TTDP : తెలంగాణలోకి టీడీపీ మళ్లీ అడుగు పెడుతోందా..?

తెలంగాణ రాజకీయాల్లో తెలుగుదేశం పార్టీ (TDP) మళ్లీ బరిలోకి దిగుతుందన్న చంద్రబాబు (Chandrababu) ప్రకటన రాష్ట్రంలో ఆసక్తికర చర్చకు దారితీసింది. వచ్చే ఎన్నికల్లో తెలంగాణలో (Telangana) పోటీ చేస్తామని చంద్రబాబు ప్రకటించడంతో రాజకీయ వర్గాల్లో కొత్త ఊపు మొదలైంది. రాష్ట్ర విభజన తర్వాత టీడీపీ బలం తెలంగాణలో గణనీయంగా తగ్గినప్పటికీ, ప్రస్తుత రాజకీయ పరిణామాలు, బీఆర్ఎస్ (BRS) బలహీనత, బీజేపీతో )BJP) కూటమి అవకాశం, జనసేన (Janasena) మద్దతు వంటి అంశాలు టీడీపీకి కొత్త జోష్‌ను ఇస్తున్నాయి.

2014లో తెలంగాణ రాష్ట్ర ఆవిర్భావం తర్వాత టీడీపీ బలహీనపడింది. 2014 ఎన్నికల్లో బీజేపీతో కలిసి పోటీ చేసిన టీడీపీ 15 అసెంబ్లీ సీట్లు గెలిచినప్పటికీ, ఆ తర్వాత చాలా మంది ఎమ్మెల్యేలు బీఆర్ఎస్ లో చేరారు. 2018 ఎన్నికల్లో కేవలం ఇద్దరు ఎమ్మెల్యేలు (సండ్ర వెంకటవీరయ్య, మెచ్చా నాగేశ్వర్‌రావు) మాత్రమే గెలిచారు. వీరు కూడా 2021 నాటికి బీఆర్ఎస్‌లో చేరడంతో తెలంగాణ అసెంబ్లీలో టీడీపీ ప్రాతినిధ్యం శూన్యమైంది. ఈ పరిణామాలతో టీడీపీ కేడర్ ఎక్కువగా బీఆర్ఎస్‌లో విలీనమైంది. అయితే, ఇప్పటికీ ఖమ్మం, హైదరాబాద్, రంగారెడ్డి జిల్లాల్లో టీడీపీకి అభిమాన గణం ఉంది. ముఖ్యంగా కమ్మ, కాపు వంటి కులాల్లో టీడీపీని అభిమానించే వాళ్లున్నారు.

2023 అసెంబ్లీ ఎన్నికల్లో బీఆర్ఎస్ ఓటమి, కాంగ్రెస్ అధికారంలోకి రావడం తెలంగాణ రాజకీయాల్లో కొత్త డైనమిక్స్‌ను తెచ్చింది. బీఆర్ఎస్‌లో అంతర్గత విభేదాలు, నాయకులు బయటకు వెళ్లిపోవడం వంటివి ఆ పార్టీ బలాన్ని బాగా దెబ్బతీశాయి. ఈ పరిస్థితిని తమకు అనుకూలంగా మార్చుకునేందుకు టీడీపీ సిద్ధమవుతోంది. చంద్రబాబు ఇప్పటికే ప్రతి నెలా తెలంగాణలో గ్రామస్థాయి నుంచి పార్టీ నిర్మాణంపై దృష్టి పెడుతున్నారు. సభ్యత్వ నమోదు కార్యక్రమం ద్వారా పార్టీ బలోపేతానికి కృషి చేస్తున్నారు.

టీడీపీకి బీజేపీతో గతంలోనే పొత్తు అనుభవం ఉంది. 2014 ఎన్నికల్లో బీజేపీతో కలిసి పోటీ చేసిన టీడీపీ గణనీయమైన సీట్లు సాధించింది. ప్రస్తుతం తెలంగాణలో బీజేపీ 8 అసెంబ్లీ, 8 లోక్‌సభ సీట్లతో రెండో అతిపెద్ద పార్టీగా ఉంది. ఈ సంస్థాగత బలం, కేంద్రంలో ఎన్డీయే అధికారంతో టీడీపీకి అనుకూల వాతావరణం ఉంది. అదే సమయంలో, జనసేన అధ్యక్షుడు పవన్ కల్యాణ్ యువత, సినీ అభిమానుల్లో ఉన్న ఆకర్షణ ఎన్డీయే కూటమికి అదనపు బలం. 2014లో జనసేన టీడీపీ-బీజేపీ కూటమికి మద్దతిచ్చిన చరిత్ర ఉంది. పవన్ కల్యాణ్ మాస్ ఇమేజ్, కాపు సామాజిక వర్గంలో పట్టు టీడీపీకి ఖమ్మం, వరంగల్ వంటి ప్రాంతాల్లో లబ్ధి చేకూర్చవచ్చు.

తెలంగాణలో కమ్మ, కాపు, రెడ్డి, బీసీ వర్గాలు రాజకీయంగా కీలకం. రాష్ట్ర విభజన తర్వాత టీడీపీ కమ్మ, కాపు వర్గాల్లో బలంగా ఉంది. ముఖ్యంగా ఖమ్మంలో టీడీపీకి మంచి బలముంది. బీఆర్ఎస్ బలహీనతతో ఈ వర్గాలు మళ్లీ టీడీపీ వైపు మొగ్గు చూపే అవకాశం ఉంది. బీసీ, ఎస్సీ, ఎస్టీ వర్గాల్లో బీజేపీకి మంచి పేరుంది. చంద్రబాబు సాంకేతికత, అభివృద్ధి ఎజెండా హైదరాబాద్‌లోని యువ, ఐటీ ఓటర్లను ఆకర్షించే అవకాశం ఉంది.

మొత్తానికి చంద్రబాబు నాయకత్వంలో టీడీపీ తెలంగాణలో పునరాగమనానికి సిద్ధమవుతోంది. బీజేపీ సంస్థాగత బలం, పవన్ కల్యాణ్ జనసేన మద్దతు, కుల సమీకరణాలు ఈ కూటమికి అనుకూలంగా ఉన్నాయి. అయితే, స్థానిక నాయకత్వం, ఓటర్లను ఆకర్షించే కార్యక్రమాలు, బీఆర్ఎస్, కాంగ్రెస్‌లతో పోటీ టీడీపీ ముందున్న సవాళ్లు. 2028 ఎన్నికల్లో టీడీపీ ఎంతవరకు ఈ అవకాశాన్ని సద్వినియోగం చేసుకుంటుందనేది వేచి చూడాలి.