BC Reservations: బీసీ రిజర్వేషన్ల బిల్లుపై ఆశలు వదిలేసుకోవాల్సిందేనా..?
- Published By: techteam
- August 8, 2025 / 12:39 PM IST
తెలంగాణలో బీసీలకు 42 శాతం రిజర్వేషన్లు (BC Resevations) కల్పించాలనే లక్ష్యంతో ముఖ్యమంత్రి రేవంత్ రెడ్డి (CM Revanth Reddy) నేతృత్వంలోని కాంగ్రెస్ (Congress) ప్రభుత్వం పట్టుదలతో ముందుకు సాగుతోంది. ఇందులో భాగంగా అసెంబ్లీలో బీసీ రిజర్వేషన్లకు సంబంధించిన రెండు బిల్లులను ఏకగ్రీవంగా ఆమోదించింది. కేంద్ర ప్రభుత్వ ఆమోదం కోసం రాష్ట్రపతికి పంపించంది. అయితే, ఈ బిల్లులు గత నాలుగు నెలలుగా రాష్ట్రపతి (President) ఆమోదం కోసం ఎదురుచూస్తున్నాయి. వీటిని ఆమోదించాలంటూ కాంగ్రెస్ పార్టీ ఢిల్లీలో మూడు రోజులపాటు ధర్నా చేసింది. బీసీ రిజర్వేషన్ల బిల్లును కేంద్రం ఆమోదించకపోతే మోదీని గద్దె దించుతామని రేవంత్ రెడ్డి హెచ్చరించారు. అయితే బిల్లును కేంద్రం చేతిలో పెట్టేసి రేవంత్ రెడ్డి చేతులు దులుపుకునే ప్రయత్నం చేస్తున్నారని విపక్షాలు ఆరోపిస్తున్నాయి.
రేవంత్ రెడ్డి ఈ బిల్లు ఆమోదం కోసం కేంద్ర ప్రభుత్వంపై ఒత్తిడి తెచ్చేందుకు ఢిల్లీలో జంతర్ మంతర్ వద్ద మూడు రోజులపాటు భారీ ధర్నా నిర్వహించారు. ఈ ధర్నాకు కాంగ్రెస్ ఎంపీలు, మంత్రులు, ఎమ్మెల్యేలు, ఎమ్మెల్సీలతో పాటు ఇండియా కూటమి నేతలు కూడా మద్దతు తెలిపారు. రాహుల్ గాంధీ, మల్లికార్జున్ ఖర్గేలు ఈ కులగణన మోడల్‌ను ప్రశంసించినట్లు రేవంత్ తెలిపారు. అయితే, రాష్ట్రపతి ద్రౌపది ముర్ము నుంచి అపాయింట్‌మెంట్ రాకపోవడంపై రేవంత్ ఆవేదన వ్యక్తం చేశారు. ఈ విషయంలో ప్రధాని నరేంద్ర మోదీ, హోం మంత్రి అమిత్ షా ఒత్తిడి కారణమని ఆయన ఆరోపించారు. “బీసీలకు న్యాయం చేయకపోతే, మోదీని గద్దె దించి, రాహుల్ గాంధీని ప్రధానిగా చేస్తాం” అని రేవంత్ సవాల్ విసిరారు.
అయితే, బీఆర్ఎస్, బీజేపీలు రేవంత్ రెడ్డి వైఖరిపై తీవ్ర విమర్శలు చేస్తున్నాయి. బీఆర్ఎస్ వర్కింగ్ ప్రెసిడెంట్ కేటీఆర్, కాంగ్రెస్ బీసీలను మోసం చేస్తోందని, ఈ ధర్నా కేవలం రాజకీయ నాటకమని ఆరోపించారు. “42 శాతం రిజర్వేషన్లు అమలు చేస్తామని ఎన్నికల్లో ఓట్లు వేయించుకుని, ఇప్పుడు రాహుల్ గాంధీ ప్రధాని అయితేనే రిజర్వేషన్లు అమలు చేస్తామని చెప్పడం మోసం కాదా?” అని ప్రశ్నించారు. బీజేపీ నేతలు కూడా ఈ బిల్లుపై కాంగ్రెస్ చిత్తశుద్ధి లేదని, తెలంగాణ ప్రజలను తప్పుదారి పట్టిస్తున్నారని విమర్శించారు. బీజేపీ రాష్ట్ర నాయకులు కిషన్ రెడ్డి, బండి సంజయ్‌లపై రేవంత్ విమర్శలు చేస్తూ, వారు బీసీ రిజర్వేషన్లకు వ్యతిరేకంగా పనిచేస్తున్నారని ఆరోపించారు.
ఈ బిల్లు ఆమోదం కాకపోవడానికి పలు సాంకేతిక అంశాలు కారణంగా కనిపిస్తున్నాయి. రాష్ట్రంలో రిజర్వేషన్లు 50 శాతం దాటకూడదనే సుప్రీంకోర్టు సీలింగ్ ఒక ప్రధాన అడ్డంకి. ఈ సీలింగ్‌ను అధిగమించేందుకు బిల్లును 9వ షెడ్యూల్‌లో చేర్చాల్సి ఉంటుంది. ఇది కేంద్ర ప్రభుత్వ అధికార పరిధిలో ఉంటుంది. రేవంత్ రెడ్డి మూడు ప్రత్యామ్నాయాలను ప్రస్తావించారు: (1) జీవో జారీ చేసి ఎన్నికలు నిర్వహించడం, కానీ ఇది కోర్టులో దీనిపై స్టే వచ్చే అవకాశం ఉంది (2) స్థానిక ఎన్నికలను ఆపివేయడం, కానీ ఇది కేంద్ర నిధులను ఆపివేసే ప్రమాదం ఉంది; (3) కేంద్ర ఆమోదం కోసం ఒత్తిడి చేయడం. ఈ మూడు మార్గాలూ సవాళ్లతో నిండి ఉన్నాయి.
తెలంగాణ ప్రభుత్వం ఈ ఏడాది ఫిబ్రవరిలో కులగణన చేపట్టి, దేశంలోనే మొదటి రాష్ట్రంగా చరిత్ర సృష్టించింది. ఈ సర్వే ఆధారంగా 42 శాతం రిజర్వేషన్లు కల్పించాలని నిర్ణయించారు. రాహుల్ గాంధీ భారత్ జోడో యాత్రలో ఇచ్చిన హామీ మేరకు ఈ చర్య తీసుకున్నట్లు రేవంత్ తెలిపారు. అయితే, కేంద్రం నుంచి సహకారం లేకపోవడం, రాష్ట్రపతి అపాయింట్‌మెంట్ ఇవ్వకపోవడం వంటి అంశాలు బీసీలకు న్యాయం చేయడంలో అడ్డంకులుగా మారాయి.
బీసీ రిజర్వేషన్లపై రేవంత్ రెడ్డి ప్రభుత్వం తమ చిత్తశుద్ధిని నిరూపించేందుకు ప్రయత్నిస్తున్నప్పటికీ, కేంద్రం సహకారం లేకుండా ఈ బిల్లు అమలు కావడం కష్టసాధ్యంగా కనిపిస్తోంది. విపక్షాల విమర్శలు, సాంకేతిక అడ్డంకులు ఈ పోరాటాన్ని మరింత సంక్లిష్టం చేస్తున్నాయి. ఈ బిల్లు ఆమోదం పొంది, బీసీలకు న్యాయం జరిగేనా లేక అటకెక్కిన బిల్లుగానే మిగిలిపోతుందా అనేది కాలమే నిర్ణయించాలి.
