Mahaa News: మహాన్యూస్ పై బీఆర్ఎస్ దాడి… KTR ఏమన్నారంటే..!?

హైదరాబాద్‌ జూబ్లీ హిల్స్‌ లోని మహాన్యూస్ చానెల్ (Mahaa News) కార్యాలయంపై బీఆర్ఎస్ (BRS) కార్యకర్తలు దాడి చేశారు. ఆఫీసు ముందున్న కార్లు, బైకులతో పాటు కార్యాలయంలోకి దూసుకెళ్లి అద్దాలు ధ్వంసం చేశారు. ఈ ఘటన రాష్ట్రంలో కలకలం రేపింది. బీఆర్ఎస్ వర్కింగ్ ప్రెసిడెంట్ కేటీఆర్ (KTR), ఫోన్ ట్యాపింగ్ (Phone tapping) వ్యవహారంపై మహాన్యూస్ చానెల్ వరుస కథనాలు ప్రసారం చేసిన నేపథ్యంలో ఈ దాడి జరిగినట్లు తెలుస్తోంది. కేటీఆర్‌పై అసభ్యకరమైన హెడ్డింగ్స్, థంబ్‌నైల్స్‌ తో దుష్ప్రచారం చేస్తున్నారనే ఆరోపణలతో బీఆర్ఎస్ శ్రేణులు ఈ దాడికి పాల్పడినట్లు సమాచారం. ఈ ఘటనపై కేటీఆర్ పరోక్షంగా ఎక్స్ లో స్పందించారు. తనపై అసత్య ఆరోపణలు చేసే వారిపై చట్టపరంగా చర్యలు తీసుకుంటానని హెచ్చరించారు.

బీఆర్ఎస్ విద్యార్థి విభాగం నేత గెల్లు శ్రీనివాస్ ఆధ్వర్యంలో మహాన్యూస్ కార్యాలయంపై దాడి జరిగినట్లు తెలుస్తోంది. అయితే, ఈ నిరసన శాంతియుతంగా జరిగిందని, మహాన్యూస్ యాజమాన్యమే బీఆర్ఎస్ కార్యకర్తలపై దాడి చేసిందని బీఆర్ఎస్ వర్గాలు ఆరోపించాయి. ఈ ఘటనలో గాయపడిన బీఆర్ఎస్ కార్యకర్తలు ఉన్నట్లు కూడా వారు పేర్కొన్నారు. మరోవైపు, మహాన్యూస్ సిబ్బంది ఈ దాడికి నిరసనగా శాంతియుత నిరసన తెలిపారు. మహా గ్రూప్ ఆఫ్ ఛానల్స్ సీఎండీ వంశీ ఈ నిరసనలో పాల్గొన్నారు. మహాన్యూస్ చానెల్ కేటీఆర్‌తో పాటు బీఆర్ఎస్ నాయకులపై ఫోన్ ట్యాపింగ్ వ్యవహారంలో దుష్ప్రచారం చేస్తోందని బీఆర్ఎస్ ఆరోపిస్తోంది. ఈ వ్యవహారం వెనుక ముఖ్యమంత్రి రేవంత్ రెడ్డి ఉన్నారని చెప్తోంది.

ఈ నేపథ్యంలో కేటీఆర్ ఎక్స్‌ లో ఒక ట్వీట్‌ చేశారు. పరోక్షంగా ఈ దాడిని సమర్థిస్తూ, అబద్ధాలు, దురుద్దేశపూర్వక ప్రచారాలకు వ్యతిరేకంగా చట్టపరమైన చర్యలు తీసుకుంటామని హెచ్చరించారు. “ప్రజాస్వామ్యంలో భౌతిక దాడులకు ఎన్నటికీ ఆస్కారం ఉండకూడదు. అలానే అబద్ధాలకు, అసందర్భ ప్రేలాపనలకు, మీడియా ముసుగులో చేసే నీచపు రాజకీయాలకు కూడా అస్సలు తావు ఉండకూడదు!” అని పేర్కొన్నారు. కొంతమంది మీడియా సంస్థలు, విలేకరులు తనపై వ్యక్తిగతంగా, బీఆర్ఎస్ నాయకత్వంపై విషం చిమ్ముతున్నారని ఆరోపించారు. ఈ దాడులు తన కుటుంబ సభ్యులపై, పార్టీ శ్రేణులపై తీవ్ర దుష్ప్రభావం చూపుతున్నాయని, వీటిని చట్టపరంగా ఎదుర్కొంటామని హెచ్చరించారు.

మరోవైపు.. ఈ దాడిని జర్నలిస్టులు, ప్రజాసంఘాలు, వివిధ రాజకీయ పార్టీలు తీవ్రంగా ఖండించాయి. బీజేపీ నాయకుడు బండి సంజయ్ ఈ దాడిని “ప్రజాస్వామ్యానికి సిగ్గుచేటు”గా అభివర్ణించారు. ఆయన ఎక్స్‌ లో పోస్ట్ చేస్తూ, ఈ దాడి చేసిన వారిపై కఠిన చర్యలు తీసుకోవాలని హైదరాబాద్ పోలీసులను కోరారు. ఇలాంటి దాడులు ఆంధ్రప్రదేశ్‌లో ఒక పార్టీని కాలగర్భంలో కలిసిపోయేలా చేశాయని ఆయన హెచ్చరించారు. మహాన్యూస్ సిబ్బంది ఈ దాడికి నిరసనగా శాంతియుత నిరసన తెలిపారు. తమ కథనాలకు బీఆర్ఎస్ భయపడిందని, వాస్తవాలను జీర్ణించుకోలేక ఈ దాడికి పాల్పడిందని ఆరోపించారు. ఈ ఘటనపై సైబరాబాద్ పోలీసులు విచారణ జరుపుతున్నారు.