహం లేదు. చిరంజీవి, వెంకటేష్, బాలకృష్ణ వంటి అగ్ర హీరోలతో పని చేసిన అనిల్, త్వరలో నాగార్జునతో కూడా సినిమా చేసే అవకాశం కోసం ఎదురుచూస్తున్నానని తన మనసులోని మాటను బయటపెట్టారు.