BC Reservations: తెలంగాణలో బీసీ రిజర్వేషన్లపై రాజకీయ రగడ..!!

తెలంగాణలో బీసీ రిజర్వేషన్ల (BC Reservations) అంశం రాజకీయంగా వేడెక్కింది. స్థానిక సంస్థల ఎన్నికలు, విద్య, ఉద్యోగాల్లో బీసీలకు 42 శాతం రిజర్వేషన్ కల్పించాలన్న లక్ష్యంతో కాంగ్రెస్ ప్రభుత్వం (Congress Govt) ముందడుగు వేస్తోంది. అయితే, ఈ అంశంపై కాంగ్రెస్, బీజేపీ, బీఆర్ఎస్, తెలంగాణ జాగృతి వంటి రాజకీయ పక్షాలు, సంస్థలు విభిన్న వైఖరులతో రంగంలోకి దిగాయి. ఈ వివాదాస్పద అంశంపై ప్రతి పక్షం తమదైన వాదనలతో పోటీపడుతోంది.

ముఖ్యమంత్రి రేవంత్ రెడ్డి (CM Revanth Reddy) నేతృత్వంలోని కాంగ్రెస్ ప్రభుత్వం బీసీ రిజర్వేషన్లను 42 శాతానికి పెంచేందుకు రెండు కీలక బిల్లులను శాసనసభలో ఆమోదించింది. ‘తెలంగాణ బ్యాక్‌వర్డ్ క్లాసెస్, ఎస్సీ, ఎస్టీ (విద్యా సంస్థలు, ఉద్యోగాల్లో రిజర్వేషన్) బిల్, 2025’ ‘తెలంగాణ బీసీ (స్థానిక సంస్థల్లో రిజర్వేషన్) బిల్, 2025’ లను రాష్ట్రపతి ఆమోదం కోసం మార్చి 30న పంపించింది. అప్పటి నుంచి ఇవి పెండింగ్‌లో ఉన్నాయి. ఈ బిల్లులను ఆమోదించకుండా కేంద్రం ఆలస్యం చేస్తుండడంతో ఒత్తిడి పెంచేందుకు కాంగ్రెస్ పార్టీ ఢిల్లీలో ఆగస్టు 5-7వరకూ మూడు రోజుల ధర్నాను జంతర్ మంతర్ వద్ద నిర్వహిస్తోంది. రేవంత్ రెడ్డి సహా బీసీ నాయకులు, కాంగ్రెస్ కార్యకర్తలు ఈ ధర్నాలో పాల్గొన్నారు. రాష్ట్రంలో జరిగిన కుల గణన ఆధారంగా బీసీలు 56.33% ఉన్నారని, ఈ రిజర్వేషన్ సామాజిక న్యాయం కోసం కీలకమని కాంగ్రెస్ వాదిస్తోంది. బీజేపీ ఈ బిల్లులను అడ్డుకుంటోందని, బీసీలకు అన్యాయం చేస్తోందని ఆరోపిస్తూ, కాంగ్రెస్ నాయకులు బీజేపీ ఎంపీలను రాజీనామా చేయాలని సవాల్ విసిరారు.

కాంగ్రెస్, బీజేపీలు బీసీలను మోసం చేస్తున్నాయని బీఆర్ఎస్ (BRS) నాయకులు ఆరోపిస్తున్నారు. ఈ బిల్లులను తొమ్మిదో షెడ్యూల్‌లో చేర్చాలని, రాష్ట్రపతి ఆమోదం తీసుకురావాలని బీఆర్ఎస్ నాయకుడు బి. వినోద్ కుమార్ డిమాండ్ చేశారు. ఆగస్టు 8న కరీంనగర్‌లో భారీ బీసీ ర్యాలీని బీఆర్ఎస్ నిర్వహించింది. మాజీ మంత్రి వి. శ్రీనివాస్ గౌడ్ కాంగ్రెస్ ఆర్డినెన్స్‌ను విమర్శిస్తూ, రాష్ట్రానికి రిజర్వేషన్లు పెంచే అధికారం లేదని, కేంద్రం ఆమోదం లేనిదే ఇది సాధ్యం కాదని అన్నారు. బీఆర్ఎస్ నాయకులు కాంగ్రెస్, బీజేపీలు రాజకీయ లబ్ధి కోసం బీసీలను ఉపయోగించుకుంటున్నాయని ఆరోపించారు.

