BJP: తెలంగాణలో స్పీడ్ పెంచిన బీజేపీ..! BRS నేతలపై కన్ను..!!

తెలంగాణలో భారతీయ జనతా పార్టీ (BJP) తన ప్రాభవాన్ని పెంచుకునేందుకు ప్రయత్నిస్తోంది. రాష్ట్రంలో అధికారాన్ని చేజిక్కించుకోవాలనే చిరకాల కలను సాకారం చేసుకునే దిశగా బీజేపీ వ్యూహాత్మకంగా అడుగులు వేస్తోంది. భారత రాష్ట్ర సమితి (BRS) ప్రభావం క్షీణించడం, ఆ పార్టీలో అంతర్గత సమస్యలు తలెత్తడంతో ఏర్పడిన రాజకీయ శూన్యతను భర్తీ చేయడం ద్వారా తన స్థానాన్ని బలోపేతం చేసుకోవాలని బీజేపీ ఆలోచిస్తోంది. ఈ నేపథ్యంలో బీఆర్ఎస్, కాంగ్రెస్ (congress) పార్టీల నుంచి కీలక నేతలను ఆకర్షించేందుకు “ఆపరేషన్ ఆకర్ష్” పేరిట ఒక వ్యూహాత్మక కార్యక్రమాన్ని ముమ్మరం చేసింది.

బీఆర్ఎస్ పార్టీ గత లోక్‌సభ ఎన్నికల్లో ఒక్క సీటు కూడా గెలవకపోయింది. అసెంబ్లీ ఎన్నికల్లో ఓడిపోవడంతో అధికారానికి దూరమైంది. దీంతో ఆ పార్టీలో అసంతృప్తి, నిరాశ పెరిగాయి. ఈ పరిస్థితిని అవకాశంగా భావించిన బీజేపీ, బీఆర్ఎస్‌లోని మాజీ ఎమ్మెల్యేలు, జిల్లా స్థాయిలో ప్రభావం కలిగిన నేతలను ఆకర్షించేందుకు తెరవెనుక ప్రయత్నాలు చేస్తోంది. బీఆర్ఎస్ మాజీ ఎమ్మెల్యే గువ్వల బాలరాజు (Guvvala Balaraju) ఆ పార్టీకి రాజీనామా చేసి, ఆగస్టు 9న బీజేపీలో చేరేందుకు సిద్ధమయ్యారు. ఇలాంటి చేరికలు కేవలం ఒక్కరితోనే ఆగేలా లేవు. దాదాపు 12 మంది బీఆర్ఎస్ మాజీ ఎమ్మెల్యేలు బీజేపీ వైపు మొగ్గు చూపుతున్నట్టు సమాచారం.

బీజేపీ తన ఆపరేషన్ ఆకర్ష్‌ ను బీఆర్ఎస్‌కు మాత్రమే పరిమితం చేసేలా లేదు. కాంగ్రెస్ పార్టీలోని అసంతృప్త నేతలను కూడా లాగేందుకు వ్యూహం సిద్ధం చేసినట్లు సమాచారం. తాజాగా అలంపూర్ మాజీ ఎమ్మెల్యే అబ్రహాం (Alampur Ex MLA Abraham) కాంగ్రెస్ పార్టీకి రాజీనామా చేసి బీజేపీలో చేరేందుకు సిద్ధమైనట్టు సమాచారం. అలాగే కాంగ్రెస్ ప్రభుత్వంలో ముఖ్యమంత్రి రేవంత్ రెడ్డి (CM Revanth Reddy) నాయకత్వంపై అసంతృప్తితో ఉన్న కొందరు నేతలను ఆకర్షించేందుకు బీజేపీ ప్రయత్నిస్తోంది. గతంలో కాంగ్రెస్ పార్టీ ఆపరేషన్ ఆకర్ష్ (Operation Akarsh) ద్వారా బీఆర్ఎస్ నుంచి 10 మంది ఎమ్మెల్యేలను తమ వైపు తిప్పుకున్న సంగతి తెలిసిందే. రాష్ట్రంలో కాంగ్రెస్ ప్రభుత్వం బలహీనంగా ఉందని, దాని నాయకత్వంపై అసంతృప్తి ఉందని బీజేపీ నేతలు భావిస్తున్నారు. ఈ పరిస్థితిని అవకాశంగా భావించి, కాంగ్రెస్‌లోని అసంతృప్త నేతలను తమ వైపు ఆకర్షించేందుకు బీజేపీ నాయకత్వం చర్చలు జరుపుతోంది.

బీజేపీ తెలంగాణ అధ్యక్షుడిగా ఎన్.రామచంద్రరావు నియామకం తర్వాత, పార్టీలో కొత్త ఊపు కనిపిస్తోంది. రామచంద్రరావు (N Ramachandra Rao) ఒక వ్యూహకర్తగా, సంస్థాగత నైపుణ్యం కలిగిన నాయకుడిగా పేరుగాంచారు. ఆయన నాయకత్వంలో బీజేపీ రాష్ట్రంలో తన స్థానాన్ని బలోపేతం చేసుకోవడానికి కసరత్తు చేస్తోంది. గతంలో బీజేపీ రాష్ట్రంలో 8 లోక్‌సభ సీట్లను గెలుచుకున్న విజయం ఆ పార్టీకి కొత్త ఉత్సాహాన్ని ఇచ్చింది. ఈ నేపథ్యంలో, రామచంద్రరావు ఆపరేషన్ ఆకర్ష్‌ను మరింత తీవ్రతరం చేసేందుకు ప్రణాళికలు రూపొందిస్తున్నారు. చేరికలను పెద్దఎత్తున ప్రోత్సహించడం ద్వారా పార్టీలో తన సత్తా ఏంటో చూపించాలనే ఆలోచనలో ఉన్నారు రామచంద్రరావు.

తెలంగాణలో బీజేపీ ఆపరేషన్ ఆకర్ష్ రాష్ట్ర రాజకీయాల్లో కొత్త ఒరవడిని సృష్టిస్తోంది. బీఆర్ఎస్, కాంగ్రెస్ నుంచి నేతలను ఆకర్షించడం ద్వారా తన స్థానాన్ని బలోపేతం చేసుకునేందుకు బీజేపీ వేగంగా అడుగులు వేస్తోంది. రామచంద్రరావు నాయకత్వంలో ఈ వ్యూహం ఎంతవరకు విజయవంతమవుతుంది, రాష్ట్ర రాజకీయ సమీకరణలను ఎలా మార్చగలదనేది రాబోయే రోజుల్లో తేలనుంది.