BRS: ఫాంహౌస్‌కు బీఆర్ఎస్ నేతలు.. కేసీఆర్ పిలుపు..!!

భారత రాష్ట్ర సమితి (BRS) అధ్యక్షుడు, మాజీ ముఖ్యమంత్రి కె. చంద్రశేఖర్ రావు (KCR) రాబోయే జూబ్లీహిల్స్ ఉపఎన్నిక, స్థానిక సంస్థల ఎన్నికల్లో విజయం సాధించే లక్ష్యంతో కీలక వ్యూహాత్మక సమావేశాన్ని నిర్వహిస్తున్నారు. ఈ సమావేశంలో బీఆర్ఎస్ వర్కింగ్ ప్రెసిడెంట్ కె.టి. రామారావు (KTR), సీనియర్ నేత టి. హరీష్ రావు సహా పార్టీ అగ్రనేతలు పాల్గొన్నారు. సిద్ధిపేట జిల్లాలోని ఎర్రవెల్లిలోని కేసీఆర్ ఫామ్‌హౌస్‌లో ఈ సమావేశం జరగింది. అసెంబ్లీ సమావేశాలు, కాళేశ్వరం లిఫ్ట్ ఇరిగేషన్ ప్రాజెక్టుపై జస్టిస్ పి.సి.ఘోస్ కమిషన్ రిపోర్టు, పార్టీ బలోపేతం కోసం తీసుకోవాల్సిన చర్యలపై చర్చించి, తదుపరి కార్యాచరణను రూపొందించనున్నారు.

2023 అసెంబ్లీ ఎన్నికల్లో కాంగ్రెస్ చేతిలో ఓటమి, ఆ తర్వాత 2024 లోక్‌సభ ఎన్నికల్లో ఒక్క సీటు కూడా గెలవకపోవడంతో బీఆర్ఎస్ రాజకీయంగా డీలా పడింది. పార్టీకి చెందిన దాదాపు డజను మంది శాసనసభ్యులు కాంగ్రెస్‌లో చేరడం, పలువురు సీనియర్ నేతలు బీజేపీ వైపు మొగ్గు చూపడం వంటి సంఘటనలు పార్టీని మరింత బలహీనపరిచాయి. ఈ నేపథ్యంలో, కేసీఆర్ పార్టీని పునరుద్ధరించేందుకు, రాజకీయ వ్యూహాలను రూపొందించేందుకు ఈ సమావేశం కీలకమని రాజకీయ విశ్లేషకులు భావిస్తున్నారు. జూబ్లీహిల్స్ ఉపఎన్నిక బీఆర్ఎస్‌కు అత్యంత ప్రతిష్టాత్మకంగా మారింది. ఈ ఉపఎన్నికలో విజయం సాధిస్తే, పార్టీ రాజకీయంగా మళ్లీ పైచేయి సాధించే అవకాశం ఉంది. అదే సమయంలో, స్థానిక సంస్థల ఎన్నికలు, మున్సిపల్ కార్పొరేషన్‌ల ఎన్నికలు పార్టీకి పెద్ద సవాల్ గా మారాయి. ఈ ఎన్నికల్లో కాంగ్రెస్, బీజేపీలను ఎదుర్కొనేందుకు కేసీఆర్ సమగ్ర వ్యూహం రూపొందిస్తున్నట్టు తెలుస్తోంది.

కాళేశ్వరం లిఫ్ట్ ఇరిగేషన్ ప్రాజెక్టును బీఆర్ఎస్ హయాంలో కేసీఆర్ ప్రతిష్టాత్మకంగా తీసుకున్నారు. అయితే, జస్టిస్ పి.సి.ఘోస్ కమిషన్ ఈ ప్రాజెక్టులో అవినీతి, ఆర్థిక అక్రమాలు జరిగాయని పేర్కొంది. ఇది బీఆర్ఎస్‌కు రాజకీయంగా ఎదురుదెబ్బగా మారింది. ఈ నేపథ్యంలో కేసీఆర్ సమావేశం ఆసక్తి రేపుతోంది. కాళేశ్వరం రిపోర్టుపై కాంగ్రెస్ ప్రభుత్వం చేస్తున్న ఆరోపణలను ఎదుర్కొనే వ్యూహంపై చర్చించనున్నారు. ప్రాజెక్టు సాంకేతిక, ఆర్థిక వివరాలను పార్టీ నేతలకు వివరించడం, ప్రజల దృష్టికి ఈ ఆరోపణలను తీసుకువెళ్లే కార్యాచరణ రూపొందించే అవకాశం ఉంది.

రాబోయే అసెంబ్లీ సమావేశాల్లో కాంగ్రెస్ ప్రభుత్వ వైఫల్యాలను లేవనెత్తడం, ప్రజా సమస్యలపై గట్టిగా పోరాడటం బీఆర్ఎస్ లక్ష్యంగా పెట్టుకుంది. కేసీఆర్ గతంలో అసెంబ్లీ సమావేశాలకు హాజరు కాకపోవడంపై విమర్శలు ఎదుర్కొన్నారు. ఈ సారైనా ఆయన అసెంబ్లీకి హాజరవుతారా.. లేదా అనే దానిపై క్లారిటీ లేదు. రైతులు, విద్యార్థుల సమస్యలు, కృష్ణా నది జలాల హక్కులు వంటి అంశాలపై ప్రభుత్వాన్ని ఇరుకున పెట్టేందుకు బీఆర్ఎస్ సిద్ధమవుతోంది. కాంగ్రెస్ ప్రభుత్వం ఎన్నికల సమయంలో ఇచ్చిన హామీలను నెరవేర్చడంలో విఫలమైందని, బీసీలకు 42% రిజర్వేషన్‌లు అమలు చేయలేదని బీఆర్ఎస్ నేతలు ఆరోపిస్తున్నారు. అదే విధంగా, కేంద్రంలోని బీజేపీ ప్రభుత్వం తెలంగాణకు ఒక్క రూపాయి కూడా కేటాయించలేదని, రాష్ట్ర హక్కులను కాపాడడంలో విఫలమైందని కేటీఆర్ విమర్శించారు. ఈ సమావేశంలో, ఈ రెండు పార్టీలను రాజకీయంగా ఎదుర్కొనే వ్యూహాలను కూడా రూపొందించనున్నారు.

కేసీఆర్ నాయకత్వంలో బీఆర్ఎస్ ఈ సమావేశం ద్వారా తన రాజకీయ ఉనికిని తిరిగి చాటుకోవడానికి, పార్టీ క్యాడర్‌లో ఉత్సాహాన్ని నింపడానికి సన్నద్ధమవుతోంది. జూబ్లీహిల్స్ ఉపఎన్నిక, స్థానిక సంస్థల ఎన్నికల్లో విజయం సాధించడం, కాంగ్రెస్, బీజేపీలను ఎదుర్కొనడం, కాళేశ్వరం రిపోర్టుపై ఆరోపణలను తిప్పికొట్టడం.. బీఆర్ఎస్‌కు కీలక పరీక్షగా మారనున్నాయి. కేసీఆర్ ఈ సవాళ్లను ఎలా ఎదుర్కొంటారన్నది వేచి చూడాలి.