అయితే.. ఈ బిల్లులను తొమ్మిదో షెడ్యూల్‌లో చేర్చడాన్ని బీజేపీ (BJP) వ్యతిరేకిస్తోంది. 42 శాతం బీసీ రిజర్వేషన్‌లలో ముస్లిం కోటా (10%) చేర్చడంపై బీజేపీ తీవ్ర అభ్యంతరం వ్యక్తం చేస్తోంది. ఇది బీసీలకు కేటాయించే రిజర్వేషన్‌ను 32 శాతానికి తగ్గిస్తుందని, ఇది గతంలో ఉన్న 34 శాతం కంటే తక్కువని బీజేపీ అధ్యక్షుడు రామచంద్ర రావు వాదిస్తున్నారు. కేంద్ర మంత్రి కిషన్ రెడ్డి, ఎంపీ ఈటల రాజేందర్ వంటి నాయకులు కాంగ్రెస్‌ మతపరమైన రిజర్వేషన్లను ప్రోత్సహిస్తోందని ఆరోపిస్తున్నారు. బీజేపీ అధికారంలోకి వస్తే పూర్తి 42 శాతం బీసీలకు మాత్రమే కేటాయిస్తామని హామీ ఇచ్చారు. ఆగస్టు 2న హైదరాబాద్‌లోని ఇందిరా పార్క్ వద్ద బీజేపీ ‘మహా ధర్నా’ నిర్వహించింది.

తెలంగాణ జాగృతి (Telangana Jagruthi) అధ్యక్షురాలు, బీఆర్ఎస్ ఎమ్మెల్సీ కవిత (Kavitha) 42 శాతం బీసీ రిజర్వేషన్ కోసం ఆగస్టు 4-6 తేదీల్లో హైదరాబాద్‌లోని ఇందిరా పార్క్ వద్ద 72 గంటల ఆమరణ నిరాహార దీక్ష చేపట్టారు. ముస్లిం రిజర్వేషన్లను బీసీ కోటా నుంచి వేరు చేసి, ముస్లింలకు ప్రత్యేక 10 శాతం రిజర్వేషన్ కల్పించాలని కవిత డిమాండ్ చేశారు. దీనికి బీజేపీ మద్దతు లభిస్తుందని, తద్వారా ఇది ఆమోదం పొందుతుందనేది ఆమె వాదన. అయితే కాంగ్రెస్, బీజేపీలకు బీసీల పట్ల నిజాయితీ లేదని, రాజకీయ డ్రామాలు ఆడుతున్నాయని కవిత ఆరోపించారు.

తెలంగాణ హైకోర్టు స్థానిక సంస్థల ఎన్నికలను సెప్టెంబర్ 30, 2025లోపు నిర్వహించాలని ఆదేశించడంతో ఈ అంశం మరింత తీవ్రమైంది. కాంగ్రెస్ ఆర్డినెన్స్ ద్వారా రిజర్వేషన్‌ను అమలు చేయాలని చూస్తున్నప్పటికీ, గవర్నర్ ఆమోదం లేకపోవడం, కేంద్రంలో బిల్లులు పెండింగ్‌లో ఉండటం వల్ల చట్టపరమైన అడ్డంకులు ఎదురవుతున్నాయి.

బీసీ రిజర్వేషన్ల అంశం తెలంగాణ రాజకీయాల్లో కీలక సమస్యగా మారింది. కాంగ్రెస్ సామాజిక న్యాయం పేరుతో రిజర్వేషన్ అమలుకు ఒత్తిడి తెస్తుండగా, బీజేపీ మతపరమైన రిజర్వేషన్లపై వ్యతిరేకత వైఖరి కలిగి ఉంది. బీఆర్ఎస్, తెలంగాణ జాగృతి రెండూ కాంగ్రెస్, బీజేపీలను రాజకీయ లబ్ధి కోసం బీసీలను ఉపయోగించుకుంటున్నాయని విమర్శిస్తున్నాయి. స్థానిక ఎన్నికల గడువు దగ్గరపడుతుండటంతో ఈ వివాదం మరింత ఉద్ధృతమయ్యే అవకాశం ఉంది.