Raja Singh: తెలంగాణ బీజేపీలో సంచలనం.. ఎమ్మెల్యే రాజా సింగ్ రాజీనామా

తెలంగాణ భారతీయ జనతా పార్టీ (BJP)లో సంచలన పరిణామం చోటుచేసుకుంది. గోషామహల్ ఎమ్మెల్యే (Gosha Mahal MLA), బీజేపీ కీలక నాయకుడు రాజా సింగ్ (Raja Singh) పార్టీకి రాజీనామా (resignation) చేస్తున్నట్లు ప్రకటించారు. రాష్ట్ర బీజేపీ అధ్యక్షుడిగా రాంచందర్ రావు నియామకం పట్ల తీవ్ర అసంతృప్తి వ్యక్తం చేస్తూ ఈ నిర్ణయం తీసుకున్నారు. ఈ రాజీనామా వెనుక లక్షలాది కార్యకర్తల ఆవేదన ఉందని, పార్టీ నాయకత్వం తప్పుదారి పట్టిందని రాజా సింగ్ ఆరోపించారు. ఈ విషయంపై కేంద్ర నాయకత్వం పునరాలోచన చేయాలని విజ్ఞప్తి చేశారు. హిందుత్వ భావజాలం కోసం తాను కొనసాగుతున్న పోరాటాన్ని రాజీనామా ఆపదని స్పష్టం చేశారు.

తెలంగాణ బీజేపీలో హిందుత్వ భావజాలానికి బలమైన గొంతుకగా పేరొందిన నాయకుడు రాజా సింగ్. గతంలో ఆయన చేసిన వివాదాస్పద వ్యాఖ్యలు, ధైర్యసాహసాలు పార్టీ కార్యకర్తల్లో ఆయనకు గట్టి మద్దతును తెచ్చిపెట్టాయి. అయితే, తాజాగా రాష్ట్ర అధ్యక్షుడిగా రాంచందర్ రావు (Ramachandra Rao) నియామకం పట్ల ఆయన తీవ్ర నిరసన వ్యక్తం చేశారు. “నావాడు, నీవాడు అంటూ నియామకాలు చేస్తే పార్టీకి తీవ్ర నష్టం వాటిల్లుతుంది” అని రాజా సింగ్ హెచ్చరించారు. బూత్ స్థాయి నుంచి రాష్ట్ర స్థాయి వరకు కార్యకర్తలు, నాయకులు ఓటు వేసి అధ్యక్షుడిని ఎన్నుకోవాలని, కానీ వ్యక్తిగత ప్రయోజనాల కోసం కొందరు నాయకులు పార్టీని తప్పుదారి పట్టిస్తున్నారని ఆయన ఆరోపించారు.

రాజా సింగ్ తన రాజీనామా లేఖలో పలు కీలక విషయాలను ప్రస్తావించారు. లక్షలాది కార్యకర్తల బాధను తన రాజీనామా ప్రతిబింబిస్తుందన్నారు. ఆత్మీయత పంచే నాయకులను పక్కనపెట్టి, వ్యక్తిగత ప్రయోజనాలతో కొందరు నిర్ణయాలు తీసుకుంటున్నారని ఆయన విమర్శలు చేశారు. రాష్ట్ర అధ్యక్షుడి నియామకం విషయంలో కేంద్ర నాయకత్వాన్ని కొందరు తప్పుదోవ పట్టించారని, ఈ నిర్ణయం కార్యకర్తల్లో అనుమానాలు కలిగిస్తోందని ఆయన ఆవేదన వ్యక్తం చేశారు. “తెలంగాణ సిద్ధంగా ఉంది, కానీ సరైన నాయకత్వం కావాలి” అని రాజా సింగ్ పేర్కొన్నారు. ప్రధాని నరేంద్ర మోదీ, బీజేపీ జాతీయ అధ్యక్షుడు జేపీ నడ్డా, కేంద్ర హోం మంత్రి అమిత్ షా, బీఎల్ సంతోష్‌లను ఈ నిర్ణయంపై పునఃపరిశీలన చేయాలని విజ్ఞప్తి చేశారు.

రాజా సింగ్ గతంలోనూ బీజేపీలోని అంతర్గత సమస్యలపై గళమెత్తిన సందర్భాలు ఉన్నాయి. ఫిబ్రవరిలో ఆయన పార్టీలో వేధింపులు తట్టుకోలేకపోతున్నామని, అవసరం లేదని చెబితే రాజీనామా చేస్తానని సంచలన వ్యాఖ్యలు చేశారు. అలాగే ఇటీవల కూడా వివాదాస్పద వ్యాఖ్యలు చేశారు. తెలంగాణ బీజేపీ నాయకత్వం కాంగ్రెస్‌తో కుమ్మక్కై, ప్యాకేజీల కోసం పార్టీని అమ్మేస్తోందని ఆరోపించారు. ఈ నేపథ్యంలో, రాంచందర్ రావు నియామకం ఆయనలోని అసంతృప్తిని మరింత పెంచినట్లు తెలుస్తోంది.

రాజా సింగ్ రాజీనామా ప్రకటన తెలంగాణ బీజేపీలో కలకలం సృష్టించింది. ఆయన మద్దతుదారులు, కార్యకర్తలు ఈ నిర్ణయంపై సోషల్ మీడియాలో తీవ్రంగా స్పందిస్తున్నారు. “బీజేపీలో ఇక కొనసాగలేను, కానీ హిందుత్వం కోసం నా పోరాటం ఆగదు” అని రాజా సింగ్ స్పష్టం చేయడం ద్వారా, ఆయన భవిష్యత్ గురించి చర్చలు మొదలయ్యాయి. కొందరు ఆయన స్వతంత్రంగా ముందుకు సాగవచ్చని అంచనా వేస్తున్నారు. ఇతర హిందుత్వ సంస్థలతో కలిసి పనిచేయవచ్చని మరికొందరు ఊహిస్తున్నారు. తెలంగాణ బీజేపీలో ఇటీవల అంతర్గత విభేదాలు, నాయకత్వ లోపాలు ఎక్కువయ్యాయి. ఇవి పార్టీ గ్రాఫ్‌ను దెబ్బతీస్తున్నాయని విశ్లేషకులు అభిప్రాయపడుతున్నారు. రాజా సింగ్ లాంటి కీలక నాయకుడు పార్టీని వీడటం రాష్ట్రంలో బీజేపీ బలాన్ని దెబ్బతీసే అవకాశం ఉంది.