TTD: తిరుమల లడ్డూ కల్తీ కేసు పై ముగిసిన సీబీఐ దర్యాప్తు..24 మందిపై చార్జిషీట్..

తిరుమల శ్రీవారి ఆలయంలో భక్తులకు అందించే పవిత్ర లడ్డూ (Tirumala Laddu) నాణ్యతపై గతంలో తీవ్ర వివాదం చెలరేగిన విషయం తెలిసిందే. వైసీపీ (YCP) ప్రభుత్వం అధికారంలో ఉన్న సమయంలో లడ్డూల తయారీలో ఉపయోగించిన నెయ్యిలో కల్తీ జరిగిందని, అందులో జంతువుల కొవ్వు సహా అనేక నకిలీ పదార్థాలు వినియోగించారని అప్పట్లో ఆరోపణలు వెల్లువెత్తాయి. ఈ అంశంపై ముఖ్యమంత్రి చంద్రబాబు నాయుడు (Chandrababu Naidu) ,ఉప ముఖ్యమంత్రి పవన్ కళ్యాణ్ (Pawan Kalyan) బహిరంగంగానే స్పందించి, ఆలయ పవిత్రతకు భంగం కలిగిందని తీవ్రంగా విమర్శించారు. ఈ వ్యాఖ్యలు దేశవ్యాప్తంగా చర్చకు దారితీశాయి.

ఈ ఆరోపణల నేపథ్యంలో వ్యవహారం న్యాయస్థానాల వరకు వెళ్లింది. పరిస్థితి తీవ్రతను గమనించిన సుప్రీంకోర్టు (Supreme Court) స్వయంగా జోక్యం చేసుకుని, ఈ అంశంపై సీబీఐ (CBI) ఆధ్వర్యంలో ప్రత్యేక దర్యాప్తు బృందం (SIT) ఏర్పాటు చేయాలని ఆదేశించింది. దాదాపు 15 నెలల పాటు సాగిన ఈ విచారణలో అనేక కీలక విషయాలు వెలుగులోకి వచ్చాయి. సిట్ బృందం దేశవ్యాప్తంగా విస్తృతంగా దర్యాప్తు జరిపి, ఏపీతో పాటు 12 రాష్ట్రాల్లో నకిలీ నెయ్యి సరఫరాకు సంబంధం ఉన్న వ్యక్తులు, సంస్థలను గుర్తించింది.

దర్యాప్తు ముగిసిన అనంతరం శుక్రవారం సీబీఐ ప్రత్యేక బృందం నెల్లూరు (Nellore)లోని స్థానిక కోర్టులో చార్జిషీట్ దాఖలు చేసింది. ఈ కేసులో మొత్తం 24 మందిని నిందితులుగా పేర్కొన్నట్లు సమాచారం. దర్యాప్తు వివరాల ప్రకారం, బోలే బాబా ఆర్గానిక్ డెయిరీ (Bole Baba Organic Dairy) కేంద్రంగా ఈ కల్తీ వ్యవహారం నడిచినట్టు అధికారులు తేల్చారు. అక్కడ పాలు లేకుండానే నెయ్యి తయారు చేసి, అందులో కృత్రిమ రసాయనాలు, పామాయిల్ వంటి పదార్థాలు వినియోగించినట్లు సిట్ వెల్లడించింది.

ఈ డెయిరీ డైరెక్టర్లు పొమిల్ జైన్ (Pomil Jain), విపిన్ జైన్ (Vipin Jain) ఈ నకిలీ వ్యవహారానికి ప్రధాన సూత్రధారులుగా ఉన్నారని చార్జిషీట్‌లో పేర్కొన్నారు. అలాగే ఏపీతో పాటు ఇతర రాష్ట్రాలకు చెందిన కొన్ని సంస్థలు, వ్యక్తులు కూడా ఈ అక్రమ కార్యకలాపాల్లో భాగస్వాములైనట్టు ఆధారాలు లభించాయి. మొత్తం ఈ కేసును సీబీఐతో పాటు భారత ఆహార నాణ్యత తనిఖీ విభాగం (Food Safety Authorities of India) అధికారులు కలిసి దర్యాప్తు చేయగా, సుమారు 30 మంది అధికారులు ఇందులో పాల్గొన్నారు.

ఇంకా టీటీడీ బోర్డు (TTD Board) నిర్ణయం మేరకే బోలే బాబాకు నెయ్యి సరఫరా కాంట్రాక్టు ఇచ్చినట్టు దర్యాప్తులో తేలింది. నకిలీ నెయ్యి సరఫరా జరుగుతోందన్న సమాచారం ఉన్నప్పటికీ, సంబంధిత అధికారులు సరైన చర్యలు తీసుకోలేదన్న ఆరోపణలు కూడా చార్జిషీట్‌లో చోటు చేసుకున్నాయి. క్షేత్రస్థాయి సిబ్బంది పాత్ర, కమీషన్లకు ఆశపడి నాణ్యతను విస్మరించిన తీరు ఈ వ్యవహారాన్ని మరింత తీవ్రమయ్యేలా చేసిందని సిట్ పేర్కొంది. మొత్తంగా, ఈ కేసు తిరుమల లడ్డూ పవిత్రతపై ప్రజల్లో ఉన్న విశ్వాసాన్ని కుదిపేసిన ఘటనగా నిలిచింది.