KCR Vs Revanth : కేసీఆర్‌కు ఇచ్చిపడేసిన రేవంత్ రెడ్డి..! ముదిరిన మాటల యుద్ధం!

తెలంగాణ రాజకీయాల్లో మరోసారి సెగలు పుడుతున్నాయి. గత కొద్దిరోజులుగా బీఆర్ఎస్ అధినేత కేసీఆర్, ముఖ్యమంత్రి రేవంత్ రెడ్డి మధ్య సాగుతున్న మాటల యుద్ధం ఇప్పుడు వ్యక్తిగత దూషణలు, సవాళ్లు, ప్రతిసవాళ్ల స్థాయికి చేరింది. హుందాగా సాగాల్సిన రాజకీయ విమర్శలు కాస్తా ‘తోలు తీస్తా’ అనే హెచ్చరికల నుండి ‘చింతమడకలో ఉరివేస్తా’ అనే స్థాయికి వెళ్లడం రాష్ట్ర రాజకీయాల్లో తీవ్ర చర్చనీయాంశమైంది. పదేళ్ల పాటు అధికారాన్ని అనుభవించిన కేసీఆర్, ప్రస్తుతం అధికారంలో ఉన్న రేవంత్ రెడ్డి మధ్య పచ్చగడ్డి వేస్తే భగ్గుమనే పరిస్థితి నెలకొంది. ఆదివారం కేసీఆర్ చేసిన వ్యాఖ్యలు ఒకెత్తయితే, బుధవారం రేవంత్ రెడ్డి ఇచ్చిన కౌంటర్ అంతకు మించి ఉండటంతో రాజకీయాలు ఒక్కసారిగా వేడెక్కాయి.

చాలా కాలం విరామం తర్వాత మీడియా ముందుకు వచ్చిన కేసీఆర్, తనదైన శైలిలో కాంగ్రెస్ ప్రభుత్వంపై విరుచుకుపడ్డారు. ప్రభుత్వం విఫలమైందని చెప్తూనే, “నేను రంగంలోకి దిగాను.. ఇక తోలు తీస్తా” అంటూ కార్యకర్తల్లో జోష్ నింపే ప్రయత్నం చేశారు. రేవంత్ రెడ్డి పేరు ఎత్తకుండానే, పరిపాలన గాడి తప్పిందని కేసీఆర్ చేసిన విమర్శలు బీఆర్ఎస్ శ్రేణులకు కొత్త ఉత్సాహాన్ని ఇచ్చాయి. కేసీఆర్ మళ్ళీ యాక్టివ్ అయితే కాంగ్రెస్ కు కష్టమేనన్న సంకేతాలను పంపే ప్రయత్నం చేశారు.

కేసీఆర్ విమర్శలకు సీఎం రేవంత్ రెడ్డి ఊహించని రీతిలో స్పందించారు. సాధారణంగా ముఖ్యమంత్రి హోదాలో ఉన్నవారు సంయమనం పాటిస్తారని ఆశించినా, రేవంత్ మాత్రం ‘దెబ్బకు దెబ్బ’ అనే ధోరణిని ఎంచుకున్నారు. కేసీఆర్ వాడిన పదజాలం కంటే పదునైన, ఘాటైన పదాలతో విరుచుకుపడ్డారు. కేసీఆర్ కుటుంబం, ఆయన ఆరోగ్యం, గతంలో తనపై పెట్టిన కేసులు.. ఇలా ప్రతి అంశాన్ని రేవంత్ ప్రస్తావించారు. “చింతమడకలో వేలాడదీసి కొడతారు” అనడం ఆయన ఆగ్రహానికి పరాకాష్ట. 2029లో మళ్ళీ కాంగ్రెస్సే అధికారంలోకి వస్తుందని, కల్వకుంట్ల కుటుంబాన్ని రాజకీయంగా లేకుండా చేస్తానని శపథం చేయడం ద్వారా రేవంత్ తన లక్ష్యాన్ని స్పష్టం చేశారు. ఫ్యూచర్ సిటీ గురించి విమర్శలు చేసిన కేసీఆర్ కు, కాళేశ్వరం వైఫల్యాలు, ఫోన్ ట్యాపింగ్ కేసులను గుర్తు చేస్తూ రేవంత్ ఇరుకున పెట్టే ప్రయత్నం చేశారు.

ఈ మాటల యుద్ధం సోషల్ మీడియాలో పెద్ద ఎత్తున చర్చకు దారితీసింది. కేసీఆర్ ను అంత మాటలంటావా అని బీఆర్ఎస్ నేతలు మండిపడుతుంటే, రేవంత్ మద్దతుదారులు మాత్రం “తిట్ల సంస్కృతిని మొదలుపెట్టిందే కేసీఆర్” అని గుర్తు చేస్తున్నారు. గతంలో కేసీఆర్ ప్రతిపక్ష నాయకులను ఉద్దేశించి వాడిన పదజాలాన్ని ఉదహరిస్తూ, రేవంత్ రెడ్డి ఇస్తోంది కేవలం ‘రిటర్న్ గిఫ్ట్’ మాత్రమేనని సమర్థిస్తున్నారు.

ఈ రాజకీయ యుద్ధం వెనుక బలమైన వ్యూహాలు కనిపిస్తున్నాయి. ఓటమి తర్వాత డీలా పడ్డ బీఆర్ఎస్ కార్యకర్తలను ఉత్సాహపరచడానికి కేసీఆర్ కు ఈ దూకుడు అవసరం. అయితే తాను ఎవరికీ భయపడనని, కేసీఆర్ లాంటి ఉద్దండుడిని కూడా ఎదుర్కోగలనని నిరూపించుకోవడం ద్వారా రేవంత్ తన నాయకత్వాన్ని మరింత బలపరుచుకుంటున్నారు. ఈ తిట్ల పురాణంలో అసలు ప్రజా సమస్యలు, హామీల అమలు వంటి అంశాలు పక్కదారి పడుతున్నాయనే విమర్శ కూడా వినిపిస్తోంది.

తెలంగాణలో రాజకీయం ఇప్పుడు కేవలం విధానాల పరమైన విమర్శలకే పరిమితం కాకుండా, నువ్వా-నేనా అనే వ్యక్తిగత పోరుగా మారింది. అసెంబ్లీ వేదికగా చర్చకు రమ్మని రేవంత్ విసిరిన సవాల్ ను బీఆర్ఎస్ స్వీకరిస్తుందో లేదో చూడాలి. ఏది ఏమైనా, రాబోయే రోజుల్లో ఈ “వార్” మరింత ముదిరే అవకాశం ఉందే తప్ప, తగ్గే సూచనలు కనిపించడం లేదు.