Peddireddy Mithun Reddy: రూ.100 కోట్ల చుట్టూ మిథున్ రెడ్డి ఇంటరాగేషన్!

ఆంధ్రప్రదేశ్‌లో గత ఐదేళ్ల పాలనలో జరిగిన అతిపెద్ద కుంభకోణంగా భావిస్తున్న మద్యం కుంభకోణం కేసులో ఎన్‌ఫోర్స్‌మెంట్ డైరెక్టరేట్ (ED) దర్యాప్తు ముమ్మరం చేసింది. వైసీపీ ఎంపీ పెద్దిరెడ్డి మిథున్ రెడ్డిని సుమారు ఏడు గంటల పాటు విచారించిన ఈడీ, మనీ లాండరింగ్ కోణంలో కీలక ఆధారాలను సేకరించినట్లు తెలుస్తోంది. ఈ విచారణ కేవలం ఒక ఎంపీ విచారణగా కాకుండా, రాష్ట్రవ్యాప్తంగా సాగిన ఒక వ్యవస్థీకృత ఆర్థిక నేరం దిశగా సాగడం గమనార్హం.

ఈ విచారణలో అత్యంత కీలకమైన అంశం విజయసాయిరెడ్డి, మిథున్ రెడ్డి, రాజ్ కేసీరెడ్డిల మధ్య జరిగిన ఆర్థిక లావాదేవీలు. ఈ కేసులో ఏ-1 నిందితుడైన రాజ్ కెసిరెడ్డికి రూ.100 కోట్లు ఇప్పించాలని మిథున్ రెడ్డి, విజయసాయిరెడ్డిని కోరినట్లు ఈడీ గుర్తించింది. ఈ మొత్తం ఎక్కడి నుంచి వచ్చింది? దీనికి గ్యారెంటీ ఎవరు? అనే ప్రశ్నలకు మిథున్ రెడ్డి నుంచి సరైన సమాధానాలు రాలేదని సమాచారం. ఈ వంద కోట్లు మద్యం వ్యాపారంలో వాటాల కోసమా లేదా మద్యం పాలసీని తమకు అనుకూలంగా మార్చుకున్నందుకు ప్రతిఫలంగా అందిన మొత్తమా? అన్న కోణంలో అధికారులు ఆరా తీశారు.

మద్యం విక్రయాల ద్వారా వచ్చిన అక్రమ సొమ్మును చట్టబద్ధమైన వ్యాపారాల్లోకి ఎలా మళ్లించారనే దానిపై ఈడీ వద్ద స్పష్టమైన మనీ ట్రయల్ ఉన్నట్లు కనిపిస్తోంది. సిండికేట్ ఏర్పాటు ద్వారా డిస్టిలరీలపై ఒత్తిడి తెచ్చి, వాటిని తమ అనుకూల వ్యక్తులకు అప్పగించారని గుర్తించింది. ప్రజలకు పరిచయం లేని కొత్త బ్రాండ్లను ప్రవేశపెట్టి, ప్రభుత్వ బ్రేవరేజస్ కార్పొరేషన్ ద్వారా వాటినే విక్రయించేలా ఒత్తిడి చేసింది. మద్యం షాపుల్లో డిజిటల్ చెల్లింపులు నిలిపివేసి, భారీగా నగదును సేకరించడం. ఈ నగదును పీఎల్‌ఆర్ ప్రాజెక్ట్స్, హుడ్‌వింక్స్, శర్వాణి ఇండస్ట్రీస్ వంటి సంస్థల ఖాతాల్లోకి వివిధ రూపాల్లో చేరవేసినట్లు ఈడీ అనుమానిస్తోంది.

విచారణలో అదాన్ డిస్టిలరీస్ పేరు ప్రముఖంగా వినిపించింది. పీఎల్‌ఆర్ ఇండస్ట్రీస్‌కు, అదాన్ డిస్టిలరీస్‌కు మధ్య జరిగిన భారీ నగదు బదిలీలను బ్యాంక్ స్టేట్‌మెంట్లతో సహా అధికారులు మిథున్ రెడ్డి ముందు ఉంచారు. వీటిని కేవలం వ్యాపార లావాదేవీలుగా ఆయన కొట్టిపారేసినప్పటికీ, ఆ లావాదేవీల వెనుక ఉన్న అసలు ఉద్దేశాన్ని నిరూపించేందుకు ఈడీ మరిన్ని పత్రాలను సిద్ధం చేసినట్లు తెలుస్తోంది.

ఉదయం 11 గంటల నుంచి సాయంత్రం 6 గంటల వరకు సాగిన ప్రశ్నోత్తరాల్లో, మిథున్ రెడ్డి చాలా వరకు “నాకు తెలియదు”, “గుర్తు లేదు” అనే సమాధానాలనే ఇచ్చారని సమాచారం. ఒక ప్రజాప్రతినిధిగా ఉండి, మద్యం తయారీ సంస్థల ఆర్థిక వ్యవహారాల్లో మీరు ఎందుకు జోక్యం చేసుకున్నారు? అన్న ప్రశ్నకు ఆయన నీళ్లు నమిలినట్లు తెలుస్తోంది. తనతో పాటు వచ్చిన చంద్రశేఖర్ రెడ్డి వంటి ప్రతినిధుల ద్వారా లావాదేవీలు నడిపించినట్లు ఈడీ భావిస్తోంది.

మిథున్ రెడ్డి విచారణతో ఈ కేసు తుది దశకు చేరుకుందని భావించలేం. ఇది కేవలం ఆరంభం మాత్రమే. విజయసాయిరెడ్డి, మిథున్ రెడ్డి ఇచ్చిన స్టేట్‌మెంట్లను ఈడీ సరిపోల్చనుంది. ఇద్దరి మాటల్లో పొంతన లేకపోతే, వారిద్దరినీ ముఖాముఖి కూర్చోబెట్టి విచారించే అవకాశం ఉంది. మనీ లాండరింగ్ చట్టం (PMLA) కింద బలమైన సాక్ష్యాలు లభిస్తే, తదుపరి విచారణలో అరెస్టులు జరిగే అవకాశం లేకపోలేదు.